رووداو دیجیتاڵ
بەڕێوەبەری گشتیی ڤێتێرنەری پارێزگای سنە لەبارەی خواردنی گۆشتی ئەسپ هۆشداری دەداتە خەڵکی پارێزگاکە و دەڵێت: "خواردنی گۆشتی ئەسپ مەترسیی تووشبوون بە نەخۆشییە مەترسیدارەکانی هاوبەشی نێوان مرۆڤ و ئاژەڵ زیاد دەکات."
کامەران زیباکردار، بەڕێوەبەری گشتیی ڤێتێرنەری پارێزگای سنە، رۆژی یەکشەممە 30-06-2024 بە میدیای خۆجێی شارەکەی گوت: "لە چەندین شاری ئەو پارێزگایە فرۆشتنی گۆشتی ئەسپ بینراوە هەر جۆرە سەربڕینێکی ئەسپ و دابەشکردنی گۆشتەکەی، لە ژێر هەر ناونیشانێکدا، لە روانگەی بەڕێوەبەرایەتییەکەمان بێ مۆڵەت و ناتەندروستە."
زیباکردار هۆشداری دا، کە خواردنی گۆشتی ئەسپ مەترسیی گواستنەوەی نەخۆشیی باوی نێوان مرۆڤ و ئاژەڵ زیاد دەکات و دەبێتە هۆی ژەهراویبوونی خەڵک. گوتیشی، "ئەم جۆرە ئاژەڵانە لە شوێنی تەواو ناپاک سەردەبڕدرێن و گۆشتەکەیان بەبێ هیچ چاودێری و پشکنینێکی تەندروستیی ڤێتێرنەری دابەش دەکرێت."
بەڕێوەبەری گشتیی ڤێتێرنەری سنە داوای لە خەڵک کرد، "لە پێناو پاراستنی تەندروستی خۆیان و خێزانەکانیان خۆیان لە کڕین و خواردنی ئەم جۆرە گۆشتە بەدوور بگرن"، تەنیا گۆشتی ئەو ئاژەڵانە بەکاربهێنن کە لە سەربڕخانە رێگەپێدراوەکاندا لەژێر چاودێریی تەندروستی و ئایینی ڤێتێرنەریدا سەردەبڕدرێن.
مانگی شوباتی ئەم ساڵ، خواردنگەیەک لە شاری سنەی رۆژهەڵاتی کوردستان، بەهۆی ئەوەی ئەسپی سەربڕیبوو و گۆشتەکەی فڕۆشتبوو، لەلایەن تیمەکانی بەڕێوەبەرایەتیی گشتیی دەزگەی چاودێریی بازار و سزادانی ئەو پارێزگایەوە داخرا و خاوەنەکەی دەستگیرکرا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