یونیتاد: بەڵگەی پێویست هەیە و دەتوانین هێرشی سەر کوردانی ئێزدی بە جینۆساید دابنێین

 

 

کریستیان ریچەر، سەرۆکی یونیتاد لە هەڤپەیڤینێکدا لەگەڵ رووداو، کە نوێنەر فاتیح لەگەڵی ئەنجامدا، باسی چەندین پرسی کرد و گوتی، ئەو بەڵگانەی کۆیانکردوونەتەوە پێیان دەڵێن، "داعش هەموو دەستکەوتەکانی شارستانیەتی لەنێوبردن." رەتیشیکردەوە کە داعش "دەوڵەتێکی ئیسلامی" بووبێت و گوتی، "هەرگیز ئیسلامی نەبوو."

 

لەبارەی چۆنێتیی گواستنەوەی پارە لەلایەن رێکخراوی داعشەوە، سەرۆکی یونیتاد ئەوەی خستەڕوو، "داعش تۆڕێکی زۆر زیرەکی دروستکرد، بۆئەوەی سەرچاوەی دارایی بۆ ئەنجامدانی تاوانەکانیان دابین بکات، بۆئەوەی جۆرێک لە دەوڵەت دابمەزرێنێت، کە ئەوە بڕوای ئەوان بوو، دەیانگوت ئێمە دەوڵەتین، ئەوان بەشی گەنجینەیان هەبوو، هەوڵیان دەدا پارە بۆ میلیشیاکانیان دابینبکەن لەڕێگەی بەقاچاخبردنی نەوت و بازرگانیکردن بە مرۆڤ و هەموو ئەو شتانەی کە لە ئابووریی تاریکدا هەن."

 

هەر لەوبارەیەوە، ناوبراو ئاماژەی بەوەش کرد، "بۆمان دەرکەوتووە کە [لەلایەن داعشەوە] پارە بۆ وڵاتانی دیکەی دەرەوەی عێراقیش نێردراوە."

 

 

ریچەر: سوپاس بۆ میوانداریکردنەکە.

 

 

ریچەر: پێشەکی، سوپاس بۆ ئەم میوانداریکردنە و بۆ ئەم دەرفەتە تاوەکو هەندێک باسی کارەکەمان بکەم کە لێرە لەگەڵ یونیتاد دەیکەین. یونیتاد، وەکو تۆ باست کرد، 4 ساڵ لەمەوبەر دەستی بە کارکردن کرد. ئەوە دەستپێکی کارەکە بوو، واتە پێویست بوو هەموو شتێک لە سەرەتاوە دەستپێبکەین. دوای ماوەیەکی کەم، چەندین لقمان لەنێو کارەکەدا دروستکرد، بە لەبەرچاوگرتنی کۆمەڵانی جیاوازی خەڵکی عێراق کە کاریگەریی هێرشەکانی دەوڵەتی بەناو ئیسلامی یان داعشیان لەسەر بوو. تاوەکو ئێستا، بەڵگەمان دۆزیونەتەوە کە دەیسەلمێنن چەکدارانی داعش تاوانی نێودەوڵەتیی وەکو جینۆساید، تاوانی جەنگ و تاوانی دژی مرۆڤایەتییان ئەنجامداون لە دژی نزیکەی هەموو کۆمەڵانی خەڵکی نێو عێراق، چ کۆمەڵانی ئایینی بن، یان کەمینەکان بن. ئێمە هێشتاش بەردەوامین و بە وردی لێکۆڵینەوە دەکەین لەسەر ئەوەی لەو کاتەدا چی روویداوە، بە دیاریکراویش هەوڵدەدەین ئەو تاکانە بدۆزینەوە کە تاوانکار و بەرپرسن بۆئەوەی بتوانین ناویان ئاشکرا بکەین و بە دادپەروەرییان بگەیێنین.

