زانکۆی کالیفۆرنیا: شەکری زیادکراوی نێو خۆراک و خواردنەوەکان هۆکارێكی زوو پیربوونە
رووداو - تەندروستی
توێژینەوەیەکی زانکۆی کالیفۆرنیا دەریدەخات، بوونی تەنها یەک گرام شەکری زیادکراو لە نێو خۆراک دەبێتە هۆی پێشوەختە پیربوونی خانەکان.
ئەم توێژینەوەیە ئاماژە بەوەدەکات، بە ئەنجامدانی پشکنینی شەکرە بۆ ئەو بەشداربووانەی شەکری زیادکراو لە نێو خۆراکی رۆژانەیان هەبووە دەرکەوتووە، شەکری دەستکرد و شەکری زیادکراوەی نێو خواردن و خواردنەوە گازییەکان دەبنە هۆی خێرابوونی تەمەنی بایۆلۆژی و زوو پیربوون.
دکتۆر ئيلیسا ئێپیل، سەرپەرشتیاری توێژینەوەکە دەڵێت، ''شەکری زیادکراو مەترسیدارە، هۆکارێكی سەرەکی تووشبوون بە نەخۆشییە درێژخایەنەکانە و تەمەن کورتدەکات''.
دکتۆر ئێلیسا دەشڵێت، خۆراکی دەوڵەمەند بە ڤیتامین، کانزا سوودبەخشەکان و دژە ئۆکسێنەرەکان تەمەنی بایۆلۆژی مرۆڤ بە گەنجی دەهێڵنەوە.
بەپێی دەزگای خۆراک و دەرمان لە ئەمریکا FDA، لە کەسانی پێگەیشتوو نابێت رۆژانە لە 50 گرام زیاتر شەکری زیادکراو بخورێت.