جۆن بۆڵتن: سەربەخۆیی کوردستان لە بەرژەوەندی ئەمریکایە

 

بۆڵتن بە دۆستێکی نزیکی کورد دەناسرێت، کاتێک لە ئیدارەی دۆناڵد ترەمپدا راوێژکاری ئاسایشی نیشتمانیی ئەمریکا بووە لەسەر پرسی کورد رووبەڕووی ترەمپ بووەوە. هاوکات بە ئاشکرا دەڵێت، "دروستبوونی دەوڵەتی کوردستان لە عێراق، لە بەرژەوەندی ئەمریکادایە." هەروەها لە کاتی گشتپرسیی سەربەخۆیی کوردستان لە ساڵی 2017دا پشتیوانی خۆی بۆ سەربەخۆبوونی کوردستان راگەیاند.

 

بۆ گفتوگۆکردن لەسەر هەڕەشەکانی سەر ئاسایشی نیشتمانیی ئەمریکا و سیاسەتی دەرەوەی ئەو وڵاتە بەرامبەر رۆژهەڵاتی نێوەڕاست، لەنێویاندا بەرامبەر پرسی کورد لە هەر چوار پارچەی کوردستان، رووداو لە ستۆدیۆی واشنتن میوانداریی جۆن بۆڵتن، راوێژکاری پێشووی ئاسایشی نیشتمانیی ئەمریکای کرد. 

 

لە هەڤپەیڤینەکەدا لەگەڵ جۆن بۆڵتن کە رۆژی 25-01-2023 تۆمارکرا، هەر لە پرسی خۆ بەربژێرکردنی و هەڵبژاردنی سەرۆکایەتیی ئەمریکا لە 2024 تاوەکو دەگاتە شەڕی ئۆکراینا و سیاسەتی ئەمریکا بۆ ناوچەکە، ئێران، تورکیا، سووریا و پرسی کورد تاوتوێکران. 

 

لەبارەی خۆبەربژێرکردنی بۆ پۆستی سەرۆکی ئەمریکا گوتی، بە جیدی بیری لێدەکاتەوە و گوتی، "من ناچمە نێو هەڵبژاردنێکەوە تەنیا بۆ ئەوەی دژی ترەمپ بوەستمەوە، بەڵکو دەچم تاوەکو هەڵبژاردنەکە ببەمەوە." 

 

 

 

جۆن بۆڵتن: خۆشحاڵم کە لەگەڵ تۆدام. 

 

 

جۆن بۆڵتن: نەخێر، هێشتا بیر لەوە دەکەمەوە کە ئایا خۆم بەربژێر بکەم یان نا. لە ساڵی 2016 زۆر بە رژدی (جیدی) سەیری پرسەکەم کرد، دەزانم کە بڕیارێکی قورسە، بەڵام پێموایە گرنگە هەڵسەنگاندن بۆ هەموو رەهەندەکانی بکەین، بەتایبەتیش رەهەندی ئاسایشی نیشتمانی لە هەڵبژاردنی 2024دا. پێموایە بە بەراورد بە هەڵبژاردنەکانی رابردوو، ئەم هەڵبژاردنە زیاتر سەرنجی لەسەر پرسە نێودەوڵەتییەکان دەبێت. هەڵبژاردنێکی زۆر گرنگە و منیش دڵنیا دەبمەوە لەوەی کە رۆڵێکی دروستی تێدا دەگێڕم. 

 

 

جۆن بۆڵتن: نەخێر، چەندین پرسی دیکە لەسەر مێزەکە هەن، بەڵام کاتێک سەرۆک گوتی، دەبێ دەستوور هەڵبوەشێنینەوە یان هەڵیپەسێرین؛ هەستم بەوەکرد، ئەمە جیاوازی نییە لەگەڵ ئەوەی بڵێت، دەیەوێت حکومەت لەسەرکار لابەرێت. ئەمە بۆ من چاوەڕوانکراوبوو کە ترەمپ شتێکی لەم جۆرە بڵێت، بەڵام ئەوەی نیگەرانی کردم، سەرکردەکانی دیکەی کۆمارییەکان هەڵوێستێکی ئەوتۆیان نەبوو، بەڕوونی نەیانگوت ئەمە جێگەی قبوڵکردن نییە. هاوکات، کۆمارییە راستەقینەکان پشتیوانی لە دەستوور دەکەن و لەگەڵ ئەوەنین دەستوور نەمێنێت. لەگەڵ ئەوەشدا، من ناچمە نێو هەڵبژاردنەکەوە تەنیا بۆ ئەوەی دژی ترەمپ بوەستمەوە، بەڵکو دەچم، تاوەکو هەڵبژاردنەکە ببەمەوە.