 

 

ریچەر: پێموایە حکومەتی عێراق داوای یارمەتیی لە نەتەوە یەکگرتووەکان و کۆمەڵگەی جیهان کرد بۆئەوەی ئەم لێکۆڵینەوەیە بکات، چونکە ژمارەیەکی زۆری تاوانکارانی داعش خەڵکی وڵاتانی بیانی بوون و لێرە چووبوونە نێو داعشەوە، واتە هاتبوونە عێراق و ئەو تاوانانەیان لێرە ئەنجام دابوون. بێگومان ژمارەیەکی زۆری گومانلێکراوان خەڵکی عێراقیش بوون. واتە کاریگەرییەکی جیهانیی گەورە لەسەر ئەو شتە هەیە کە لێرە روویدا، لەسەر تاوانەکانی داعش. بۆیە پێموایە، شتێکی رەوایە کە لەڕێگەی نەتەوە یەکگرتووەکانەوە، کە هەموو وڵاتانی جیهان لەخۆدەگرێت، مامەڵە لەگەڵ ئەم تاوانە دڕندانە بکرێت.

 

 

ریچەر: ئەوە پرسیارێکی جیایە. رەشەکوژی دەستەواژەیەکی یاسایی نییە. پێموایە دەیان، سەدان یان رەنگە هەزاران تاوان هەن کە دەتوانین بە رەشەکوژی ناویان ببەین.

 

 

ریچەر: تەنانەت لە عێراق. لەوە گرنگتر بۆ پۆلێنکردنە یاساییەکەیە. ئەوەی کە ئێمە بینیمان سەبارەت بەو هێرشانەی کە کاریگەرییان لەسەر کۆمەڵانی خەڵک هەبووە، تاوانی دژی مرۆڤایەتیی وەکو هێرشی بەرفراوانی سیستماتیک بۆسەر خەڵکی سڤیل، بێگومان ئێمە تاوانی جەنگمان بینی، هەروەها هێرش بۆسەر ئەو خەڵکەی کە لەژێر یاسای نێودەوڵەتیدا پارێزراون، کۆیلەگەری، بەکارهێنانی منداڵان وەکو سەرباز، شتگەلێکی وەکو ئەمانە هەمووی تاوانی جەنگن. تەنانەت ئێمە تاوانی جینۆسایدمان تۆمارکردووە کە دژی خەڵکی ئێزدی ئەنجامدراون لێرە لە باکووری عێراق لە ناوچەی شنگال.

 

 

ریچەر: جینۆساید.. بەڵێ، بەڵێ.. ئێستا ئێمە بەڵگەی پێویستمان دۆزیوەتەوە کە دەتوانین لەڕووی یاساییەوە هێرشی سەر کوردانی ئێزدی لە شنگال بە جینۆساید دابنێین. ئەمە لەسەر ئاستی نێودەوڵەتی رەنگدانەوەی هەبوو. لە فرانکفۆرت لە ئەڵمانیا بە تاوانی ئەنجامدانی جینۆساید دژی خەڵکی ئێزدی، سزا بۆ هاووڵاتییەکی عێراقی دەرکرا. پێموایە دەکرێت بسەلمێندرێت کە ئەمە جینۆساید بووە. سەبارەت بە کۆمەڵانی خەڵکی دیکەی نێو عێراق کە کاریگەرییان لەسەر بووە، ئێمە هێشتا لێکۆڵینەوە دەکەین بۆ ئەوەی بزانین ئایا دەکرێت ئەمە بە جینۆساید یانیش لانیکەم هاندان بۆ جینۆساید دابنرێت. جینۆساید ئەوەیە کە بەنیازی قڕکردنی کۆمەڵێک خەڵک دەکرێت، سەلماندنی ئەوەش زۆر ئاسان نییە. قڕکردنی کۆمەڵێک خەڵک بە تەواوی تەنیا بە واتەی ئەوە نایەت تۆ خەڵکەکە بخەیتە بارودۆخی سەختی ژیانەوە، بەڵکو دەتەوێت هەموویان لەنێوببەیت. ئەمە پێوەرێکی زۆر بەرزە لەڕووی یاساییەوە. بۆیە ئێمە بە هۆشیارییەوە لێکۆڵینەوەی لێ دەکەین، بەڵام هێشتا نەگەیشتووینەتە کۆتایی.

