راوێژکاری وەزیری بەرگریی ئۆکراینا بۆ رووداو: رووسیا بە رەوە درۆنی ئێرانی دەنێرێت

 

 

یوری ساک، راوێژکاری وەزیری بەرگریی ئۆکراینا لە هەڤپەیڤینێکدا لەگەڵ رووداو باسی دوایین پێشهاتەکانی بەرەکانی جەنگ دەکات و دەڵێت، "ئێستا سەختترین بەرەی شەڕ لە دەوروبەری شاری باخمووتە." هۆشدارییش دەداتە بێلاڕووس لە بەکارهێنانی خاکەکەی لەلایەن رووسیاوە بۆ سەر ئۆکراینا یان هێرشی راستەوخۆ لەلایەن بێلاڕووسەوە و دەڵێت، "بە تەواوەتی هۆشدارییان دەدەینێ کە باشترە پەلاماری وڵاتەکەمان نەدەن، چونکە دوایی زیان دەکەن."

 

ئێران بەوە تۆمەتبار دەکرێت درۆنی شەڕکەری بە رووسیا فرۆشتبێت، بە گوتەی یوری ساک، ئەوان بەڵگەیان هەیە کە بە درۆنی ئێرانی هێرشیان کراوەتەسەر و دەڵێت، "بەڵێ رووسیا درۆنی ئێرانی بەدەست دەهێنێت و دژی شارە سڤیلەکانی ئۆکراینا و وێستگەکانی کارەبا بەکاریان دەهێنێت." دەشڵێت، "رووسیا بە رەوە دەیاننێرێت و زۆر زۆرن. درۆنە ئێرانییەکان لە یەک کاتدا بە ژمارەیەکی زۆر دەنێردرێن و هەندێک جار دەتوانن بەسەر هێزی بەرگریماندا زاڵ ببن."

 

 

یوری ساک: سوپاس بۆ میواندارییەکەتان. ئێستا سەختترین بەرەی شەڕ لە دەوروبەری شاری باخمووتە. ئەمە شارێکە لە هەرێمی دۆنێتسک کە زیاتر لە مانگێکە شوێنی مانەوەی ژمارەیەکی زۆر لە هێزە دڕندەکانی رووسیایە، بەڵام سوپای ئۆکراینا هێشتا شارەکەی بەدەستەوەیە. ئەمڕۆ سەرەڕای ئەوەی هەندێک جار رووسیا بانگەشەی ئەوە دەکات و دەڵێت، ئەو شارەی گرتووە، بەڵام سەرۆک زیلینسکی سەردانی سەربازە ئۆکراینییەکانی کرد لە باخمووت. هەر لەوێیش کۆنگرەیەکی رۆژنامەڤانیی ساز کرد. جا بە دڵنیاییەوە ئێستا شاری باخمووت چەقی پێکدادانی شەڕە، بەڵام لە هەمان کاتیشدا شەڕ لە بەرەکانی دیکەی پێشەوەیش هەر بەردەوامە. ئەمەیش بەرەیەکی شەڕی دوورودرێژە کە 2500 کیلۆمەترە. هەندێک شوێن شەڕ تێیدا چڕە و هەندێک شوێنیش کەمترە. بە شێوەیەکی گشتی ئەمە شەڕێکی زۆر سەخت و چڕە.

 

 

