رووداو دیجیتاڵ
دەزگای خێرخوازیی بارزانی رایگەیاند، زیاتر لە 395 هەزار خێزانی زیانلێکەوتووی بوومەلەرزە لە هاوکارییەکانیان سوودمەندبوون؛ ئەندامێکی دەستەی کارگێڕی دەزگاکە دەڵێت، رۆژانە بەربانگ دەدەنە 7 هەزار کەس لە باکووری کوردستان و تورکیا؛ لە عەفرینیش رۆژانە نان دەدەنە زیاتر لە 3 هەزار و 700 خێزان.
بەگوێرەی نوێترین ئاماری دەزگای خێرخوازیی بارزانی، تائێستا 395 هەزار و 991 خێزان لە هاوکارییە مرۆییەکانی دەزگاکە سوودمەندبوون؛ زۆرینەیان لە مەرەش بوون لە باکووری کوردستان کە 119 هەزار و 627 خێزانن. هەروەها لە سنووری عەفرین لە رۆژئاوای کوردستان 73 هەزار و 548 خێزان لە هاوکارییەکانی دەزگاکە سوودمەند بوون.
رۆژی شەممە 1ـی نیسانی 2023، رەواج حاجی، ئەندامی دەستەی کارگێڕیی دەزگای خێرخوازیی بارزانی بە تۆڕی میدیایی رووداوی گوت: "هاوکارییەکانمان بۆ زیانلێکەتووانی بوومەلەرزە بەردەوامن؛ لەم مانگەدا رۆژانە بەربانگ بۆ 3 هەزار کەس لە مەرەش و 2 هەزار کەس لە ئامەد لە باکووری کوردستان ئامادە دەکەین. هەروەها لە شاری هاتای تورکیا رۆژانە بەربانگ و پاشیڤ بۆ دوو هەزار کەس ئامادە دەکەین."
لەبارەی هاوکارییەکانیان بۆ رۆژئاوای کوردستان، رەواج حاجی کە هاوکات بەرپرسی دۆسییەی سووریایە لە دەزگاکە گوتی، لە عەفرین رۆژانە 3 هەزار و 710 خێزان نانیان پێدەدرێت و هەر خێزانێک 12 نان وەردەگرن. گوتیشی: "لە گوندەکانی سنوورەکەش هاوکارییەکانمان بەردەوامن؛ ئەمڕۆ شەممە لە شارۆچکەی شەرا هاوکاریی دەدەینە 700 خێزان کە بەتانی، دۆشەک، جلوبەرگ و خۆراکن."
هاوکارییەکانی دەزگای خێرخوازیی بارزانی بۆ باکوور و رۆژئاوای کوردستان بریتین لەمانە:
- ژەمە خۆراکی گەرم
- بەتانی، دۆشەک و سەرین
- ئاوی خواردنەوە
- ژەمە خۆراکی وشک
- ژەمە خۆراکی خێرا
- هاوکاریی پزیشکی
- جلوبەرگی جۆراوجۆر
- خێوەت
- پارەی کاش
- پاکێجی منداڵان و شیری منداڵان
- خەڵووز
- پێویستیی نێوماڵ
- ئامێری بیناسازی
ئەو شوێنانەی هاوکارییەکانیان پێگەیشتووە:
- مەرەش
- سەمسوور
- دیلۆک
- رووها
- ئامەد
- مەلەتی
- عەفرین
- سلۆپی
- نوسێبین
- ئەدەنە
- هاتای
رۆژی 6ـی شوباتی 2023، بوومەلەرزەیەکی بەهێز لە باکووری کوردستان روویدا کە کاریگەریی لەسەر تورکیا، رۆژئاوای کوردستان و سووریاش هەبوو؛ بوومەلەرزەکە بووە هۆی گیانلەدەستدانی زیاتر لە 55 هەزار کەس لە سەرجەم ناوچە زیانلێکەوتووەکان و برینداربوونی سەروو 100 هەزار کەس.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