 

 

ریچەر: بەڵێ. 

 

 

ریچەر: پێکەوە کارکردنی زۆر باشمان لەگەڵ هەموو دامەزراوەکانی عێراق هەیە، بە دیاریکراویش لەگەڵ دەسەڵاتی دادپەروەری، هەروەها لە نێوەڕاستی عێراق و لێرە لە هەرێمی کوردستانیش ئێمە پێکەوە کارکردنی باشمان هەیە لەگەڵ دادوەرە لێکۆڵەرەکان، ئێمە پێکەوە کارکردنی باشمان هەیە لێرە لە هەرێمی کوردستان لەگەڵ حکومەت، لەگەڵ وەزارەتی نێوخۆ بۆ نموونە، بۆئەوەی بەڵگە پێویستەکان بۆ سەلماندنی بۆ نموونە جینۆساید، تاوانی جەنگ یان تاوانی دژی مرۆڤایەتی کۆبکەینەوە، یان هەر شتێکی دیکە پێویست بێت بۆ لێکۆڵینەوەکانمان. ئێمە سەبارەت بە هەموو کۆمەڵە کارتێکراوەکانی خەڵک لێکۆڵینەوەی بەردەواممان هەیە، ئێزدیەکان، کەمینەی کریستیان، شيعە، سوننە، هەروەها ئەوانەی کە پێیان دەگوترێت پێکهاتە کەمینەکان وەکو کاکەیی و شەبەک. لێکۆڵینەوەی بەردەواممان هەیە سەبارەت بە وێرانکردنی میراتی کولتووری، ئەوە شتێکی زۆر گرنگە، چونکە وەکو لە میدیاکان بینیمان، بۆ نموونە لە مۆزەخانەی مووسڵ، هەندێک پارچە شوێنەوار کە تەمەنیان هەزاران ساڵ بوو لەلایەن چەکدارانی داعشەوە لەنێوبران کە میراتی کولتووریی ئەم وڵاتەنە. بۆیە ئێمە پێکەوە لەگەڵ هەموو ئەم دامودەزگا حکومیانە کار دەکەین، بۆ نموونە لەگەڵ فەرمانگەی گۆڕە بەکۆمەڵەکان لە کاتی هەڵدانەوەی گۆڕی بەکۆمەڵ، یانیش لەگەڵ داد پزیشکی لە کاتی دیاریکردنی ناسنامەی پاشماوەی تەرمەکان.

 

 

ریچەر: بەڵێ.

 

 

ریچەر: بەڵێ، ئەوە کاریگەریی هەبووە لەسەر کارەکەمان، لەو رووەی کە ئێمە چاوەڕێی دەرکردنی یاسایەک دەکەین لەسەر یاسای تاوانی نێودەوڵەتی لێرە لە عێراق. پێمان گوترا کە ئەوە کاری لەپێشینەی پەرلەمانی نوێ دەبێت، بەڵام وەکو خۆتان دەزانن..

 

 

ریچەر: بەڵێ، هەندێک بەربەستی سیاسی هەن و ئێمە هێشتا چاوەڕێی دەرکردنی یاسایەک لەسەر یاسای تاوانی نێودەوڵەتی دەکەین کە بۆ ئێمە زۆر یارمەتیدەر دەبێت، ئەگەرنا...

