ئیلهام ئەحمەد: لەگەڵ تورکیا لە گفتوگۆداین بۆ راگەیاندنی ئاگربەستێکی هەمیشەیی

 

ئیلهام ئەحمەد، هاوسەرۆکی فەرمانگەی پەیوەندییەکانی دەرەوەی بەڕێوەبەرایەتیی خۆسەری باکوور و رۆژهەڵاتی سووریا لە هەڤپەیڤینێکی تایبەتدا لەگەڵ تۆڕی میدیایی رووداو کە لە بووڵتەنی نیوڕۆژی ئەمڕۆ یەکشەممە 20-04-2025 پەخشکرا، رایگەیاند، ئامادەکاریی بۆ بەستنی کۆنفرانسی هاوبەشی لایەنە سیاسییە کوردییەکان کراوە و لەوانەیە تاوەکو کۆتایی مانگی نیسان ببەسترێت.

 

ئیلهام ئەحمەد باسی لە راگەیێندراوی دەستووری سووریا کرد کە 13ـی ئادارى 2025، لەلایەن ئەحمەد شەرع، سەرۆککۆماری کاتیی سووریا واژۆکرابوو و گوتی، ''ئێمە چاوەڕێ بووین کە لە دەستپێکدا لیژنەیەک پێکبهێنرێت و هەموو لایەنەکان لەخۆبگرێت، بەتایبەتی کورد بەشدار بێت.''

 

هاوسەرۆکی فەرمانگەی پەیوەندییەکانی دەرەوەی بەڕێوەبەرایەتیی خۆسەری باکوور و رۆژهەڵاتی سووریا ئاماژەی بەوە کرد، نە لیژنەی نووسینەوەی دەستوور و نە حکومەتی ئێستای سووریا نوێنەرایەتیی کورد ناکەن، ''ئەوە لە ئاست چاوەڕوانیی ئێمەدا نەبوو. پێویست بوو لیژنەیەک پێکبهێندرێت کە بەپێی ماف، هەر لایەنێک نوێنەری خۆی تێدا هەبووایە، بۆ ئەوەی دەستوورێک بنووسرێتەوە کە چەند ساڵی دیکە ئێمە دووبارە ناچار نەبین بیگۆڕین، بەتایبەتی لەبارەی مافی بنچینەیی نەتەوەیی کۆمەڵگەی سووری و لە سەرووی هەمووانیشەوە مافی کورد.''

 

دەستوورەکە پێنج ساڵ کاری پێدەکرێت. کە تێیدا زمانی عەرەبی بە زمانی فەرمی و ناوی وڵاتەکەش بە کۆماری عەرەبیی سووریا نووسراوە.

 

لە تەواوی دەستوورە کاتییەکەش کە 53 مادەیە، بە هیچ جۆرێک وشەی (کورد) ئاماژەی پێنەکراوە. ئیلهام ئەحمەد جەختی لەوە کردەوە، ''پێویستە دەستوورێک هەبێت کە تێیدا پەروەردە بە زمانی دایک بۆ هەموو نەتەوەکانی سووریا بنەما بێت، نەوەک زمانێک بنچینە بێت و زمانێکی دیکە نا. یان زمانێک فەرمی بێت و ئەوەی دیکە نا.''

 

لەنێو حکومەتی ئێستای سووریادا تەنیا محەممەد تورکۆ، وەزیری پەروەردەی سووریا کوردە. هاوسەرۆکی فەرمانگەی پەیوەندییەکانی دەرەوەی بەڕێوەبەرایەتیی خۆسەری باکوور و رۆژهەڵاتی سووریا پێیوایە، محەممەد تورکۆ نوێنەرایەتیی کورد ناکات و ''وەکو کەس بەشدار بووە. دەبێت گەلی کورد خۆی نوێنەری خۆی دیاری بکات و بینێرێتە نێو حکومەت.''

 

لە بەشێکی دیکەی قسەکانیدا، ئیلهام ئەحمەد باسی لەوە کرد، بەڕێوەبەرایەتیی خۆسەر بەشێک لە بەرهەمی ئەو نەوتەی کە لە رۆژئاوای کوردستان دەردەهێنرێت، دەیداتە حکومەتی سووریا. گوتیشی، ''وەزارەتی نەوت لە شام خەرجیی دەرهێنان و بەرهەمهێنانی نەوتەکە دەداتەوە بەڕێوەبەرایەتیی خۆسەر.''