 

 

جۆن بۆڵتن: پێموایە دەبێ سەیری ئەوە بکەین هەڕەشە ستراتیژییەکان چین و هەڕەشە هەنووکەییەکان چین؟ بێگومان لەسەر ئاستی ستراتیژی، چین و رووسیا گەورەترین هەڕەشەن، بەڵام هەڕەشەکانی پیتاندنی یۆرانیۆم، هەبوونی چەکی بایلۆژی و کیمیایی، هەڕەشە بەردەوامەکانی تیرۆری نێودەوڵەتیش، ئەو نیگەرانیانەن کە ئێستا هەمانن. لە ناوچەکەش لە رۆژهەڵاتی نێوەڕاست، هەڕەشەی تیرۆر و هەروەها ئەو هەڕەشانەش هەن کە لەلایەن ئێرانەوە دێن، وەک خواستەکانی بۆ بەدەستهێنانی چەکی ئەتۆمی و چەکی کۆکوژ، بۆیە دۆزینەوەی رێگەیەک بۆ ئاشتی و سەقامگیری لە رۆژهەڵاتی نێوەڕاست دا دەبێ لەکارە هەرە لە پێشەکانی ئەمریکابن.

 

 

جۆن بۆڵتن: نەخێر، پێموایە سیاسەتی سەرۆک بۆ چین وەک پێویست بەهێز نییە. پێموایە زیاتر خواستەکانی لەسەر گفتوگۆکانی کەشوهەوان و رێککەوتنە لەگەڵ چین، کە ئەمەش چارەسەر نییە بۆ ئەو هەڕەشانەی کە چین دروستیکردوون. سەبارەت بە هەڕەشەکانی رووسیاش، ئێمە هەڕەشەکانی دەبینین، ئەمەش لە رێگەی هێرشە بێ بیانووەکەی بۆ سەر ئۆکراینا. هەروەها، دەبینین ئێران ئۆپەراسیۆنی تیرۆریستانە لە ناوچەکە دەکات، هەڕەشە لە دراوسێیەکانی دەکات، هاوکات خەڵکەکەی خۆی سەرکوت دەکات، هەڕەشە ئەتۆمییەکانیشی لەوەلاوە بوەستن.

 

 

جۆن بۆڵتن: پێموایە هەموو لایەک هەندێک بەرپرسیارێتیان بەردەکەوێت، ئەمە شەڕانگێزییەکی بێ پاساوە لەلایەن رووسیاوە، ئەو شەڕەیان دەستپێکرد، چونکە ترسیان لە دەرئەنجامی ئەو داگیرکارییە نەبوو؛ لەبیرمانە کە یەکەم جار لە ساڵی 2014 ئۆکراینایان داگیرکرد، لەسەردەمی ئۆبامابوو، بەڵام سزایەکی زۆر کەمی بەسەردا سەپێندرا، بۆیە کرێملن پێیوابوو کە دەتوانن هەمان شت دووبارە بکەنەوە، پێموانییە ئێمە وەک پێویست و لە پێشدا ئۆکرانییەکانمان پڕچەک کردبێت، ئەمە کێشەیەکی ئیدارەی ترەمپ بوو. هاوکات لە ئیدارەی بایدنیش هەر کێشە بوو، لەکۆتاییشدا پێموانییە بایدن لە پرسی رێگریکردن تێبگات، روونیشە نەمانتوانی رێگری لە داگیرکارییەکەی رووسیا بکەین؛ هەڵەی زۆر کران، بۆیە پێموایە ئەم پرسی هەڕەشە نێودەوڵەتییەی سەر ئەمریکا و دۆستەکانیشی دەبێتە پرسێکی گرنگی هەڵبژاردنی 2024. ئەم شەڕەی ئۆکرایناش گەورەترین شەڕی زەوینییە لە ئەوروپا لە دوای ساڵی 1945ەوە روویدابێت.

 

 

جۆن بۆڵتن: پێموایە رێگەی دەرچوون، دەرکردنی سوپای رووسیایە، ئۆکراینییەکان دەیانەوێت سەربەخۆبن، نایانەوێت بەشێکبن لە رووسیا، ئەوان ئازایانە شەڕیان کردووە و ئێمەش یارمەتییەکی زۆرمان پێدان، پێشموانییە سەرۆک زیلینسکی بتوانێت هیچ دانوستاندنێک بکات، لەکاتێکدا هێشتا هێزی بیانی لە وڵاتەکەیدا ماون.

