ئارایشتکارێک: کەرەستەکانی ئارایشت بۆ خۆم بەکارناهێنم، چونکە دەزانم چەند مەترسیدارن
رووداو - تەندروستی
رووداو لە کوالێتیی خاوێنکردنەوەی کەرەستەکانی جوانکاریی ئارایشتگەکان دەکۆڵێتەوە و ئارایشتکارێک دەڵێت: زۆرینەی ئارایشتگەکان کەلوپەلەکانیان پاکژناکەنەوە و کەرەستەکانی جوانکاریی دەستەکان وەک پێویست خاوێن ناکرێنەوە.
ئارایشتگەکان دەتوانن نەک جوانی، بەڵکو تەندروستیی مرۆڤیش بخەنە مەترسییەوە، بەجۆرێک ببنەهۆی گواستنەوەی چەندان نەخۆشیی درێژخایێن.
لیلیا میراوتسا، پەیامنێری رووداو لە پاکوخاوێنیی ئارایشتگەکانی کۆڵیوەتەوە و کارمەندێکی ئارایشتگەی دواندووە کە 12 ساڵە کاری جوانکاریی نینۆک دەکات و پێنج ساڵە لە هەرێمی کوردستانە، ئەو دەڵێت: ژمارەیەکی زۆر لەو ئارایشتگەیانەی لە هەولێر کاری تێداکردوون، پاککردنەوەی پێویست بۆ کەلوپەلەکانیان نەبووە.
ئەو کارمەندەی ئارایشتگە دەڵێت: "مقەستی ئارایشتگەکەمان بۆ خۆم بەکارناهێنم، چونکە دەزانم چۆن پاککراونەتەوە".
د. هەردی جەواد، پسپۆری نەخۆشییەکانی خوێن باسی ئەو مادانە دەکات کە بۆ پاکژکردنەوە ''تەعقیمکردن'' لە ئارایشتگەکاندا بەکاردەهێنرێن و دەڵێت: ''وەکو چۆن ئامێری نەشتەرگەری تەعقیمدەکرێت پێویستە کەلوپەلەکانی ئارایشتگەکانیش تەعقیمبکرێن، بەم شێوەیە مرۆڤ دڵنیا دەبێت کە ئەو ئامێرە کە جاری دووەم بەکاردێت سەد لە سەد خاوێنە و نابێتەهۆی گواستنەوەی نەخۆشی''.
سۆزان عوسمان، خاوەنی ئارایشتگەیەکە و دەڵێت: لە بواری مانیکیور ئەگەری برینداربوونی پێستی مرۆڤ زۆر زۆرە، چونکە ئامێری تیژ بەکاردێت.
سۆزان عوسمان دەشڵێت: لیژنەکانی تەندروستی کاتێک سەردانیان دەکەن، گوێ بە ئامێری پاککردنەوە و پاکژکردنی کەرەستەکان نادەن، بەڵکو تەنیا پاکوخاوێنیی شوێنەکە و بەڵگەنامەی کارمەندان دەپشکنن.
لە بارەی پاککردنەوە ''تەعقیمکردن''ـی کەلوپەل و کەرەستەکانی جوانکاری، سەرەتا کەلوپەلەکان مادەیەکی تایبەتیان لێدەدرێت و بۆماوەی 40 خولەک دادەنرێن، پاشان بە ئاو و فڵچە دەشۆردرێن و وشکدەکرێنەوە، دوای ئەوە دەخرێنە نێو کیسی تایبەتەوە و کاژێرێک لە پلەی گەرمیی 135 پلەی سیلیزی لەنێو ئۆتۆکلەیڤ دادەنرێن.
لەم بارەیەوە پسپۆڕێکی خانمان و منداڵبوون لە بوولتەنی تەندروستیی رۆژی دووشەممە 29ـی کانوونی دووەمی 2024 گوتی، بەشێک لەو ئامێرانەی کە بەکاردەهێندرێن بۆ بابەتی جوانکاری لە ئارایشتگەکاندا دەکرێت پێست بریندار بکەن، بەمەش ئەگەری گواستنەوەی نەخۆشییە ڤایرۆسییەکان و نەخۆشییەکانی خوێن زیاددەبێت.
د. شایان جەلال، پسپۆڕی نەخۆشییەکانی خانمان و منداڵبوون و نەزۆکی رایگەیاند، نەخۆشییە ڤایرۆسییەکانی وەکو هەوکردنی جگەر جۆری بی و سی، هەروەها نەخۆشیی ئەیدز بەربڵاوترین ئەو نەخۆشییانەن کە لەنێو ئارایشتگەکاندا دەگوازرێنەوە.