پسپۆڕێک: بەهیچ شێوەیەک مەسکارەی کەسێکی دیکە بەکارنەهێندرێت

 

ئارەزوو مەحموود، پسپۆڕی پەرستاریی مامانی و ماستەر لە بەرهەمەکانی جوانکاری بە رووداوی راگەیاند، زۆرجار باشترە خانمانی دووگیان بەرهەمە 'بۆندارەکان، کحولییەکان و زەیتە سرووشتییەکان' بەکارنەهێنن.

 

ئارەزوو مەحموود گوتی، خانمانی دووگیان هیچ کاتێک دەرمانی ئۆنلاین بەکارنەهێنن و باسی چەند بەرهەمێک دەکات کە قەدەخەیە بۆ خانمانی دووگیان بەکاربێن.

 

 

 

ئارەزوو مەحموود: زۆرجار باشترە خانمان بەرهەمە 'بۆندارەکان، کحولییەکان و زەیتە سرووشتییەکان' بەکارنەهێنن لەبەر ئەم هۆکارانە؛

 

- تووشی هەستیاریی زیاتر دەبن.

- ئەگەری تێکچوونی هۆرمۆنەکانیان زیاتردەبێت.

- ئەگەری تووشبوونی منداڵ بە نەخۆشییە سکماکییەکان زیاددەبێت.

- ئەگەری تووشبوون بە نەخۆشیی بەیانیانی خانمان زیاددەبێت.

- ئەگەری تووشبوونی خانمان بە هەناسەتەنگی زیاددەبێت.

 

 

ئارەزوو مەحموود: چەند بەرهەمێک هەن کە مادە قەدەخەکراوەکان بۆ خانمانی دووگیانیان لەسەر نووسراوە کە باوترینیان ئەمانەن؛

 

1- بەرهەمەکانی ڤیتامین A و رێتینۆیدەکان هەرچەندە پێکهاتەی باشن، بەڵام نابێت پێش دووگیانبوون و کاتی دووگیانیش بەکاربێن، چونکە ئەگەری تووشبوونی منداڵ بە نەخۆشییە سکماکییەکان زیاددەکات، هەربۆیە ئەگەریش ئەو مادەیە وەرگیرا ئەوا دەبێت لەژێر راوێژی پزیشکدا بێت.

 

2- دەرمانی ترشی سالیسالیک کە بۆ زیپکە بەکاردێت بەتایبەت ئەگەر 2٪ زیادتر بێت، ئەوا نابێت بەکاربێت.

 

3- پێکهاتەی هایدرۆکینۆن کە بۆ لابردنی پەڵەی پێست بەکاردێت، چونکە کاریگەریی لەسەر ناڕێکیی گەشەی کۆرپەلە دەکەن.

 

4- مادەی فۆرمەڵدیهاید کە لە بەرهەمەکانی قژخاوکردنەوە و کیراتینی قژ بەکاردێت. 

 

5- مادەی پارافین وەکو پارێزەری ماکیاژ و بەرهەمەکانی جوانکاری بەکاردێت و باشترە کە بەکارنەهێندرێت.

 

 

ئارەزوو مەحموود: ئەم مادانەی خوارەوە؛ 

 

1- رێتینۆیدەکان (رێتینۆڵ، رێتینیل پاڵمیتات)

2- پارابێنس (میتیلپارابێن، پرۆپیلپارابێن)

3- فتالاتس (دیئێتیل فتالات)

4- فۆرماڵدیهاید

5- ئاوێتە ئەلەمنیۆمەکان (کلۆرۆهایدراتی ئەلەمنیۆم)

6- ئانتیبایۆتیکەکانی تێتراسایکلین (دۆکسیسایکلین)

7- بۆنی دەستکرد

8- کانزا قورسەکان (جیوە، مس)

9- هایدرۆکوینۆن

 

 

ئارەزوو مەحموود: رەنگە خانمان پێشووتر بەرهەمێکیان بەکارهێنابێت کە هیچ زیانی نەبووبێت، بەڵام کاتێک لە ماوەی دووگیانیدا بەکاریدەهێنن، ئەوا هەستیاریان بۆ دروستدەبێت، چونکە دووگیانی خۆی هۆکارێکی زیادهەستیاربوونە. یاخود رەنگە هەندێک لە پێکهاتەکانی بەرهەمەکان رەنگە خۆیان هەستیاری دروستبکەن، ئەمە جگە لەوەی کە دەشێت کۆمەڵێک کاریگەریی لاوەکیی مەترسیدار لەسەر کۆرپەلە دروستبکەن.

 

 

ئارەزوو مەحموود: بەکارهێنانی مەسکارە سەلامەتە، بەڵام دەبێت خانمان لە شوێنێکی باوەڕپێکراو و لەلای کەسی شارەزا دەستیان بکەوێت و نابێت بەهیچ شێوەیەک مەسکارەی کەسێکی دیکە بەکارنەهێندرێت، چونکە هەر ئەوە دەبێتەهۆی هەوکردن و هەستیاریی تووند. تەنانەت دەبێت دڵنیایی هەبێت لەوەی کە هیچ لە مادە زیانبەخشە کیمیاییەکانی تێدانەبێت. هەموو مەسکارەیەک لەسەری نووسراوە کە بۆماوەی چەند ئاساییە بمێنێتەوە، هەروەها پێویستە پێش خەوتن ماکیاژ و مەسکارە بشۆردرێت.

 

 

ئارەزوو مەحموود: خانمانی دووگیان دەبێت زۆر وریابن لە بەکارهێنانی ئەو بەرهەمانە، چونکە رەنگە پشکنینی کوالێتییان بۆ نەکرابێت و پێکهاتەیەکی زیانبەخشیان بۆ دووگیانییەکە تێدابێت، تەنانەت زۆرینەی ئەو بەرهەمانە چاودێریی کەمتریان لەسەرە و باشترە خانمانی دووگیان بەکاریان نەهێنن.

 

 

ئارەزوو مەحموود: پێویستە لەلای پزیشکی پسپۆڕ بەرهەمەکان پێشنیازبکرێت و لە شوێنی باوەڕپێکراویش بکڕدرێن.