 

 

ریچەر: ...ئەگەرنا، ناتوانیت وەکو تاوانی جەنگ، تاوانی دژی مرۆڤایەتی یان جینۆساید، لێپێچینەوە لەم تۆمەتانە بکەیت. دەتوانیت لێپێچینەوە لە تۆمەتەکانی خوارووتر، وەکو دەستدرێژیی سێکسی، کوشتن یان دزی بکەیت، بەڵام نەک تاڵانی، ئەمە جیاوازییەکەیە. بێگومان ئەوان یاسای دژی تیرۆریان هەیە، واتە دەتوانرێت بەئەندامبوون لە رێکخراوی تیرۆریستیدا بە تاوان دابنرێت، بەڵام ئامانجی یونیتاد، ئامانجی ئێمە ئەوەیە تۆمەتەکانی تاوانی نێودەوڵەتی ببەینە بەردەم دادگەی لێهاتوو و قوربانیانیش تێیدا بەشداربن، کە زۆرترین گرنگیی هەیە قوربانیان لەم دادگاییکردنانەدا دەنگی خۆیان هەبێت. بەئەندامبوون لە رێکخراوێکی تیرۆرستیدا، شتێکی تەواو دەرهەستە. رەنگە کەسێک ئەندام بێت، بەڵام هیچ قوربانییەک نەبێت. ئەوە زۆر روونە؛ بەڵام ئەگەر بە کوشتنی کەسێکی پارێزراو لەژێر یاسای نێودەوڵەتیدا، تاوانی جەنگت ئەنجامدابێت، ئەوا خزم و کەسوکارت هەیە، کە دەکرێت لە دادگە شایەتی بدەن و چیرۆکی خۆیان بڵێن. ئەمە ئامانجی ئێمەیە. ئەمە جیاوازییەکەیە.

 

 

ریچەر: بەڵێ.

 

 

ریچەر: بەڵێ. بەربەستەکان... وەکو ئاماژەم پێکرد، ئێمە بەربەستی یاسایی نەبوونی یاسای تاوانی نێودەوڵەتیمان هەیە. بەربەستەکانی دیکەمان، هەندێکجار لە هەندێک شوێنی دیاریکراوی لێکۆڵینەوەکانمان شوێنی تاوانەکە دوورە، بۆیە رووبەڕووی کێشەی لۆجستی دەبینەوە کاتێک دەچینە ئەو شوێنە بۆ ئەنجامدانی چاوپێکەوتن لەگەڵ شایەتحاڵەکان لە شوێنێکی سەلامەتدا. پێویستە چاومان لە شایەتحاڵەکان بێت، بێگومان ئێمە یەکەیەکمان هەیە کە تایبەتە بە پاراستنی شایەتەکان. دەتوانم بڵێم شتێکی سرووشتییە لە کاتی لێکۆڵینەوە لە تاوانە نێودەوڵەتییەکاندا بەربەستت هەبن، چونکە هەمیشە زەحمەتە بۆ شایەت و قوربانییەکان بەتایبەتیش بۆ ئەوەی شایەتی بدەن و بڵێن چی روویداوە، چونکە ئاسان نییە ئەم تاوانە دڕندانە بەبیری خۆت بهێنیتەوە، ئەمە یەکێکە لە بەربەستەکان بەگشتی. بێگومان پێویستە کارمەندەکانیشمان بپارێزین، بۆ نموونە لە کاتی هەڵدانەوەی گۆڕێکی بەکۆمەڵ، پێویستە مۆڵەتی ئەمنی بەدەستبێنین و بزانین ئایا دەتوانین ئەم گۆڕە لەگەڵ هاوتا عێراقییەکانمان هەڵبدەینەوە؟ یان ئایا دەبێت لە کام لا هەڵی بدەینەوە؟ ئەمانە بەربەستە کردەییەکانن، بەڵام لە کۆتاییدا، من زۆر دڵنیام کە بە هاوکاریی لایەنە پەیوەندیدارەکانی عێراق بە هەرێمی کوردستانیشەوە، دەتوانین کارەکە بەجێ بگەیێنین و بەڵگە پێویستەکان بەدەستبهێنین.

