هەڵەیەک روویدا! دووبارە هەوڵبدە
رووداو - تەندروستی
پسپۆڕێکی نەخۆشییەکانی مێشک و دەمار شەش چارەسەری نادەرمانی بۆ کەمکردنەوە و کۆنتڕۆڵکردنی ئازاری ''شەقیقە'' پێشنیازدەکات و دەڵێت: هەندێک لە خۆراک و خواردنەوەکان هەیە کە تووشبووی نەخۆشییەکە نازانن ئازارەکەیان پێی زیاددەبێت، بۆیە پێویستە لێیان دووربکەونەوە.
د. ئەحمەد کاوە، پسپۆڕی نەخۆشییەکانی مێشک و دەمار لە هەولێر دەریدەخات، ئەم چارەسەرییانەی خوارەوە دەکرێت کاریگەربن بۆ کۆنتڕۆڵکردنی لاسەرئێشە ''شەقیقە''، بەڵام لەگەڵ خراپتربوونی نیشانەکان، بە پێویستی دەزانێک پزیشکی پسپۆڕ ببیندرێت؛
چارەسەرییەکان ئەمانەن؛
1- کەمکردنەوەی خواردنی کافایین
''هەندێک سەرئێشە دەتوانرێت بە کافایین کەم بکرێنەوە، بەڵام بەکارهێنانی بەردەوام و درێژخایەن دەبێتەهۆی زیادبوونی سەرئێشە. ئەگەر بڕی رۆژانە وەرنەگریت، تەنانەت تووشی سەرئێشە دەبیت بەهۆی وازهێنان لە کافایین. خواردنی کافایین کەم بکەنەوە و چای گیایی و ئاوی زۆر بخورێنەوە.''
2- بوونی خەوی تەندروست
''پێویستە بڕی خەو شەوانە لانیکەم 5 بۆ 6 کاژێر بێت و مەرجە تەندروستییەکانی خەوێکی کوالێتیی باشی تێدابێت.''
3- وەرزشی بەردەوام
''بە وەرزشی رێکوپێک دەتوانرێت سەرئێشە و شەقیقە کەم بکرێنەوە. مادەی ئەندۆرفین کە بە ئازارشکێنی سرووشتیی جەستە ناسراوە، لە کاتی وەرزش لە جەستەدا دەردەچێت. هەروەها راهێنانی بەردەوام گرژی کەمدەکاتەوە و خەو ئارام دەکات، هەرچەندە لەکاتی وەرزشدا دەشێت کەسێک تووشی سەرئێشە ببێت، بەڵام ئەمانە کاردانەوەی جەستەن و ئاسایین.''
4- بەکارهێنانی بۆنی لاڤێندەر
''کەمکردنەوەی دڵەڕاوکێ لەوانەیە یارمەتیدەر بێت بەهۆی کاریگەریی ئارامکەرەوەی بۆنی لاڤێندەر. تاقیکردنەوەیەکی کلینیکی دەریخست کە چوار هەفتە بەکارهێنانی زەیتی لاڤێندەر دەشێت دڵەڕاوکێ و لاسەرئێشەک کەمبکاتەوە.''
5- چاودێریکردنی جۆری خۆراک
''خواردنی سێ ژەم رۆژانە، لەگەڵ ژەمێکی سووک لە ئێواران، یان شەش ژەمی بچووک بە درێژایی رۆژ، زۆر گرنگە. خواردنی خۆراکی دەستکاریکراو سنووردار بکە و ئەولەویەت بدە بە هەموو ئەو خۆراکانەی کە مادەی کیمیایی کەمیان تێدایە. چەندین خۆراک و خواردنەوە دەکرێت لاسەرئێشە ''شەقیقە'' دروستبکەن یاخود نیشانەکانی خراپتر بکەن وەکو؛''
- خواردنەوە کحولییەکان
- پەنیری کۆن
- فاسۆلیا
- کافاینەکان چا، قاوە، خواردنەوە وزەبەخشەکان
- ماست
- پاقلەی سۆیا
- چوکلێت
- گۆشتی ئامادکراو و بەستوو
6- کۆنتڕۆڵکردنی گوشاری دەروونی
''شەقیقە و گوشاری دەروونی زۆرجار پێکەوە دەژین. بۆیە ژیان سادەتر بکە، هەوڵ مەدە ئەرک یان چالاکیی زیاتر بخەیتە ناو رۆژەکەتەوە. بەڵکو زیاتر بایەخ بەمانە بدە؛''
- دابەشکردنی کات
- پشوو و پیاسەکردن
- بایەخدان بە خولیای نوێ
- فێربوونی کارامەیی نوێ
- وەرزشەکانی خۆخاوکردنەوە
- نەچوونە نێو ژینگە و هەوای پیسبوو
- چوونە پارک و نێو سرووشت
لە کۆتاییدا گوتی، ئەم چارەسەرە ماڵیانە و شێوازی ژیان لەگەڵ بەکارهێنانی دەرماندا بەکاردەهێنرێن، بەڵام ئەگەر ئازارەکە بەردەوام بوو، ئەوا راوێژ بە پسپۆڕ بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