هەڵەیەک روویدا! دووبارە هەوڵبدە
رووداو - تەندروستی
گۆرانیبێژێکی ئەمریکی دوای ئەوەی بۆ ماوەیەکی زۆر دەرمانی کێشدابەزاندنی بەکارهێناوە، لە سۆشیاڵ میدیاکانی خۆی ڤیدیۆیەکی داناوە کە بە گریانەوە باسی دەکات، بەهۆیانەوە چی لێ بەسەرهاتووە؛ ئەو دەڵێت: ''بەبێ راوێژی پزیشک هەرگیز بەکاریان مەهێنن''.
ئانا ئیانیتێلی کە ناسراوە بە ئێیڤری، 30 ساڵانە و لە ڤیدیۆیەکدا باسی کاریگەرییە خراپەکانی ئەو دەرمانە دەکات، ئەو دەڵێت، بەبێ راوێژی پزیشک بەکاری هێناوە و تووشی پووکانەوەی ئێسکەکانی کردووە، دەشڵێت: ''ساڵێکە دەرمانەکە بەکاردەهێنم''.
ئانا بە گوتەی خۆی، شۆک بووە کە پزیشک وای پێگوتووە؛ دوای ساڵیک لە بەکارهێنان، دوو مانگە وازی لە دەرمانەکە هێناوە و ئێستا کە پشکنینی بۆ کراوە دەرکەوتووە، ئێسکەکانی پووکاونەتەوە.
بەپێی مایۆکلینیک، پووکانەوەی ئێسکەکان، لاوازیی ماسوولکەکان و لاوازیی بەستەرەکان دەشێت لێکەوتەکانی دەرمانەکان بن.
ئەو دەرمانەی ئەو بەکاری هێناوە لەو دەرزییانەیە کە هی نەخۆشیی شەکرەن و بۆ دابەزاندنی کێشیش بەکاردێن، بەپێی FDA بۆ ئەوانە دەنووسرێت کە شەکرەیان هەیە و قەڵەویشن، پسپۆڕان هۆشداریان داوە، ''هیچ کەسێک بەبێ راوێژی پزیشک بەکاریان نەهێنێت''.
لەنێو ئەو ڤیدیۆیەی بڵاوبووەتەوە، گۆرانیبێژە ئەمریکییەکە بە گریانەوە خەڵک هۆشیاردەکاتەوە کە بەبێ راوێژی پزیشک ئەو دەرمانانەی کێشدابەزاندن بەکارنەهێنن و گوتی: ''ئەگەر پێویستت پێیان نییە، هەرگیز بەکاریان مەهێنە''.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