رووداو دیجیتاڵ
رێکخستنەکانی دەم پارتی لە 51 پارێزگای تورکیا و باکووری کوردستان چالاکیی جۆراوجۆر رێکدەخەن.
بە بڕیاری ئەنجوومەنی سەرکردایەتیی دەم پارتی، رێکخستنەکانی ئەو پارتە لە ئەمڕۆ 1ـی شوباتی 2025ەوە تاوەکو 10ـی ئەم مانگە، لە 51 پارێزگای باکووری کوردستان و تورکیا لەژێر دروشمی "ئاشتەوایی کۆمەڵایەتی و دیداری ئازادی" چالاکیی جۆراوجۆر رێکدەخەن.
ئەم بڕیارەی ئەنجوومەنی سەرکردایەتیی دەم پارتی دوای سەردانی دووەمی شاندی پارتەکە دێت بۆ دوورگەی ئیمراڵی و دیداری عەبدوڵڵا ئۆجەلان.
ئامانج لە گردبوونەوە جەماوەری و چالاکییە سیاسییەکان جەختکردنەوەیە لە پێویستیی چارەسەرکردنی پرسی کورد. لە چالاکییەکاندا هەریەک لە تولای هاتیمئۆغوڵڵاری و تونجەر باکرهان، هاوسەرۆکانی دەم پارتی و پەرلەمانتارەکانیان بەشدار دەبن.
بەرنامە 10 رۆژییەکە بەم شێوەیە دەبێت:
رۆژی 1ـی شوبات: لە دیلۆک، کیلیس، ئاگری، بورسا، بیلەجیک، تەکیرداغ، ئەدیرنە و کرکلارئێلی
رۆژی 2ـی شوبات: لە وان، جۆلەمێرگ، ئیدیر، ئێلیهـ، مەرەش، مەڵەتێ، ئایدن و قەیسەری
رۆژی 3ـی شوبات: لە سێرت، سەمسوور، بەدلیس، ئەردەخان، چاناکالە، ئیستەنبووڵ، کۆجائێلی، ساکاریا، دوزجە، بۆڵو، دەنیزلی، مەرسین و کۆنیا
رۆژی 4ـی شوبات: لە مووش، ئەرزەڕۆم، مێردین، ئەنقەرە، ئەسکیشەهیر، موغڵا، ئەنتاڵیا، ئیسپارتا، بوردور و یالۆڤا
رۆژی 5ـی شوبات: لە ئامەد، شرنەخ و ئیستەنبووڵ
رۆژی 6ـی شوبات: لە ئیستەنبووڵ، دێرسم، خارپێت و ئەرزینگان
رۆژی 7ـی شوبات: لە پارێزگاکانی سەر کەناری دەریای رەش، رووها و چەولیگ
رۆژی 8ـی شوبات: لە ئادانا
رۆژی 9ـی شوبات: لە مێردین
رۆژی 10ـی شوبات: لە ئیزمیر
شاندی دەم پارتی کە لە سری سورەییا ئۆندەر، بریکاری سەرۆکی فراکسیۆنی دەم پارتی و پەروین بوڵدان، پەرلەمانتاری دەم پارتی لە بازنەی وان پێکهاتبوون، لە رۆژانی 28ـی کانوونی یەکەمی 2024 و 22ـی کانوونی دووەمی 2025 بە نوێنەرایەتیی دەم پارتی سەردانی ئیمرالیان کرد و لەگەڵ عەبدوڵڵا ئۆجەلان کۆبوونەوە.
دوای یەکەم کۆبوونەوە، شاندەکەی دەم پارتی پەیامی عەبدوڵڵا ئۆجەلان، رێبەری زیندانیکراوی پەکەکەی لەبارەی پرۆسەی ئاشتی گەیاندە لایەنە سیاسییەکان و بۆچوونی ئەوانیشی وەرگرت. لە دیداری دووەمیشدا، بۆچوونی لایەنە سیاسییەکانیان گەیاندە ئۆجەلان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