 

 

جۆن بۆڵتن: پێموانییە پێویستیمان بەوەبێت، ئۆکراینییەکان زۆر بەباشی شەڕ دەکەن، پێویست بوو ئێمە ستراتیژی باشترمان هەبووایە، نەک تەنیا بە ناردنی هەندێک چەک بۆ بەدەستهێنانی ئاشتی، بەڵکو ستراتیژێکی راستەقینەمان هەبووایە بۆ بردنەوەی شەڕەکە. پێموایە پێشوەختە دەتواندرا شتی زیاتر بکرێت بۆ رێگریکردن لە رووسیا، یەکێک لەو رێگەیانە، دەکرا ئامادەبوونی هێزی زیاتری ئەمریکا بووایە، لەگەڵ ئەوەشدا، ئەوە رووسیایە کە ئازاری دەرئەنجامی خراپ دەچێژێت، پێشموایە شەڕەکە بووەتە هۆکارێکی کاریگەری ناسەقامگیری لە رووسیا، ئەمەش وەک دەرئەنجامەکەی. 

 

 

جۆن بۆڵتن: بەڵێ، پێموایە لە چەندین رووەوە، باشترین رێگە بۆ تێگەیشتن لە ئیدارەی بایدن ئەوەیە وەک ئیدارەی سێیەمی ئۆباما سەیری بکەیت، بایدن شوێن پێی بەشێکی زۆری سیاسەتەکانی پێشوو دەکەوێت، ئەو خەڵکانەی کە لە ئیدارەکەی کار دەکەن، لە ئیدارەی ئۆباماش بوون، ئەو سەرنجەی خستوویانەتە سەر ئێران، هەمان ئەوەی ئیدارەی ئۆبامایە و هەروەها بەگشتی خواستیان بۆ رۆژهەڵاتی نێوەڕاست نییە، خۆیان لە ناوچەکە دوورخستووەتەوە، بەشێکی بەهۆی ئەوەیە لەوێ نەوت و گاز بەرهەم دەهێندرێت و ئەوانیش حەزیان لە نەوت و گاز نییە، ئەوان دەیانەوێت وزەی با، خۆر و قەوزە سەرچاوەی سەرەکی وزەبن، ئەمەش هەڵەیەکی گەورەیە، چونکە رۆژهەڵاتی نێوەڕاست بۆ ئەمریکا زۆر گرنگە، ئێمە دۆست و هاوپەیمانمان لەوێ هەن، هاوکات گرنگ نییە ئێستا چ سیاسەتێک دەگریتەبەر، چونکە جیهان بۆ ماوەیەکی زۆرە بە نەوت و گاز کار دەکات.

 

 

جۆن بۆڵتن: پێموایە لە هەر کۆمەڵگەیەکی دیموکراسیدا، بەرز و نزمی لە سیاسەتەکاندا دەبێت، ئەمەش بەشێکە لە دیموکراسی، بەڵام من ئەوەشم بەلاوە گرنگە بۆ ئەمریکا، کاتێک پابەندییەک دەردەبڕێت بۆ خۆسەلماندنی بۆ دۆست و هاوپەیمانەکانی، دەبێ ئەو پابەندی و بەڵێنانە جێبەجێ بکات. پێموایە لە ناوچەکە، کشانەوەی ئۆبامایان لە ساڵی 2011 لە عێراق بینی، کە دوای چەند ساڵێک بەهۆی دەرکەوتن و ئەو هەڕەشانەی رێکخراوی قاعیدە دروستیکردبوون، دەبووایە بگەڕێینەوە. بڕیارە کارەساتبارەکەی بایدنیان بینی بۆ کشانەوە لە ئەفغانستان، ئەمەش هەڵەیەکی گەورەبوو، بۆیە لە سەرتاسەری ناوچەکە و لە چەندین شوێندا، نیگەرانییەک هەیە بەرامبەر مانەوەی هێزی ئەمریکا، لەبەرئەوە پێموایە دەبێت جارێکی دیکە متمانە بگەڕێندرێتەوە بۆ ئەمریکا، هەروەها ئەمەش کاری لە پێشینەی سەرۆکێکی کۆماری بێت لە دوای هەڵبژاردنی 2024.

