وەزیری بەرگریی ئەڵمانیا بۆ رووداو: پێویست ناکات گۆڕانکاری لە سیاسەتمان بکەین لە عێراقدا

پەرلەمانی فیدراڵیی ئەڵمانیا، دوێنێ (چوارشەممە، 18-10-2023) بە ئامادەبوونی 672 پەرلەمانتار کۆبووەوە و 560 پەرلەمانتاریان دەنگیان بە مانەوەی هێزەکانی ئەڵمانیا لە عێراق بۆ ساڵێکی دیکە دا.

بۆریس پیستۆریۆس، وەزیری بەرگریی ئەڵمانیا لەم هەڤپەیڤینەدا لەگەڵ رووداو سەبارەت بە بڕیارەکە قسە دەکات و دەڵێ "حکومەتی عێراق داوای لێکردین و ئێمە ئەوەمان کرد و ماوەی ئەرکەکانمان درێژکردەوە، تەنانەت ئەگەر دۆخی ئەمنی بە شێوەیەکی بەرچاو باشتر بووبێت، بەڵام ئێمە دەڵێین پێکەوە باشترە بەشداری بکەین لە سەقامگیریی زیاتر.''

 

لەدوای دەرچوونی بڕیارەکە، هەر دوێنی نێچیرڤان بارزانی، سەرۆکی هەرێمی کوردستان سوپاسی حکومەت و پەرلەمانی ئەڵمانیای کرد و رایگەیاند "پێکەوە شکستی هەمیشەیی داعش مسۆگەر دەکەین."

 

 

وەزیری بەرگریی ئەڵمانیا: ئەڵمانیا لە چوارچێوەی ئەرکی هاوپەیمانان رۆڵێکی گرنگی هەیە، ئەرکەکانیمان بۆ ماوەیەک درێژکردەوە، چونکە ئێمە زۆر لە نزیکەوە و بە هاوکاری لەگەڵ بەرپرسان چ لە باکووری عێراق و چ لە بەغدا پێکەوە کاردەکەین، حکومەتی عێراق داوای ئەمەی لێکردین، ئێمە ئەوەمان کرد و ماوەی ئەرکەکانمان درێژکردەوە، تەنانەت ئەگەر دۆخی ئەمنی بە شێوەیەکی بەرچاو باشتر بووبێت، بەڵام ئێمە دەڵێین پێکەوە باشترە بەشداری بکەین لە سەقامگیریی زیاتر. ئێمە بە هاوئاهەنگی زۆرەوە پێکەوە کاردەکەین. هەربۆیە خۆشبەختانە پەرلەمان رازی بووە بە درێژکردنەوەی ماوەی کارکردنی هێزەکانمان، زۆر دڵخۆشم بە بڕیارەکە.

 

 

وەزیری بەرگریی ئەڵمانیا: لەو باوەڕەدام پێوست نەکات لە عێراق گۆڕانکاری لە سیاسەتماندا بکەین، بەڵام بڕیاری درێژکردنەوەی ماوەی مانەوەی هێزەکانمان و ئەرکەکانیان لە عێراق و هەرێمی کوردستان، رێگەمان پێدەدات ژمارەی هێزەکانمان زیادبکەین، ئەگەرچی ئێستا بەم قەبارەیە دەمێنینەوە (250 سەرباز)، بەڵام ئێمە لە هەرکاتێکدا دەتوانین کاردانەوەمان هەبێت بەرامبەر بە گۆڕانکارییەکان.

 

 

وەزیری بەرگریی ئەڵمانیا: ئێمە، وەک پاڵپشتیکارێکی بێلایەن رۆڵمان هەیە بۆ دەستەبەرکردنی ئەو پرۆسانەی بەڕێوەدەچن بۆ بەهێزکردنی هاوکارییەکان، بە راستی ئەوە گرنگە لەو قۆناخەیدا عێراق لە گەشەسەندنی باشدایە، لەبەرئەوە زۆر خۆشحاڵین بە هاوئاهەنگی هاوبەش ئەم کارە بکەین.

 

 

وەزیری بەرگریی ئەڵمانیا: لە راستیدا پلانم دانابوو بۆ ئەمساڵ ئەوە بکەم، بەڵام رووداوەکان رێگەیان نەدا بۆیە ئێستا پلانم هەیە ساڵی داهاتوو بە زووترین کات ئەو کارە بکەم.

 

 

وەزیری بەرگریی ئەڵمانیا: هەرچەندە هێزەکانمان ژمارەیەکی دیاریکراون، بەڵام لەگەڵ ئەوەدا روونە کە ئامادەبوون چەند گرنگە، ئاماژەکە گرنگە؛ ئەوەی ئێمە لە تەنیشت هاوبەشەکانمان لە ناوچەکەدا بووەستین، لەبەرئەوە دڵخۆشین کە دەتوانین مانەوەی هێزەکانمان درێژبکەینەوە.