هەرێمی کوردستان بە سەنتەری داتا و زانیاریی شێرپەنجەی عێراقەوە دەبەسترێتەوە

 

 

دکتۆر سورا یاسین، بەڕێوەبەری هۆبەی تۆمارکردنی شێرپەنجە لە ئەنجوومەنی شێرپەنجەی عێراق، رۆژی چوارشەممە 30-10-2024 بە تۆڕی میدیایی رووداوی راگەیاند، ئەنجوومەنی شێرپەنجەی عێراق سەنتەرێکی ناوەندیی داتا و زانیارییەکانی سەبارەت بە شێرپەنجە دامەزراندووە.

 

بە گوتەی بەڕێوەبەری هۆبەی تۆمارکردنی شێرپەنجە لە ئەنجوومەنی شێرپەنجەی عێراق، کارمەندەکان لە هەموو پارێزگاکان راهێنانیان پێکراوە و شوێن، کەرەستە و ئامێری پێویستیش بۆ هەر پارێزگایەک تەرخانکراوە، بە هەرێمی کوردستانیشەوە.

 

دکتۆر سورا یاسین دەڵێت، سەرجەم داتا و زانیارییەکان لە هەموو پارێزگاکان بە هەرێمی کوردستانیشەوە بە ناوەندەوە دەبەسترێنەوە. ئاماژەی بەوەش کرد، پرۆسەکە تەنیا کاراکردنی ماوە و بڕیارە بەمنزیکانە کارا بکرێت.

 

لە ساڵی 2022دا 39068 هەزار تووشبووی شێرپەنجە لە عێراق تۆمارکراون کە 7720یان لە باشووری کوردستان بوون.

 

 

نەجەف: 2018 تووشبوو

سلێمانی: 2909 تووشبوو

هەولێر: 2456 تووشبوو

کەربەلا: 1510 تووشبوو

بەغدا: 9323 تووشبوو

بەسرە: 3199 تووشبوو

دیوانییە: 1290 تووشبوو

دیالە: 1622 تووشبوو

واست: 1342 تووشبوو

دهۆک: 1222 تووشبوو

بابل: 1851 تووشبوو

میسان: 988 تووشبوو

موسەننا: 716  تووشبوو

سەلاحەدین: 1261 تووشبوو

ئەنبار: 1349 تووشبوو

زیقار: 1562 تووشبوو

کەرکووک: 1133 تووشبوو

نەینەوا: 2629 تووشبوو

نەزانراو: 679 تووشبوو

 

سورا یاسین باسی جۆرە باوەکانی شێرپەنجەی لەنێو پیاوان کرد و گوتی، یەکەم سییەکان، دووەم قۆڵۆن و سێیەم پرۆستاتە.

 

سەبارەت بە ژنانیش، دکتۆر سورا یاسین گوتی، یەکەم شێرپەنجەی مەمک، دووەم قوڕگ و سێیەم قۆڵۆنە.

 

لەبارەی گیانلەدەستدان، بەڕێوەبەری هۆبەی تۆمارکردنی شێرپەنجە لە ئەنجوومەنی شێرپەنجەی عێراق ئاماژەی بەوە کرد، "لە ساڵی 2022دا بەهۆی شێرپەنجەوە 11421 کەس گیانیان لە عێراق لەدەستداوە."

 

 

بەغدا: 3114 

بەسرە: 1029

نەینەوا: 989

زیقار: 740

دیالە: 703

نەجەف: 696

بابل: 652

کەربەلا: 536

واست: 523

موسەننا: 412

سەلاحەدین: 396

دیوانییە: 376

سلێمانی: 342

موسەننا: 308

دهۆک: 232 

کەرکووک: 195

ئەنبار: 157

هەولێر: 5

 

774 گیانلەدەستدان لە باشووری کوردستان تۆمار کراون؛ پارێزگاکانی هەولێر، سلێمانی، دهۆک و کەرکووک دەگرێتەوە.

 

بەڵام ئەو بەرپرسەی ئەنجوومەنی شێرپەنجەی عێراق ئاماژەی بەوەشکرد، ئەو ئامارەی هەرێمی کوردستان کە لای ئەنجوومەنەکەیانە "زۆر ورد نییە."