 

 

ریچەر: بەڵێ. ئەوە لەنێو ئەرکەکەدایە. واتە ئێمە بە شێوەیەک بەڵگەکان کۆدەکەینەوە کە نەک تەنیا خۆمان، بەڵکو دامەزراوە دادگەرییەکانی عێراق و شوێنەکانی دیکەی جیهانیش بتوانن لە هەر دادگاییکردنێکدا بەکاریانبهێنن هەر کاتێک پێویست کرا. ئەمە ئەو شتەیە کە دەمانەوێت بەدەستی بهێنین. پێویستە زنجیرەیەک لە ئەرک و بەرپرسیارێتی جێبەجێ بکەین سەبارەت بە بەڵگەنامەکان، واتە بیرۆکراسیەکی گەورەیە و ملیۆنان لاپەڕەی بەڵگەنامەکانی دروستدەبێت. بۆ نموونە ئەگەر بتەوێت بەڵگەنامەیەک بە وڵاتێکی دیکە بدەیت بۆئەوەی لە دادگاییکردنێکدا بەکاریبهێنن، پێویستە بیسەلمێنیت کە ئەمە بە شێوەیەکی گونجاو بەدەستهێندراوە، واتە بتوانیت بڵێیت سەرچاوەکەی یان هەموو وردەکارییەکانی چین، بۆئەوەی بتوانرێت وەکو بەڵگەیەک لە دادگە بەکاربهێندرێت و بتوانێت شتێک بسەلمێنێت. ئەمە ئەو شتەیە کە دەمانەوێت بەدەستیبهێنین. لە کۆتاییشدا، ئێمە زۆر شانازی دەکەین بۆ نموونە بەوەی کە توانیومانە بە یارمەتیی یەکێتیی ئەوروپا، ئەم بەڵگەنامانە بکەینە دیجیتاڵ. پێکەوە لەگەڵ دەسەڵاتی دادوەریی عێراق، لەم کاتەدا ملیۆنان بەڵگەنامە دەکەینە دیجیتاڵ، بۆئەوەی بتوانین لەنێویاندا بگەڕێین و بیانپارێزین، ئەگەرنا، کاخەز دەتوانرێت بسووتێت و زۆر مەترسیی لەسەرە، بەڵام ئەگەر بیانکەینە دیجیتاڵ، دەتوانین ئەرشیفیان بکەین و لە دادگەدا بەکاریانبهێنین و ئەو شتانە بسەلمێنین کە بۆیان نووسراون.

 

 

ریچەر: ئەمە پرسیارێکی باشە. بێگومان، عێراق وەرگری سەرەتایی بەرهەمەکەمانە. ئەمە بەشێکە لە ئەرکەکە و پێوەی پابەندین، بۆیە ئێمە زۆر هاوئاهەنگی لەگەڵ دەسەڵاتی دادوەریی عێراق دەکەین سەبارەت بە تواناسازی و دۆسیەسازی، بۆئەوەی یارمەتیی هاوکارە عێراقییەکانمان بکەین بتوانن لێپێچینەوە لە تاوانە نێودەوڵەتییەکان بکەن و هەرکە یاساکە دانرا دەست بە دادگاییکردن بکەن، ئەمە یەکێکە لە بەربەستەکان لە لایەکەوە، بەربەستی دیکە دابەشکردنی بەڵگە پێویستەکانە، لەنێویاندا دەقی چاوپێکەوتنی شایەتەکانە، بەسەر ئەو وڵاتانەی کە تاوانکاران لێوەیانەوە هاتوون، بۆئەوەی رووبەڕووی دادگایی بکرێنەوە. بۆیە پێویستە لە پەیوەندیی بەردەوامدا بین لەگەڵ ئەو وڵاتانەی کە تاوانکارەکان لێوەیانەوە هاتوون، واتە ئەوانەی کە پێیان دەگوترێت چەکداری تیرۆرستی بیانی.