 

بەگوتەی هاوسەرۆکی فەرمانگەی پەیوەندییەکانی دەرەوەی بەڕێوەبەرایەتیی خۆسەری باکوور و رۆژهەڵاتی سووریا، لەگەڵ حکومەتی سووریا لەسەر بەڕێوەبردنی بەنداوی تشرین رێککەوتوون و ''تاوەکو رادەیەکی باش بەرەوپێشەوە چووە، لە رۆژانی داهاتووشدا لەوانەیە ئامادەکارییەکان تەواو ببن و رابگەیێنرێت.''

 

بەنداوی تشرین لە 22-4-2004 لەلایەن حکومەتی سووریاوە دروستکرا. ئامانجەکەش بەرهەمهێنانی وزەی کارەبا بوو، ئەو بەنداوە دەکەوێتە باشووری کۆبانێ و باکووری رۆژئاوای رەققە و سەر بە پارێزگای حەلەبە. توانای گلدانەوەی 1.9 ملیۆن مەتر سێجا ئاوی هەیە.

 

 

 

ئیلهام ئەحمەد: ماوەیەکی زۆرە دانوستاندن لەنێوان لایەنەکاندا بەردەوامە. لەم رۆژانەی دواییدا دەبووایە کۆنفرانس بەڕێوەبچێت. ئامادەکارییەکانی کۆنفرانس بەردەوامن. ئەو بەڵگەنامەیەی لەسەر داواکارییەکانی کورد و لایەنە کوردییەکان رێککەوتوون و بەپێی ئەو بەڵگەنامەیە لەگەڵ دیمەشق چاوپێکەوتن دەکەن، ئامادەیە. بۆ راگەیاندنیش گفتوگۆ و باس بەردەوامە. ئامادەکاری هەیە کە ئەم رێککەوتنە لە کۆنفرانسێکدا رابگەیێندرێت. من وا بڕوادەکەم کە ئەمەش گەیشتووەتە کاتی کۆتایی. پێویستە ئیدی رۆژی بەڕێوەچوونی کۆنفرانس رابگەیێندرێت و کۆنفرانس بەڕێوەبچێت.

 

 

ئیلهام ئەحمەد: زۆر کەم ماوە. من بڕوام وایە و هیوادارم ئەو خاڵانەی کە گفتوگۆ و باسیان لەسەر دەکرێت چارەسەر بکرێن و پێویستە لەم مانگەدا کۆنفرانس بەڕێوەبچێت.

 

 

ئیلهام ئەحمەد: باشترە ئەوان خۆیان ئەم بابەتە رابگەیێنن. لە هەندێک خاڵدا رێککەوتوون. ئەو خاڵانەی کە رێککەوتوون باشترە لە رێگەی کۆنفرانسێکەوە رابگەیێندرێن. لە چوارچێوەی چارەسەری کێشەی کورد لە سووریا، چارەسەری گشتیی سووریا، لە دەستووردا مافەکانی کورد چی دەبن، مافەکانی هەموو نەتەوەکان چی دەبن؟ چ دەوڵەتێک مافی هەموو نەتەوەکان لە ناو سووریادا دەپارێزێت؟ لەسەر ئەم بنەمایە هەندێک خاڵ هەیە. لەم چوارچێوەیەدا، من پێموایە خۆبەڕێوەبردن داواکاری هەر دوو لایەنە.

 

 

ئیلهام ئەحمەد: لەوانەیە من ئێستا نەتوانم ناوێکی لێ بنێم. لە بەڵگەنامەکەدا خۆیان گوتوویانە کە دەبێت سووریایەکی نا-ناوەندی هەبێت. لەناو ئەم نا-ناوەندێتییەدا مافەکانی کورد، ناسنامەیان، زمانیان چۆن دەبن؟ ئەمانە هەموو خاڵە سەرەکییەکانی رۆژەڤن، کە هەر دوو لایەن لەناو خۆیاندا باسیان کردووە.

