رووداو دیجیتاڵ
کۆمەڵی دادگەریی کوردستان ئامادەکارییەکانی بۆ بەستنی کۆنگرەی پێنجەمی دەستپێکردووە. بەرپرسی مەکتەبی هەڵبژاردن و ئاماری حیزبەکە دەڵێت، نیوەی ئامادەکارییە سەرەتاییەکان تەواوکراون، هەرکاتێکیش لیژنەی ئامادەکاری کارەکانیان تەواوکرد، رۆژی بەستنی کۆنگرەکە دیاری دەکەن.
رۆژی سێشەممە، 1ـی نیسان، بێستوون حەمەساڵح، بەرپرسی مەکتەبی هەڵبژاردن و ئاماری کۆمەڵی دادگەری بە تۆڕی میدیایی رووداوی راگەیاند، سەرقاڵی ئامادەکارین بۆ بەستنی کۆنگرە، لەم مانگەدا و نیوەی ئامادەکارییە سەرەتاییەکان تەواوکراون. پڕۆژەی بەستنی کۆنگرەکەش لەلایەن لیژنەیەکی تایبەتەوە ئامادەکراوە و چاوەڕوانن ئەم هەفتەیە یان هەفتەی داهاتوو ئەنجوومەنی سەرکردایەتی پڕۆژەکە پەسند بکات، بۆ ئەوەی لیژنەی ئامادەکاری کۆنگرە دەست بە کارەکانیان بکەن.
بێستوون حەمەساڵح گوتی، "لەو کۆنگرەیەدا گۆڕانکاری لە هەیکەلی حیزب، پەیڕەوی نێوخۆی حیزبەکەمان و ژمارەی ئۆرگانەکاندا دەکەین، ئەندامانی ئەنجوومەنی سەرکردایەتی و سەرۆکیش هەڵدەبژێردرێن."
بە گوتەی بەرپرسی مەکتەبی هەڵبژاردن و ئاماری کۆمەڵ، لیژنەی ئامادەکاری کۆنگرە لە 7 کەس پێکدێن، لە کۆنگرەکەدا هیچکام لە ئەندامانی لیژنەی ئامادەکاریی ناتوانن خۆیان بۆ ئەنجوومەنی سەرکردایەتیی حیزب بەربژێر بکەن.
بێستوون حەمەساڵح گوتی: "هەرکاتێک لیژنەی ئامادەکاری کارەکانیان تەواوکرد، ئەنجوومەنی سەرکردایەتی ئاگادار دەکەنەوە، ئەوانیش رۆژ و شوێنی بەستنی کۆنگرە دیاری دەکەن، کە بە ئەگەری زۆرەوە هەر لەم مانگەدا دەبێت."
کۆمەڵی دادگەریی کوردستان، لە ئایاری 2001 دامەزراوە، تاوەکو ئێستا چوار کۆنگرەی کردووە.
دوایین کۆنگرەی حیزبەکە لە شوباتی 2021 بوو، لەو کۆنگرەیەدا ناوی حیزبەکە لە کۆمەڵی ئیسلامیی کوردستانەوە، گۆڕدرا بۆ کۆمەڵی دادگەریی کوردستان، هەروەها عەلی باپیر، کە لە سەرەتای دامەزراندنی کۆمەڵەوە، کەسی یەکەمی حیزبەکەیە، پۆستەکەی لە ئەمیرەوە گۆڕدرا بۆ سەرۆک.
کۆمەڵی دادگەریی کوردستان لە پەرلەمانی عێراق یەک نوێنەری هەیە، لە دوایین هەڵبژاردنی پەرلەمانی کوردستانیش کە لە ئۆکتۆبەری 2024 کرا، تەنیا سێ کورسی بەدەستهێنا، بەڵام بڕیاری دا نوێنەرەکانی نەنێرێت بۆ پەرلەمان بە پاساوی ئەوەی لە هەڵبژاردنەکەدا "ساختەکاری" کراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