رووداو دیجیتاڵ
بەڕێوەبەری ئاوی مهاباد لە پارێزگای ورمێی رۆژهەڵاتی کوردستان رایگەیاند، لە هەفتەیەکدا زیاتر لە 40 هەزار گەشتیار سەردانی بەنداوەکەیان کردووە.
رۆژی سێشەممە، 1ـی نیسانی 2025، خالید رەحمانی، بەڕێوەبەری ئاوی مهاباد رایگەیاند، "ئەو کەسانە لە رۆژی 23ـی ئادارەوە تاوەکو 30ـی ئادار واتە لە ماوەی هەفتەیەکدا سەردانی بەنداوی مهابادیان کردووە."
رەحمانی گوتی، زیاترین گەشتیار کە سەردانی بەنداوی مهابادیان کردووە، لە رۆژی هەینی، 28ی ئاداری 2025 بووە، کە زیاتر لە 10 هەزار گەشتیار بووە.
بە گوتەی رەحمانی، پار لە ماوەی 10 رۆژی یەکەمی نەورۆزدا، 41 هەزار کەس سەردانی بەنداوی مهابادیان کردبوو.
ساڵانە لە پشووی نەورۆزدا رێگەی سەر بەنداوی مهاباد کە بە تاجی بەنداو ناسراوە دەکرێتەوە و خەڵکی شارەکە و گەشتیاران دەتوانن هاتووچۆی پێدا بکەن.
لە پشووی نەورۆزدا گەشتیارێکی زۆر لە ناوچە جیاوازەکانی ئێرانەوە سەردانی رۆژهەڵاتی کوردستان، بەتایبەتی شارە سنوورییەکان دەکەن.
رۆژی 26ـی ئاداری 2025، مەجید رەستگاری، بەڕێوەبەری بەڕێوەبەرایەتیی ئاوی پارێزگای ورمێ رایگەیاند، بەپێی ئەو پلانەی لە بەڕێوەبەرایەتیی ئاوی پارێزگاکە دانراوە، هەر سێ بەنداوی مهاباد، ورمێ و ئاغچای لە چوارەم رۆژی نەورۆزەوە تاوەکو دەیەم رۆژی جەژن بەڕووی گەشتیاراندا کراوە دەبن.
لە پارێزگای ورمێی رۆژهەڵاتی کوردستان 16 بەنداو هەن و ساڵی رابردوو 62 هەزار کەس سەردانی کردوون.
بەنداوی مهاباد دەکەوێتە رۆژئاوای شارەکە و تەنیا یەک کیلۆمەتر لە ناوەندی شارەکە دوورە، توانای گڵدانەوەی 197 ملیۆن مەتر سێجا ئاوی هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