میدیای ئێران: کەرەستەکانی هێرشەکەی ئیسفەهان لە هەرێمی کوردستانەوە هێنراون

 

ماڵپەڕی نوورنیوز، کە سەر بە ئەنجوومەنی باڵای ئاسایشی نیشتمانیی ئێرانە، ئەمڕۆ چوارشەممە 01-02-2023 رایگەیاند، لێکۆڵینەوەکان باس لەوە دەکەن پارچەدرۆنی بەجێماو و تەقەمەنییەکانی هێرشەکەی سەر بنکەی بەرهەمهێنانی چەک و تەقەمەنیی ئیسفەهان، "لە لایەن هێزە دژبەرەکانی کۆماری ئیسلامییەوە کە نیشتەجێی هەرێمی کوردستانن، بردراوەتە نێو ئێران و بۆ ئەو هێرشە سوودی لێوەرگیراوە."

 

بەپێی ئەو راگەیێندراوە، پارچەی ئەو درۆنانە و تەقەمەنییەکان، "دوای ئەوەی لەلایەن هێزە دژبەرەکانی کۆماری ئیسلامییەوە بردراونەتە نێو ئێران"، لە کارگەیەکی نێو ئەو وڵاتە لەلایەن کەسانی راهێنراوەوە کۆکراونەتەوە و بۆ هێرشەکە سوودی لێوەرگیراوە. 

 

راگەیێندراوەکە باس لەوەش دەکات، "ئەو پارچە درۆن و تەقەمەنییانە لەسەر داوای دەزگایەکی سیخوڕی یەکێک لەو وڵاتانی دژبەری کۆماری ئیسلامی و لە سنوورەکانی رۆژئاوای باکووری ئێرانەوە، بردراونەتە نێو ئەو وڵاتە." 

 

رەزا کەعبی، ئەندامی رێبەریی کۆمەڵەی شۆڕشگێڕی زەحمەتکێشانی کوردستانی ئێران، "بە تووندی" رەتیکردەوە پەیوەندییان بە هێرشەکەی ئیسفەهانەوە هەبووبێت و دەڵێت: "لە دوور و نزیکەوە ئاگامان لەوە نییە لە باشووری کوردستانەوە کەلوپەلی درۆن بۆ ئێران چووبێت."

 

ماڵپەڕە ئێرانییەکە باسی لەوە کردووە: حکومەتی ئێران چەندین جار داوای لە حکومەتی عێراق و هەرێمی کوردستان کردووە رێگە لە چالاکیی هێزە دژبەرەکانی کۆماری ئیسلامی ئێران بگرێت، بەڵام چالاکییەکانی ئەو هێزانە دەرخەری ئەوەن کە عێراق و هەرێمی کوردستان پابەندی بەڵێنەکانی خۆیان بۆ جێبەجێکردنی یاسا نێودەوڵەتییەکان لەو بارەوە نابن.

 

رەزا کەعبی دەڵێت: "ئەو پڕوپاگەندەیە شتێکی نوێ نییە، بەڵام لەم 5-6 مانگەدا جەختی زیاتری لەسەر کراوەتەوە هەمووشی بۆ ئەوەیە بوار بۆ تیرۆر و هێرشکردنە سەر حیزبەکانی رۆژهەڵاتی کوردستان و هەرێمی کوردستان بڕەخسێنێت."

 

شەوی پێنجشەممە لەسەر هەینیی رابردوو بە سێ درۆن هێرشکرایەسەر بنکەیەکی بەرهەمهێنانی چەک و تەقەمەنی لە ئیسفەهان، دواتر بەرپرسانی ئێران هێرشەکەیان پشتڕاستکردەوە و گوتیان، هێرشەکە بێ زیان بووە.

 

لەو هەواڵەی ماڵپەڕی نوورنیوزدا ئاماژە بۆ چوار پێشمەرگەی کۆمەڵە کراوە کە هاوینی ساڵی رابردوو لە ناوچەی ورمێدا دەستگیرکران و ئێستا چارەنووسیان ناڕوونە. 

 

رەزا کەعبی لەو بارەیەوە دەڵێت: "ئەم هەواڵەی نوورنیوز مەترسی لەسەر گیانی ئەوانیش دروست دەکات."