 

 

ریچەر: بەڵێ، ئەوە راستە. ئەمە ئەو شتەیە دەمویست پێتی بڵێم. ئێمە پێویستمان بە پێکەوە کارکردنە، بەڵام کۆمەڵێک دامودەزگا هەن؛ بۆ نموونە، لەنێو یەکێتیی ئەوروپادا، شتێک هەیە بەناوی کۆبوونەوەی تۆڕی جینۆساید، ئەمە لەژێر چەتری یۆرۆجەست-دایە کە بریتییە لە تۆڕێک لە دامەزراوەی دادگەری لەنێو یەکێتیی ئەوروپا، ئێمەش بەشێکین لەو تۆڕە و دەتوانین لەم تۆڕەدا زانیاری لەگەڵ هاوبەشەکانمان ئاڵۆگۆڕ بکەین. ئەوانیش دەتوانن بێنە لای ئێمە، بۆ نموونە بڵێن ئێمە ئەم تاوانکار و ئەو تاوانکارەمان هەیە، ئایا ئێوە هیچ زانیاریتان لەسەر ئەم تاوانکارانە هەیە؟ دواتر ئێمە بەنێو بەڵگەنامەکانماندا دەڕۆین و لێکۆڵینەوە دەکەین بۆئەوەی بزانین ئایا ئەو کەسە دەناسین یان نا، یانیش ئایا دەتوانین چی بکەین؛ بەڵام تەنانەت ئەگەر نەشتوانین هیچ بکەین، دەتوانین بڕۆین قسە لەگەڵ شایەتەکان بکەین بە هاوکاریی هاوتا عێراقییەکانمان، یان بەڵگە و هەر شتێکی دیکە پێویست کرا رادەست بکەین، بۆئەوەی پشتیوانیی ئەو دادگاییکردنانە بکەین کە لە وڵاتە ئەوروپی و ئەمریکییەکان بەڕێوەدەچن بە نموونە.

 

 

ریچەر: بە هەزاران کەسن.

 

 

ریچەر: نەخێر، لای ئێمەش هیچ ژمارەیەکی دیاریکراو نییە. تەنانەت رووداوی تاک تاکی وەکو رەشەکوژیی حوزەیرانی 2014 لە ئەکادیمیای ئاسمانیی تکریت دژی ئەندامە زۆرینە شيعەکان، زیاتر لە هەزار قوربانییان لە یەک رۆژدا هەبووە. بۆیە ئەگەر باس لە ئێزدییەکانی شنگال بکەین، بە هەزاران کەس دەبن. هێشتا ژمارەیەکی زۆریشیان بێسەروشوێنن. ئەم تاوانانە زۆر دڕندانەن، بۆیەشە لە سەرەتا پێم گوتیت کە زۆر رەشەکوژی ئەنجامدراون. بۆیە ئەگەر یەک رەشەکوژی وەربگرین و بڵێین لێرەدا 10 کەس کوژراون، لە کۆتاییدا ژمارەیەکی زەبەلاحی قوربانیانمان دەبێت.

 

 

ریچەر: ئەمە پێمان دەڵێت داعش هەموو دەستکەوتەکانی شارستانیەتی لەنێوبردن.

 

 

ریچەر: بە جۆرێک لە جۆرەکان، بەڵێ. دەتوانم بڵـێم بەڵێ. ئەوە پلانێکی لەپشتەوە بوو. پلانەکەش ئەوە بوو کە ئەم دەوڵەتە بەناو ئیسلامییە، کە هەرگیز ئیسلامی نەبوو، هەوڵیدا دیکتاتۆریەتی خۆی دابمەزرێنێت، بەبێ رەچاوکردنی ئەوەی باجەکەی چی دەبێت. ئەوان نزیکەی هەموو ئەو تاوانانەیان ئەنجامدا کە لە یاسای تاوانی نێودەوڵەتیدا هاتوون.