یوری ساک: بە دڵنیاییەوە کاتێک پلانی چالاکیی جێبەجێکاریی سەربازی دادەنێیت دۆخی کەشوهەوا هۆکارێکی گرنگە و، بە دڵنیاییەوە ستافە گشتییەکەمان و هێزەکانمان زۆر باش ئاگایان لەمەیە. بەڵام ئەوەی کە دەبێت بیرمان بێت ئەوەیە کە سوپای ئۆکراینا، وەکو دەزانن، ئەم شەڕە لە رۆژێک لە رۆژەکانی ئەمساڵدا سەری هەڵنەداوە، ئەمە شەڕێکە کە ئێمە لە ساڵی 2014وە تێیداین. بە دڵنیاییەوە سوپای ئۆکراینا وەکو ئەوەی بەشێکە لە شەڕەکە، لە جێبەجێکردنی چالاکیی سەربازیدا لە بارودۆخە سەختەکاندا ئەزموونی هەیە؛ بەڵام لەم کاتەدا ئەگەر ئەوە لە بەرچاو بگریت کە لە ئۆکراینا پلەی گەرما زیاتر بەرەو ساردبوون دەچێت، ئەوا دۆخی کەش و هەوا بە شێوەیەکی رێژەیی سووک بووە. بۆیە هەر وەکو ئەوەی بەڕێز رێزنیکۆڤ، وەزیری بەرگریمان گوتی، ئێستا ئەوە سەختە کە ئامێرە سەربازییە جووڵاوەکان هاتوچۆ بکەن. بۆیە لەم ساتەدا چالاکیی سەربازی بە شێوەیەکی سەرەکی لە رێگەی تانک و ئامێری گواستنەوەی هەڵگرتنی چەکەوە جێبەجێ دەکرێت، بەڵام تاوەکو پلەی گەرما نزمتر بێت، ئەوا سوپای ئۆکراینا لە دۆخێکی باشتردا دەبێت بۆئەوەی بەردەوام بێت لە هێرشی پێچەوانەی بەهێزتر، چونکە ئامانجی ئێمە ئەوەیە کە بە تەواوەتی خاکی ئۆدێسا ئازاد بکەین.

 

 

یوری ساک: بێلاڕووس ناڕاستەوخۆ هاتووەتە ناو ئەم شەڕەوە، چونکە لە خاکی بێلاڕووسەوە، هەر لە رۆژانی سەرەتای ئەم شەڕەوە، پەلامارێکی فراوان لە خاکی بێلاڕووسەوە دەستی پێکرد. هەروەها ئاسمانی بێلاڕووس بۆ هێرشی ئاسمانیی ستراتیجی وەک پشتیوانییەک بۆ هێزەکانیان بۆ سەر ئۆکراینا بەکاردەهێنرێت. هەروەها ژمارەیەکی زۆر سەربازی رووسی لە بێلاڕووس مەشقی سەربازییان پێدەکرێت. بۆیە بێلاڕووس بە ناڕاستەوخۆ هاوپەیمانی رووسیایە و هەروەها بەرپرسیارە لەو تاوانی شەڕ و تووندوتیژییەی لە خاکی ئۆکراینادا دەکرێت. هەروەها لەبارەی ئەو خاکە داگیرکراوە و ئەو پرسیارەوە کە ئایا بێلاڕووس بە سوپای خۆیەوە دێتە ناو ئەم شەڕەوە، ئەمە هێشتا هەر پرسیارە و وەڵامی نەدراوەتەوە. بڕیاردان لە ئەنجامەکانی سەردانەکەی دوێنێی سەرکردەکانی کرملین بۆ بێلاڕووس بەلای ئێمەوە وا دەردەکەوێت کە نەگەیشتوونەتە هیچ ئەنجامێک، چونکە بەڕێز لوکاشینکۆ، سەرۆکی بێلاڕووس هەوڵدەدات خۆی لەوە بەدووربگرێت سوپاکەی رابکێشرێتە ناو ئەم شەڕەوە، لەبەر ئەوەی ئەوان دەزانن کە ئەگەر بەشداری بکەن لە داگیرکاریی زەوینیی ئۆکراینا، ئەوا زۆر بە خراپی ئازاریان پێدەگات، چونکە سوپای ئۆکراینا بەرەیەکی شەڕی زۆر چالاکی بە درێژایی سنووری بێلاڕووس دروستکردووە. بۆیە ئێمە بە تەواوەتی هۆشدارییان دەدەینێ کە باشترە پەلاماری وڵاتەکەمان نەدەن، چونکە دوایی زیان دەکەن.

