کشتوکاڵی لوڕستان: پێشبینی دەکرێت ئەمساڵ بەرهەمی گەنم بگاتە 450 هەزار تۆن
رووداو دیجیتاڵ
بەڕێوەبەری بەڕێوەبەرایەتیی کشتوکاڵی پارێزگای لوڕستانی رۆژهەڵاتی کوردستان دەڵێت، لە سەرەتای وەرزی دروێنەی ئەمساڵەوە زیاتر لە 406 هەزار تۆن گەنم لە جووتیاران وەرگیراوە.
سەید عیماد شاهرۆخی، بەڕێوەبەری بەڕێوەبەرایەتیی کشتوکاڵی پارێزگای لوڕستان رایگەیاند، دروێنەی گەنم لە سنووری پارێزگاکە بەردەوامە و تا ئێستا 406 هەزار و 996 تۆن گەنم لە جووتیاران وەرگیراوە.
سەید عیماد شاهرۆخی ئاماژەی بەوەشکرد، تا چەند هەفتەیەکی دیکەش ناوەندەکانی سەر بە حکومەت و سایلۆکان لە وەرگرتنی گەنمی جووتیاران بەردەوام دەبن و گوتی، پێشبینی دەکرێت ئەمساڵ بەرهەمی گەنم لە پارێزگای لوڕستان بگاتە زیاتر لە 450 هەزار تۆن.
بە پێی ئاماری فەرمی، ئەمساڵ لە رووبەرێکی زیاتر لە 300 هەزار هێکتار گەنم لەو پارێزگایەی رۆژهەڵاتی کوردستان چێنراوە.