 

 

ئیلهام ئەحمەد:  بەڕاستی ئێمە چاوەڕوان بووین کۆمیتەیەک دروست بکرێت، ئەو کۆمیتەیە هەمووان لەخۆبگرێت و تێیدا کوردیش هەبێت. کۆمەڵگەی سووریا کۆمەڵگەیەکی فرەڕەنگە. گەلێک نەتەوەی تێدایە. گەلێک ئایینی تێدایە و هەروەها لە هزریدا هزرێکی نەرمە. بەرامبەر بە هەموو باوەڕەکان، کولتوورەکان و پێکهاتەکان نەرمە. لەبەرئەوەش دەبووایە نوێنەرانی کۆمیتەی ئامادەکاری دەستوور هەمووانی لەخۆبگرتایە.

 

 

ئیلهام ئەحمەد: نا، نوێنەری کوردی تێدا نییە و ئەمە بەپێی داواکاری ئێمە نییە. دەبووایە کۆمیتەیەکی وا دروست بکرایە. دەبوایە هەموو کەسێک بە شێوەیەکی هاوبەش بۆچوونی خۆیان لەسەر دەستوور دەربڕیبا. بۆ ئەوەی چەند ساڵێکی دیکە ناچار نەبین جارێکی دیکە ئەم دەستوورە بگۆڕین، بەتایبەتی مافە بنەڕەتییەکانی کۆمەڵگەی سووریا و بەتایبەتی هی کورد.

 

 

ئیلهام ئەحمەد: دەبێت لە دەستووردا پەروەردە بە زمانی دایک بۆ هەموو نەتەوەکانی سووریا بنەمابێت. نابێت زمانێک بنەمابێت و ئەوی دیکە بنەما نەبێت. زمانێک فەرمی بێت و زمانێکی دیکە فەرمی نەبێت. ئەو زمانانەی لەناو سووریادا هەن، ئەو کولتوورانەی لە ناو سووریادا هەن هەموویان فەرمین. لەو شوێنەی کە لێین، لەو شوێنەی کە تێیدا دەژین فەرمین. دەبێت لە دەستووری سووریادا خاڵێکی وا هەبێت، کە کورد بتوانن بە زمانی خۆیان پەروەردە ببینن، بە زمانی خۆیان بژین. کولتووری خۆیان زیندوو بکەنەوە و بەهێز بکەن. پێویستە پشتگیری بکرێت. دەبێت دەستوور ئەم مافە بدات. لە دەرەوەش لە سیاسەتدا رۆڵ گێڕان، مافەکانی سیاسی، نەتەوەکانی سووریا هەموو بە ئازادی و سەربەستی بتوانن بەشداری سیاسەت بن و ئەم وڵاتە بەڕێوەببەن. نوێنەرەکانیان لە بەڕێوەبەرایەتیی سووریادا هەبن. دەبێت کورد نوێنەرایەتی خۆی لە بەڕێوەبەرایەتیی سووریادا دیاری بکات.

 

 

ئیلهام ئەحمەد:  کوردێک هەیە لە ناو حکومەتی سووریادا. وەزیری پەروەردەی سووریایە. ئەو وەک تاکەکەس بەشداربووە.

 

 

ئیلهام ئەحمەد: دەبێت گەلی کورد خۆی نوێنەری خۆی دیاری بکات و بینێرێتە حکومەت.

 

 

ئیلهام ئەحمەد: وەک کەسێک دیاریکراوە و وەک کەسێک لەوێیە. لەوانەیە هەوڵەکانی و هەڵوێستەکانی بۆ کورد باش بن. ئێمە هیچ بەمە ناڵێین. بۆ ئەوەی ئیرادەی کورد لە بەڕێوەبەرایەتیی سووریادا دیار بێت، دەبێت کورد خۆی نوێنەرەکانی خۆی دیاری بکات.

 

 

ئیلهام ئەحمەد: ئێمە وا بیردەکەینەوە کە دەبێت سووریا، سووریایەکی نا-ناوەندی بێت. ئەم نا-ناوەندیبوونە بەرپرسیارێتی خۆی هەیە، ئەرکەکانی هەیە. ئێمە دەڵێین دەبێت ئەم ئەرکانە فراوان بکرێن. لە بواری ئابووریدا بۆ نموونە دەبێت ئەم هەرێمە خۆی تێربکات. دووەم، لە بواری ئاسایشدا ئاسایشی ناوخۆ، دەبێت ئاسایشی هەرێمی بێت. هەروەها لە مەسەلەکانی زمان و پەروەردەشدا هەرێمی بن. 