 

 

یوری ساک: بە دڵنیاییەوە ئێمە سەرچاوەی مرۆیی سەربازیی پێویستمان هەیە، هەروەها کەلوپەلی سەربازیی پێویستمان هەیە. هەروەها ئێمە بەردەوام لەلایەن هاوبەشە نێودەوڵەتییەکانمانەوە هاوکاریمان پێدەگات. بۆیە لە بنەمادا ئەمە هەر ئەوەیە کە گوتمان سوپای ئۆکراینا توانای هەیە و ئامادەیە بۆ رووبەڕووبوونەوە ئەگەر ئەوان بڕیار بدەن لە بەرەی بێلاڕووسەوە وڵاتەکەمان داگیر بکەن. ئاگامان لەم خۆخستنە مەترسییەوە هەیە و ئێمە بۆ ئەم مەترسییە ئامادەین.

 

 

یوری ساک: نەخێر، ئێمە هیچ زانیارییەکمان لەبارەی سەردانەکەیەوە نەبوو. وەکو لە سەرەتاوە گوتم، ئەمڕۆ بەڕێز زیلینسکی، سەرۆکمان سەردانی بەرەکانی پێشەوەی شەڕی کرد و چووە شاری باخمووت و چاوی بە سوپای ئۆکراینا کەوت و پشتیوانیی سوپای ئۆکراینای کرد. جا ئەمە یەکەمجار نییە کە سەرۆکەکەمان سەردانی بەرەکانی پێشەوەی شەڕ دەکات. لە کاتێکدا نەمانبینیوە کە سەرکردەکانی رووسیا سەردانی بەرەکانی پێشەوەی شەڕ بکەن.

 

 

یوری ساک: بە دڵنیاییەوە. هەر وەکو ئەوەی بەڕێز زیلینسکی سەرۆکمان گوتی، رووسیا بە ئاشکرا درۆنی تازە هاتووی ئێرانی بەدەست گەیشتووە کە نزیکەی 250 دانەن و، بۆ نموونە دوێنێ بە درۆنی ئێرانی هێرشیان کردە سەر کیێڤ و هەندێک شاری دیکەی ئۆکراینا. هەر ئەو درۆنانە هێرشیان کردە سەر بنکە سەربازییەکان و تەنانەت وێستگەی کارەبا کە لە ئەنجامی ئەوەدا ملیۆنان کەس بێ ‌کارەبا بوون. ئێستا ئێمە بەرەبەرە هێزی ئاسمانیمان باشتر دەکەین و دەزانین چۆن بەسەر ئەو درۆنە ئێرانییانەدا زاڵ ببین. بۆیە وەڵامی پرسیارەکەی تۆ ئەوەیە کە بەڵێ رووسیا درۆنی ئێرانی بە دەست دەهێنێت و دژی شارە سڤیلەکانی ئۆکراینا و وێستگەکانی کارەبا بە کاریان دەهێنێت.

 

 

یوری ساک: بەڵێ، سەیرکە... دوێنێ، ئەگەر هەڵەم نەکردبێت، زیاتر لە 30 درۆنی ئێرانی هاتنە سەر کیێڤ و زیاتر لە 26ـیان لەلایەن هێزی بەرگریمانەوە خرانە خوارەوە. بەداخەوە هەندێکیان هێشتا ئامانجەکانیان دەپێکن. رووسیا بە رەوە دەیاننێرێت و زۆر زۆرن. درۆنە ئێرانییەکان لە یەکاتدا بە ژمارەیەکی زۆر دەنێردرێن و هەندێک جار دەتوانن بەسەر هێزی بەرگریماندا زاڵ ببن. بەڵام ئێمە بەردەوام ژمارەیەکی زۆریان لێ دەخەینە خوارەوە. بۆیە رێژەی سەرکەوتنی هێزی بەرگریی ئاسمانیی ئۆکراینا لە زیادبووندایە.

 

 

یوری ساک: دەزانی، خۆی وەک ئەوەی گوتم، ئێمە ژمارەیەکی زۆر لەم درۆنانەمان خستوونەتە خوارەوە و دەستمان بەسەردا گرتوون و هەڵمانوەشاندوونەتەوە. ئەگەر سەیری ناوەوەی ئەم درۆنانە بکەیت، هەندێک جار نووسینی فارسی دەبینیت، بۆیە ئەوە بۆ ئێمە زۆر روونە کە ئەمانە درۆنی ئێرانین و، ئەمەیش زۆر شارەزای نێودەوڵەتییش بینیویانە.