رووداو دیجیتاڵ
22 پرۆژە بۆ گوندەکانی خازر، حەسەن شام، زوممار و رەبیعە بە گوژمەی نزیکەی 20 ملیار دینار جێبەجێ دەکرێن. پرۆژەکان لەلایەن ئەنجوومەنی پارێزگای نەینەواوە پەسندکراون.
ئەحمەد دووبەردانی، ئەندامی ئەنجوومەنی پارێزگای نەینەوا، ئەمڕۆ (شەممە، 01-02-2025) بە تۆڕی میدیایی رووداوی راگەیاند، پڕۆژەکان خزمەتگوزارین و بە گوژمەی 19 ملیار و 892 ملیۆن و 266 هەزار دینار جێبەجێ دەکرێن.
ئەندامەکەی ئەنجوومەنی پارێزگای نەینەوا ئاماژەی بەوەکرد، پڕۆژەکان بریتین لە دروستکردن، قیرتاوکردن و کۆنکرێتکردنی رێگەوبان و شەقام، چاککردنی تۆڕی کارەبا و ئاو، دروستکردنی قوتابخانە و بنکەی تەندروستی.
لیستی ئەو 22 پڕۆژەیە بە دەست تۆڕی میدیایی رووداو گەیشتووە، کە دیارترینییان بریتین لە:
- کۆنکرێتکردن و قیرتاوکردنی رێگەی گوندەکانی خازر، حەسەن شام، مەنکوبە، عەلیاوە، تەل ئەسودەی گەورە، تەل ئەسوەدی بچووک، چەمەکووڕ بە گوژمەی 1,704,553,000 دینار.
- دروستکردنەوەی قوتابخانەیەکی 18 پۆلیی قوتابخانەی ناوەندیی حەسەن شامی تێکەڵ بە گوژمەی 1,461,524,380 دینار.
- دروستکردنەوەی بنکەی سەرەکیی تەندروستی لە گوندی حەسەن شام بە گوژمەی 2,604,414,280 دینار.
- کۆنکرێتکردنی رێگەی سەرەکیی گوندی تورکماز لە قەزای حەمدانییە بە گوژمەی 1,685,800,000 دینار.
- دروستکردن و کۆنکرێتکردنی رێگەی کۆمەڵگە و گوندی بەردییە لە ناحیەی زوممار بە گوژمەی 1,069,500,000 دینار.
- کۆنکرێتکردنی رێگەی گوندەکانی قەسرۆ، شریکان، سەیف دینان، کۆمەڵگەی بەرزان، رێگەی گوندی خرابە عاشق، گوندی جەسە، جەزیرە جەزرونییە، عەین حلوە لە سنووری ناحیەی زوممار.
- جێبەجێکردنی پرۆژەی ئاو بە مەبەستی گەیاندنی ئاو بۆ گوندی جزرونییە، چاککردنەوەی وێستگە و هێڵەکانی گواستنەوەی ئاو بۆ ناحیەی زوممار و گوندەکانی.
- چاککردنەوەی تۆڕی کارەبای گوندەکانی حەسەن شام، سیف دینان، تورکمان، شیرکان، زنگل لە سنووری قەزای حەمدانییە.
- چاککردنەوەی تۆڕی کارەبای گوندەکانی سعودیە، مەحمودییە، سفەیە، جەدریە و قاهیرە لە رەبیعە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