 

بەڕێوەبەرایەتییە هەرێمییەکان تەنیا بۆ باکووری رۆژهەڵاتی سووریا نەبن. دەبێت لە هەرێمەکانی دیکەیش هەبن، بەڕاستی بارگرانیی دیمەشقیش سووک دەبێت هەموو شتێک ناوەندی نەبێت.

 

 

ئیلهام ئەحمەد: وا دیارە بۆچوونێکیان هەیە، بەڵام ئەو بۆچوونە شاراوەیە. ئەمە شاراوەیە لە رێگەی راگەیاندنەکانەوە روون نەبووەتەوە. سەرۆکی سووریا ئەحمەد شەرع جارێک لە راگەیاندنێکدا دیاری کرد، کە ئەوان فیدراڵی قبووڵ ناکەن. بەپێی بۆچوونی من ئەمە هێشتا تەواو روون نەبووەتەوە. لەبەرئەوەی لە مەیداندا دەستوورێک هەیە پێویستە ئەوە کۆتایی بێت، یان گۆڕانکاری تێدا بکرێت. ئەم شتەی کە راگەیێندراوە پێشنووسی دەستوورە، دەستووری بنەڕەتی و کۆتایی نییە. گۆڕانکاری دەبێت تێدا بکرێت. دەبێت گفتوگۆی لەسەر بکرێت. 

 

ئەمانە گرنگن بۆ ئەوەش دەبێت کراوە بن تاکو هەم سووریا یەکێتی خۆی پارێزراو بمێنێت و هەم ئارام بێت و بتوانێت بەرەو پێش بچێت و وەک ئێستا نەمێنێت.

 

 

ئیلهام ئەحمەد: من ناتوانم شتێکی دیاریکراو بڵێم، بەڵام بەپێی بەهای رەمزی کە ئەو بەرهەمە پێی دەردەچێت، ئەو خەرجانەی کە لێی خەرج دەکرێن، بەرهەمێک دەدات بە دیمەشق. هەم بۆ ئەوەی بارودۆخی خەڵکی سووریا باش بێت بەتایبەت بۆ خەڵکی سووریا، هەم بۆ ئەوەی بەڕێوەبەرایەتی بیر لەوە بکاتەوە رێگا بۆ چارەسەری بکاتەوە. رێگای رێککەوتنەکانی داهاتوو ئاسان بکات، ئەوان دەتوانن چۆن بەرەو پێش بکەون و لەسەر ئەمەش بیر بکەنەوە.

 

 

ئیلهام ئەحمەد: بەڵێ بەو بەهایەی کە دروست دەکرێت.

 

 

ئیلهام ئەحمەد: من گوتم دەکرێت.

 

 

ئیلهام ئەحمەد:  وەزارەتی نەوتی سووریا دەیدات بە بەڕێوەبەرایەتی خۆسەری رۆژئاوای کوردستان.

 

رووداو: لەنێوان دیمەشق و بەڕێوەبەرایەتیی خۆسەردا لەسەر بەنداوی تشرین رێککەوتن کراوە، چۆن جێبەجێ دەکرێت؟

 

ئیلهام ئەحمەد: ئەو رێککەوتنە تا رادەیەک باش بەرەو پێش دەچێت. 

 

 

ئیلهام ئەحمەد: رێککەوتنەکە ئەوەیە کە ئەم بەنداوە لە شەڕ و ناکۆکییەکان دوور بخرێتەوە. لەبەرئەوەی پڕۆژەیەکی خزمەتگوزارییە. 

خەڵک سوودی لێوەردەگرێت و ژیانیان باش دەکات. ئەوە لە شەڕ دوور بخرێتەوە و بپارێزرێت و ئاگربەست پێک بهێنرێت. لەسەر بەڕێوەبردنی گفتوگۆ دەکرێت. ئەم بەنداوە چۆن بەڕێوەدەبرێت؟ چۆن باشتر دەکەوێتە خزمەتەوە؟ لەسەر ئەمەش گفتوگۆ هەیە.