 

 

جۆن بۆڵتن: پێموایە ئیدارەی بایدن هەمان ئەو شتە دووبارە دەکاتەوە کە ئیدارەی ئۆباما کردی، دوو ساڵە هەوڵدەدەن بۆ گەڕانەوە بۆ نێو رێککەوتنی ئەتۆمی 2015، کە خۆی رێککەوتنێکی خراپ بوو، بە تێپەڕبوونی کات هیچ شتێکی باشتر نەکرد. ئیدارەی بایدن چەندین سازشی بۆ ئێرانییەکان کردووە، هێشتاش ئەمە ئێرانییەکانی رازی نەکردووە، لە راستیشدا هەڕەشەی سەر ناوچەکە، تاکە هەڕەشە نا، بەڵام هەڕەشەی بنچینەیی سەر ناوچەکە حکومەتی ئێرانە؛ هەڕەشەی چەکی ئەتۆمی، هەڕەشەی پشتیوانیکردنی لە تیرۆر، چالاکییە تیرۆریستییەکانی خۆی، هەڕەشەی ناردنی چەک بۆ عێراق و وڵاتانی دیکە لە ناوچەکە، هەروەها هەڕەشەی سەرکوتکردنی خەڵکەکەی خۆی، بۆیە گۆڕینی حکومەت لە ئێران، رێگە دەدات خەڵک خۆیان حکومەتێک هەڵبژێرن، نەک رێبەری باڵای ئێران بۆیانی هەڵبژێرێت، ئەمە هەموو کێشەکانی رۆژهەڵاتی نێوەڕاست چارەسەر ناکات، بەڵام تاوەکو ئەو حکومەتە بمێنێتەوە، گەورەترین کێشە لە ناوچەکە هەر دەمێنێتەوە.

 

 

جۆن بۆڵتن: پێموایە رووداوی زۆر لە وڵاتەکەدا روودەدەن، پێموایە خۆپێشاندانەکان لەسەر جلوبەرگی ژنان، زۆر گەورەترن لەو پرسە، ئەمە ئاڵنگارییەکی راستەوخۆی ئایدۆلۆژییە لە دژی شەرعییەتی حکومەتەکە خۆی، دژایەتییەکان زۆر فراوانن، لەسەرووی هەموویانەوە ناڕەزایی لە دژی خراپی دۆخی ئابووری، پێشموایە لە دوای 1979ەوە، رژێمەکە ئێستا زیاتر لە هەر کاتێک لە مەترسیدایە، بەڵام هێزەکانی ئۆپۆزیسیۆن بە باشی رێکنەخراون، هەواڵە دڵخۆشکەرەکە ئەوەیە ناڕەزاییەکە هەموو وڵاتەکەی گرتووەتەوە، هەواڵە خراپەکەش ئەوەیە سەرکردایەتییەکی تۆکمەی نییە. پێموایە ئێمە دەتوانین پێداویستی پەیوەندی دابین بکەین، سەرچاوەی دیکەیان پێبدەین، بەڵام پێمان خۆشبوو زیاتر لە ئۆپۆزیسیۆنەوە ببیستین کە چ شتێک سوودی زیاتری دەبێت؟ سەرەتا دەبێت ئامانج و سیاسەتێکی روونت هەبێت، پێشموایە سیاسەتی ئەمریکا پێویستە لەگەڵ گۆڕینی حکومەت بێت، کاتێک حکومەتیش گۆڕدرا، هێشتا چەندین کێشە لەنێوخۆی ئێراندا دەمێنن، وەک پرسی نەتەوە و پێکهاتەکان و چەندین پرسی دیکە، بەڵام لەگەڵ ئەمەشدا، بۆ ئێستا پێویستە ئۆپۆزیسیۆن هەوڵبدات یەکگرتووبێت، چونکە تاوەکو ئەو رژێمە دەسەڵاتداربێت، هیچ شتێک ناگۆڕدرێت.