 

 

ریچەر: نەخێر. نەخێر. هەر کەسێک دژی داعش با، لەلایەن داعشەوە هێرشی دەکرایەسەر. گرنگ نەبوو شيعە بێت، سوننە بێت، کریستیان بێت یان ئێزدی. هەر کەسێک هاتبایەتە رێگەی، هێرشی دەکردە سەری.

 

 

ریچەر: بەڵێ، داعش تۆڕێکی زۆر زیرەکی دروستکرد، بۆئەوەی سەرچاوەی دارایی بۆ ئەنجامدانی تاوانەکانیان دابین بکات، بۆئەوەی جۆرێک لە دەوڵەت دابمەزرێنێت، کە ئەوە بڕوای ئەوان بوو، دەیانگوت ئێمە دەوڵەتین، ئەوان بەشی گەنجینەیان هەبوو، هەوڵیان دەدا پارە بۆ میلیشیاکانیان دابینبکەن لەڕێگەی بەقاچاخبردنی نەوت و بازرگانیکردن بە مرۆڤ و هەموو ئەو شتانەی کە لە ئابووریی تاریکدا هەن. هەروەها ئەوان رێگەکانی ناردنی پارەیان دیاریکردبوو؛ بۆیە یەکەیەکی تاوانی ئابووریمان هەیە بۆ ئەوەی بەدواداچوون بۆ ئەو پارەیە بکات، چونکە ئەمەش بەشێکە لە پێکهاتەی لێکۆڵینەوەکانمان، لە خوارەوە تاوەکو سەرەوە و لە سەرەوە تاوەکو خوارەوە دەڕوات.

 

 

ریچەر: ناتوانم زۆر بچمە نێو وردەکارییەکانمەوە، داوای لێبووردن دەکەم، بەڵام بۆمان دەرکەوتووە کە پارە بۆ وڵاتانی دیکەی دەرەوەی عێراقیش نێردراوە.

 

 

ریچەر: ئێمە کارێکی زۆری بنکۆڵکاری سەبارەت بەم پرسە دەکەین، خۆم مانگی ئایار سەردانی دهۆک و کەمپی ئاوارەکانم کرد بۆئەوەی خێزانی ئەو کەسانە ببینم، کە هێشتا لە کەمپەکاندا دەژین. گوێبیستی شایەتیدانیان بووم بەوەی کە هێشتا ژمارەیەکی زۆری ئێزدیەکان بێسەروشوێنن. لە کارنامەی یونیتاددا نییە کە بەدوای ئەم کەسە بێسەروشوێنبووانەدا بڕوات، بەڵام لەگەڵ ئەوەشدا، هەوڵدەدەین لەڕێگەی لێکۆڵینەوەکانمانەوە هاوکاربین، بۆ نموونە، کاتێک بەدواداچوون بۆ مردووان دەکەین و نموونەی خوێنی کەسوکاریان وەردەگرین بۆئەوەی بزانین ئەوانەی لە گۆڕە بەکۆمەڵەکاندان کێن و بزانین کێن ئەوانەی بێسەروشوێنن. هیوادارم کە ئەو کەسانەش بدۆزینەوە کە هێشتا لە ژیاندا ماون و لە شوێنێکی دیکە دەژین لە دەرەوە بن یان هەر شوێنێک، بەڵام لە کارنامەی یونیتاددا نییە ئەو کەسانە بگەڕێنێتەوە بۆ خێزانەکانیان، بەڵکو چەند دامەزراوەیەکی دیکە لەنێو نەتەوە یەکگرتووەکاندا هەیە ئەو کارە دەکەن، بەڵام لەگەڵ ئەوەشدا، هەوڵدەدەین هێندەی پێمان بکرێت لەو کارەدا هاوکار بین لەڕێگەی لێکۆڵێنەوەکانمانەوە.

 

 

ریچەر: سوپاس بۆ ئێوەش.