 

 

ئیلهام ئەحمەد: لەسەر ناوچە داگیرکراوەکان؛ عەفرین، سەرێ کانێ، گرێ سپی گفتوگۆ هەیە. لە رێککەوتنی دیمەشق کە کرا لەسەر گەڕانەوەی خەڵک بڕیارێک، خاڵێک هەبوو ئەو کەسانەی کە بە زۆرەملێ دەرچوون دیسان بگەڕێنەوە ماڵەکانی خۆیان. رێککەوتن هەیە، لە دیدارەکانی دواییدا بڕیار درا کۆمیتەیەک پێک بهێنرێت، لەسەر ئەم مەسەلەیە گفتوگۆ بەردەوامە. بەتایبەتی مەسەلەی عەفرین زۆر لە رۆژەڤدایە. بۆ گەڕانەوەی خەڵک کە بگەڕێنەوەو نەگیرێن، زۆرداری لەدژ نەکرێت، ئەو گرووپە چەکدارانەی لەوێ دەرچن. خەڵکی ئەو ناوچەیە لە سیستەمی ئاسایشی ئەو ناوچەیەدا جێگای خۆیان بگرنەوە. لەسەر ئەمەش بەپێی پەیمانەکە هەوڵدان هەیە، کە خەڵک بە سەلامەتی بچنەوە ناوچەکانی خۆیان.

 

 

ئیلهام ئەحمەد:  چ بەرژەوەندییەکیان لە هێرشدا هەیە؟ ئایا لەو هێرشە چ سوودێک دەکەن؟ پێموایە ئەمڕۆ هەموو خەڵکی سووریا بەدوای ئارامیدا دەگەڕێن. هەم لە شەڕ ماندوو بوون. هەم بەڕاستی ئیتر دەیانەوێت وڵاتی خۆیان ئاوەدان بکەنەوە. دەیانەوێت رزگاریان بێت لەوەی هەمیشە پەنابەر بن.

 

ئەو کەسانەی ئێستا لە بەڕێوەبەرایەتی دیمەشقدان، دەڵێن "ئێمە دژی دیکتاتۆری بەشار ئەسەد دەرچووین' ئەوان وا دەڵێن. رژێمی بەعس چ خراپییەکی کردووە، چ زۆردارییەکی کردووە، ئەوان دەڵێن دژی ئەوە وەستاونەتەوە. ئەگەر دژی ئەوە وەستاونەتەوە، دەبێت بیرۆکەی خۆیان، سیاسەت، سیستەم، دانوستان بە تەواوی بەپێی ئەوە دابمەزرێنن، کە بۆ گەلی سووریا ئارامی بهێنێت و بەپێی ئەوە بیربکەنەوە. 

 

ئیلهام ئەحمەد:  تاوەکو ئێستا دانوستاندن هەیە و ئێمە هەڕەشەیەکمان نەبینیوە. مەترسییەکی وا، دوژمنایەتییەکمان نەبینیوە. ئێمە هەوڵی هێرشمان نەبینیوە. ئێمە لە بۆچوونی ئەواندا تا ئێستا شتێکی وامان نەبینیوە، بەڵام ئەمەش دەڵێین دەبێت لە دانوستاندندا بگەین بە چارەسەرێک بۆ ئاوەدانکردنەوەی سووریا. واتە دەبێت سووریای نوێ ئێمە پێکەوە ئاوەدانی بکەینەوە. دەبێت سووریای نوێ تاکڕەوی نەبێت.

 

 

ئیلهام ئەحمەد:  کاتێک هێرش لەسەر ناوچەکان هەبێت، داعش خێراتر خۆی بەهێز دەکات. ئەم هەڕەشانە هەمیشە هەن بەڕاستی. ئەو هەوڵانەی ئەوان گیراوەکانی داعش لە زیندانەکان دەربهێنن، یان لە کامپەکان، ئەو شانە و خانەکانی داعشی خەوتوو خۆیان رێکدەخەن. بۆ ئەوەش ناتوانین بە تەواوی بڵێین ئەو هەڕەشەیە بە تەواوی کۆتایی هاتووە. تەنانەت لە ناوچەکانی ژێر کۆنترۆڵی بەڕێوەبەرایەتی دیمەشقدان، دیمەنی کەسانێک کە بە سیمبولەکانی داعشەوە دەگەڕێن دەبینرێن لە لایەکی حومسەوە، لە لایەکی دیکەوە لە سەحرا جوولەیەکی وا هەیە. ئێمە بڕوا ناکەین داعش لە سووریا کۆتایی هاتبێت و جموجوولەکانی کۆتایی پێهاتبن.

 

 

ئیلهام ئەحمەد: بەڵێ.