 

 

جۆن بۆڵتن: پێموایە ئیدارەی بایدن هێشتا هەوڵدەدات بگەڕێتەوە نێو رێککەوتنی ئەتۆمی 2015، دەڵێن پەراوێزمان خستووە، بەڵام راستییەکە ئەوەیە زۆر حەزدەکەن رێگەیەک بدۆزنەوە بۆ تێپەڕاندنی ئەو خۆپێشاندانانە و دەستپێکردنەوەی گفتوگۆ لەگەڵ ئێران، پێموایە شتێک کە ئێمە لە ئەمریکا دەبێت بیکەین ئەوەیە، بڵێین: رژێمی ئایەتوڵڵا ناشەرعییە، هیوای ئەوە بخوازین ئۆپۆزیسیۆنی ئێران و دیاسپۆرای ئێرانی حکومەتێک لە دەرەوە دروست بکەن، حکومەتێکی جیاواز کە خەڵک لە نێوخۆی ئێران شوێنی بکەون، هیواداربین بتوانین کە دابەشبوون لەنێو سوپا و سوپای پاسداران بدۆزینەوە، چونکە سوپا تاکە شتە کە رژێم هەژموونی بەسەردا هەیە و هۆکاری مانەوەشیانە لە دەسەڵات دا.

 

 

جۆن بۆڵتن: پێموایە سەربەخۆیی کوردستان لە بەرژەوەندی ئەمریکادایە. بەتایبەتیش لە کەیسی ئەردۆغانی سەرۆکی تورکیادا،  ئێمە وەک پێویست کارناکەین دژی ئۆپەراسیۆنەکانی تورکیا بۆ سەر کورد لە سووریا و شوێنەکانی دیکە. بۆیە، پێموایە هەنگاوێک کە زۆر گرنگە بۆ چارەسەری پرسی کورد و دەبێتە مایەی ئاسوودەیی کورد و ئەوانی دیکەش ئەوەیە دڵنیابین کە هەڵبژاردنێکی ئازاد و دادپەروەرانە لە مانگی پێنج لە تورکیا بەڕێوەدەچێت و دەستوەردان لەوەدا نەکرێت کە کێ چ کەسێک بەربژێر دەکات، چونکە دەزانین ئەگەر هەڵبژاردنێکی ئازاد و دادپەروەرانە بەڕێوەنەچێت، ئەردۆغان زۆرینە دەباتەوە، لە خولی یەکەمیش نەبێت، لە خولی دووەم دەیباتەوە.  

 

 

جۆن بۆڵتن: پێشتر لە قۆناخێکدا سیاسەتێکی روونمان هەبوو، ئەوکاتەی بەشێکی زۆری باکووری رۆژهەڵاتی تورکیا، سێگۆشەی رۆژهەڵاتی رووباری فورات، سنوورەکانی باشووری تورکیا، سنوورەکانی رۆژئاوای عێراق، ناوچەی ئازادکراوبوون، ئەم ناوچانە لەگەڵ ناوچەی ئەلتەنەف لە سنووری ئوردن لە ژێر کۆنتڕۆڵی هێزەکانی ئەمریکا و هاوپەیمانە کوردەکانی و هاوپەیمانەکانی دیکەی دابوون، من هەرگیز لەگەڵ گۆڕینی دۆخی ئەو ناوچەیە نەبووم. دووبارەی دەکەمەوە، ئەمە چارەسەری یەکجاری کێشە و ناکۆکییەکان نییە، بەڵام کشاندنەوەی هێزەکانمان یان کەمکردنەوەیان ناسەقامگیری زیاتر دروست دەکات و هەموولایەک دەخاتە مەترسییەوە. بە تێچوویەکی کەمی ئەمریکا و هاوپەیمانەکانی توانیمان بنەمایەکی باش لە دوای تێکشکاندنی داعش دروست بکەین، کە دەکرا تاوەکو رادەیەک جۆرێک لە ئۆتۆنۆمی وەربگرێت، دەکرا ئەمەش دەستپێکێک بێت بۆ هەنگاوی دیکە، بەڵام لەگەڵ کەمبوونەوەی هێزەکانی ئەمریکا، زۆر قورسە بتوانی کاریگەریت لەسەر هەر رووداوێک لە ناوچەکەدا هەبێت.

 

 

جۆن بۆڵتن: نەخێر، پێموایە کوردستانێکی سەربەخۆ لە بەرژەوەندی ئەمریکادایە، قورسە بزانین کە سنوورەکانی چۆن دەبن، بەڵام پێموایە دەوڵەتی عێراق شکستیهێناوە. پێموایە ناوچە کوردییەکانی عێراق دەکرێت ببنە بنچینەی وڵاتێکی سەربەخۆ. پێموایە پێویستە بەشەکانی دیکەی عێراق بەجۆرێکی دیکە رێکبخرێنەوە کە ئەمەش کارێکی ئاڵۆزە. بزانین چی لە ئێران و تورکیا و سووریا روودەدات. 

