رووداو - تەندروستی
رێکخراوی تەندروستیی جیهانی WHO رایدەگەیێنێت، بە مەبەستی رووبەڕووبوونەوە و پێشگیریکردن لە بڵاوبوونەوەی زیاتری نەخۆشیی 'ئاوڵەی مەیموون' پلانێکی شەش مانگی جێبەجێدەکرێت.
رێکخراوەکە ئاماژە بەوەدەکات، پلانەکە لە مانگی ئەیلوولەوە دەستپێدەکات تاوەکو مانگی شوباتی ساڵی داهاتوو دەخایێنێت و پێکدێت لە دابینکردنی رێژەیەکی زیاتری ڤاکسین، باشترکردنی سیستمی چاودێریکردنی نەخۆش، هۆشیارکردنەوەی هاوولاتییان لە نەخۆشییەکە و زیادکردنی ژمارەی کارمەندانی تەندروستیی لەو وڵاتانەی نەخۆشییەکەی تێدا بڵاوبووەتەوە.
تێدرۆس ئادهانۆم سەرۆکی رێکخراوی تەندروستیی جیهانی دەڵێت، "دەتوانرێت بڵاوبوونەوەی نەخۆشیی 'ئاوڵەی مەیموون' لە کۆماری دیموکراتی کۆنگۆ و وڵاتانی دراوسێی کۆنترۆڵ بکرێت و رابگیرێت."
بە گوێرەی ناوەندی کۆنتڕۆڵ و پێشگیریکردن لە نەخۆشییەکان CDC لە ئەفریقا، لەمساڵدا لە نزیکەی 12 وڵاتی ئەفریقا، زیاتر لە 12 هەزار و 300 تووشبووی نەخۆشیی 'ئاوڵەی مەیموون' تۆمارکراون و 590 کەس بەهۆی نەخۆشییەکە گیانیانلەدەستداوە.
ڤایرۆسی 'ئاوڵەی مەیموون' سەر بەخێزانی ڤایرۆسەکانی 'Poxviradae'ـە، بە شێوەیەکی گشتی لە رێگەی بەرکەوتنی نزیک بڵاودەبێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