118 گوند لە دەڤەری برادۆست بەهۆی شەڕی پەکەکە و تورکیا چۆڵکراون

 

بە بەردەوامی دەنگی تەقەی تێدا دەبیسترێت، سوپای تورکیا تۆپباران و تەقە لە بناری چیاکان دەکات. خەڵکی لە ترس و دڵەڕاوکێدان، قەدەری خۆیان داوەتە دەست خوا و لەنێو ئاگر و ئاسندا رۆژ و شەو دەکەنەوە.

 

حەتەم قادر، دانیشتوویەکی گوندی لێلکانە و بە تۆڕی میدیایی رووداوی گوت، "هیچکامیان رەچاوی ژیان و گوزەرانی ئێمە ناکەن، بەردەوام تەقە و شەڕە، ئەوە منیش بەرگەم گرت، ژن و منداڵ دەترسن و ناتوانن لێرە بمێننەوە."

 

دوای شەڕ و پێکدادان، سه‌ربازانی لیوای سێی پیاده‌ی سه‌ر به ‌فه‌رمانده‌ی فیرقه‌ی 34ـی سنوورپارێزی تورکیا، بۆ ماوەی دوو کاژێر ئۆپەراسیۆنی سەربازییان لە گوندەکە ئەنجامدا.

 

حاجی فازل، گوندنشینێکی دیکەیە و باس لەوە دەکات، "شەڕی پەکەکە ئەوە بوو، دوو سێ پەکەکە هاتن بە ئارپێجی و میلان لە چیا دێڵی دا، دواتر تورکیا دەستی بە تۆپباران و تەقە کرد و دواتر گوند پڕ لە سەربازیی تورکیا بوون، هاتن پێیان گوتین دەبێت ئاگادار بن پەکەکە نەیەتە ناو گوند، گوتمان ئێمە بێدەسەڵاتین و ناتوانین رێگریی لە کەس بکەین."

 

لە گوندی خەلیفان، بەهەمانشێوەی لێلکان بەردەوام دەنگی تەقەی تێدا دەبیسترێت. ئۆپەراسیۆنی سەربازیی تورکیا لەو گوندەش ئەنجامدرا. جەلال عوزێر، موختاری گوندەکەیە و پێیان گوتووە، گەریلای پەکەکە لە گوندەکەیان ببینن، بۆردوومان و تۆپبارانی دەکەن.

  

جەلال عوزێر، موختاری گوندی خەلیفان بە رووداوی گوت، "بەیانی زوو بوو سەربازی تورکیا بانگیانکردین و کۆیان کردینەوە لە گوند، گوتیان پەکەکە لێرە هەن و دەگەڕێین، زۆر گەڕان و هیچیان نەبینییەوە و پێیان گوتین، پەکەکە نزیک ئاوەدانی نەکەونەوە با هیچ کەسێک لە گوند تووشی زیان نەبێت، چونکە ئێمە لێیان دەدەین."

 

رووبەری برادۆست هەزار و 617 کیلۆمەتری دووجایە. 92 کیلۆمەتر سنووری لە گەڵ باکوور و رۆژهەڵاتی کوردستان هەیە. لە مانگی ئاداری ساڵی 2018 سوپای تورکیا بە قوڵایی 30 کیلۆمەتر و بە پانتایی 45 کیلۆمەتر هاتووەتە نێوخاکی باشووری کوردستان.

 

11 قەڵای سەربازی لەو رووبەرەدا دروستکردوون. لە کۆی 264 گوند، نائارامی ناوچەکە وایکردووە 118 گوند چۆڵبکرێن. تاوەکو دێت سنووری گوندەکان بچووکتر دەبێتەوە و ناتوانن ئاژەڵە ماڵییەکانیشیان لە ئاوەدانی دوور بخەنەوە.

 

شاهین برادۆستی، ئاژەڵدارە و دەڵێت، "ئەوەتا ئاژەڵەکانم لە ناو گوندن و سنوورمان هێندە بچووک بووەتەوە ناتوانین بڕۆینە نێو پاوان و کوێستانی گوندەکەمان. بۆ هەرلایێک بچین یان پەکەکەیە یان سەربازی تورکیا."

 

ئەو لووتکە چیایانەی تورکیا لێی جێگیر بووە دەڕواننە تەواوی دەڤەری برادۆست، لە گوندی ماوانی باکووری کوردستانەوە رێگەی سەربازی لێداوە و تەواوی قەلا سەربازییەکانی بەیەک بەستووەتەوە و لە سەر چیای دێڵدا فڕۆکەخانەشی دروستکردووە.