 

 

جۆن بۆڵتن: پێموایە ئەمریکا دەبێت پلانێکی ستراتیژی باشتری بۆ ناوچەکە بەگشتی هەبێت، هەروەها لەو رێگەیەوە مامەڵە لەگەڵ کورد و داوایان بۆ دەوڵەتێکی سەربەخۆ بکرێت، ئەمەش پێویستی بە روونی زیاتر هەیە، ئێمەش لە ئیدارەی ترەمپ ئەوەمان نەکرد، ئەو ستراتیژییە روونەمان نەبوو، پێموانییە ئیدارەکانی دیکەش ئەوەیان هەبووبێت، بۆیە ئەمە پرسێکی شەرعییە کە دەکرێت لەنێوخۆی ئەمریکا گفتوگۆی لەسەر بکرێت، پێموایە ئەو کەسانەی کە بۆ چەندین ساڵە کار دەکەن بۆ هاوکاریکردنی کورد، پێویستە دڵنیابن لەوەی خەڵک لە ئەمریکا دەزانن کە ئەمە پرسێکی شەرعییە.

 

 

جۆن بۆڵتن: پێموایە دەوڵەتێک کە سەربەخۆیی زوو وەربگرێت، دەوڵەتێک دەبێت لەسەر بنچینەی ئەو ناوچانە دەبێت کە ئێستا لەژێر دەستی کورددان لە عێراق. چۆن مامەڵە لەگەڵ کورد لە وڵاتانی دیکە دەکرێت؟ ئەوە پرسیارێکی قورس دەبێت، پێشموایە هەموومان لەوە تێدەگەین. بێگومان سووریا وڵاتێکە وادەردەکەوێت کە لە رووخاندایە، بەڵام ئەو بەشانەی کە نازانین چی لێ روودەدات ئێرانە. هەروەها تورکیا گەورەترین کێشەیە و دەبێت چارەسەر بکرێت، پێموایە ئەوە شتێکە کە کورد پێویستە لە تورکیا لەگەڵ هاووڵاتییە تورکەکانیان قسەی لەسەر بکەن ئەگەر ئەردۆغان لەم هەڵبژاردنە شکستیهێنا.

 

 

جۆن بۆڵتن: پێموایە باشتر دەبێت ئەگەر کورد لە ئەمریکا زیاتر لەسەر ئەم پرسە گفتوگۆ بکەن، وەک نموونە من ئامادەم گرەو بکەم ئەگەر ئێستا پرسیار لە دیپلۆماتکارەکانی وەزارەتی دەرەوە بکەی 99% دەنگ لە دژی دەوڵەتێکی سەربەخۆی کوردستان دەدەن؛ بۆیە گرنگە کە کوردی ئەمریکا و ئەوانەی دیکەش کە پشتیوانی لە خواستی کورد دەکەن، وابکەن کە ئەمە ببێتە پرسێکی گفتوگۆی گشتی لە ئەمریکا، دڵنیام لەوەی زۆربەی ئەمریکییەکان دەڵێن، ئێمە سەربەخۆیی خۆمان دەوێت و تێدەگەین بۆچی کوردیش سەربەخۆیی دەوێت.             

 

 

جۆن بۆڵتن: باشە، من پێموایە ئەوەی لە توانایاندایە بیکەن تاوەکو ئەمە بکەنە زیاتر لە پرسێک. بۆ نموونە، ئایا ئەردۆغان بەباشی مامەڵە لەگەڵ کورد دەکات لە کامپەین و هەڵبژاردنی داهاتوودا لە تورکیا؟ پێموایە خەڵک لە نزیکەوە چاودێری ئەم هەڵبژاردنە دەکەن، بۆیەش ئەگەر ئەو رێگری لە کورد بکات دەنگی خۆیان بە بەرژێری دڵخوازیان بدەن، ئەمە سەرنجی خەڵک رادەکێشێت. من جەخت لەوە دەکەمەوە، چونکە ناتوانم پلانی یاریکردنی 20 ساڵت پێبدەم، بەڵام دەتوانم پلانێکی چوار مانگیت پێبدەم، ئەویش ئەوەیە دڵنیاببنەوە لەوەی هەڵبژاردنەکانی تورکیا ئازادانە و دادپەروەرانە دەبن.

 

 

جۆن بۆڵتن: خۆشحاڵبووم کە لەگەڵ تۆ بووم، سوپاس بۆ میواندارییەکە.