نهێنیی خواردنی مۆز لەلایەن یاریزانانەوە ئاشکرادەکرێت
رووداو - تەندروستی
زۆرجار یاریزانانی تۆپی پێ، تێنس و وەرزشەکانی دیکە لەکاتی یارییەکان و کۆتایی یارییەکاندا مۆز دەخۆن، یاریزانانی تێنس لەنێوان و کۆتایی گێمەکان و یاریزانانی تۆپی پێش لەنێو ژووری جلگۆڕین. بێگومان دەکرێت نهێنییەکی تەندروستی لە پشت ئەم کارەوە بێت.
ناوەندی کلیڤلاندی پزیشکی لە ئەمریکا دەریدەخات، مۆز میوەیەکی دەوڵەمەندە بە مادە خۆراکییە پێویستەکان کە توانای یاریزانان باشتردەکات و وزەیەکی زۆریان پێدەبەخشێت.
ناوەندەکە دەڵێت، مۆز کاربۆهیدراتی سادەی تێدایە، بە خێرایی دەگۆڕێت بۆ وزە و جەستە بەکاریدەهێنێت. ئەمەش ماندوویەتیی کەمدەکاتەوە، ئەو ناوەندە ئەوەش باسدەکات، رۆژانە پێویستە یەک بۆ دوو مۆز بخورێت.
ئەم سوودانەی مۆزیش ئاشکرادەکات؛
- دەوڵەمەندە بە پۆتاسیۆم، مەگنسیۆم و مس؛ رێگری لە گرژبوون و ئازاری ماسوولکەکان دەکات.
- رێژەیەکی زۆر ئاوی تێدایە؛ جەستە بە شێداری دەهێڵێتەوە.
- دەوڵەمەندە بە مادەی تریپتۆفان؛ دەروون باشتردەکات و دڵەڕاوکێ کەمدەکاتەوە.
بە گوێرەی ماڵپەڕی پاڵەوانێتیی وێمبڵدۆنی تایبەت بە تێنس، بە درێژایی ماوەی یارییەکانی پاڵەوانێتییەکە لە هەر ساڵێکدا، سێ تۆن و 300 کیلۆگرام مۆز دەخورێت.