 

 

ئیلهام ئەحمەد: لە مەسەلەی دانوستاندا تەنانەت ئەوانەی لەگەڵ دیمەشقیش، ئەمریکا رۆڵێکی سەرەکی هەیە. ماوەیەکی درێژە هەوڵەکانیان هەمیشە هەبوون. ئێمە بڕوا دەکەین هەندێک هەنگاو هاوێژراون، بەتایبەتی بۆ ئەوەی لەنێوان ئێمە و تورکیادا ئارامی دروست ببێت، بتوانین کێشەکان بە دیالۆگ چارەسەر بکەین.

 

 

ئیلهام ئەحمەد: لەگەڵ تورکیادا بەتایبەتی بۆ ئاگربەست، کەمکردنەوەی گرژی و کۆتاییهێنان بە شەڕ دەمانەوێت رێککەوین. ئەو شتەی دەبێت بەرەو پێش بچێت، بەرەو پێش دەچێت و گفتوگۆی لەسەر دەکرێت و بۆ ئەوەی ئەمە بەردەوام بێت، چی داوا دەکرێت، ئێمە دەتوانین چۆن هەنگاوی لەگەڵدا بنێین، لەم چوارچێوانەدا گفتوگۆ دەکرێت.

 

 

ئیلهام ئەحمەد:  ئێستا بارودۆخ باشترە، لە پێشتر باشترە، ئارامییەک هەیە، چالاکی دژبەر نین، کە ئەمەش باشە. ئێمە بە ئەرێنی دەیبینین و هیوادارین ئەمە بەردەوام بێت و کاتی نەبێت.

 

 

ئیلهام ئەحمەد: هەر کەسێک، بەرپرسێک، سەرۆکێک، نوێنەرێک کاتێک کە لەگەڵ شەرع دادەنیشن، هانی دەدەن کە چارەسەری لە مافەکانی کورددا هەم لە دەستووردا، هەم لە شێوەکانی دیکەدا ببینێت. ئەمە لەگەڵ لایەنی دیکەدا ئاسوودەییەک دروست دەکات و رێگا دەکاتەوە، کە ئەوان خۆشیان تۆزێکی دیکە ئاسوودەتر و سەربەستتر دانوستاندن بکەن، بتوانن کێشەکە چارەسەر بکەن. بەتایبەتی لە باشووری کوردستان و عێراق ئەزموونێک بەرەو پێش چووە. تەنانەت ئەم ئەزموونە بەرەو پێش چووە گەلێک زەحمەتیشی بینیوە. کاتێک ئەم ئەزموونە بۆ لایەنەکەی دیکەیش دەگوترێت، هاندانێک بۆ ئەمە دروست دەبێت کە چارەسەری بکەن، جێگای سوپاسە و ئەرێنییە.

 

 

ئیلهام ئەحمەد: تا ئێستا لە دانوستاندندا جیاوازییەکی گەورە دروست نەبووە، هێشتا وەک پێشتر دانوستاندن هەیە. بۆ ئەوەی دیالۆگ لەگەڵ دیمەشق سەرکەوتوو بێت رۆڵێک هەیە.

 

 

ئیلهام ئەحمەد: بەڵێ پەیوەندییەکان باشن و ئێمە بڕوا دەکەین، کە لەمەودوا باشتریش دەبن.

 

 

ئیلهام ئەحمەد:  لەگەڵ هەرێمیش گۆڕانکارییەک هەیە. بەتایبەتی لە رێککەوتنی لایەنە کوردییەکاندا هەم رۆڵی هەرێم، هەم ئەو پشتگیرییەی کە کردی بە ئەرێنی و باش دەیبینین، جێگای سوپاسە. ئێمە هیوادارین تا بە ئەنجامیش بگات لەم بوارەدا خاوەنی رۆڵێکی بەهێزتر بن. بەو رادەیەی کە لەنێوان لایەنە کوردییەکاندا کێشە کەم ببێتەوە، دیالۆگ بەهێزتر بێت، لە هەموو لایەنەکانەوە بەشکردن هەبێت، تەنانەت بۆ چارەسەرکردنی کێشەکان پشتگیر بن، ئێمە وای دەبینین رێگا بۆ سووککردنی باری سەر شانی کۆمەڵگای ئێمەش دەکاتەوە، ورە و هێز دەدات. ئێمە هیوادارین ئەم پەیوەندییە بەرەو پێش بچێت و بەهێزتر بێت.

 

 

ئیلهام ئەحمەد: سوپاس بۆ ئێوەش