تەندروستیی جیهانی: ساڵانە 2.6 ملیۆن کەس بەهۆی خواردنەوەی کحولەوە دەمردن

 

 

رۆژی سێشەممە 25ی حوزەیرانی 2024 تێدرۆس ئەدهانۆم، بەڕێوەبەری گشتیی رێکخراوی تەندروستیی جیهانی لە راپۆرتێکیدا گوتی، "بەکارهێنانی بەردەوامی خواردنەوە کحولییەکان زیان بە تەندروستیی مرۆڤەکان دەگەیێنێت، مەترسیی نەخۆشییە درێژخایەنەکان زیاتر دەکات، دۆخی دەروونی تێکدەدات و بە شێوەیەکی تراژیدی ساڵانە ملیۆنان کەس دەکوژێت."

 

بەگوێرەی راپۆرتەکەی ئەو ئاژانسەی سەر بە نەتەوە یەکگرتووەکان، ساڵانە لە هەر 20 کەسێک کە گیان لەدەستدەدەن، یەکێکیان بەهۆی خواردنەوە کحولییەکانەوەیە.

 

لە راپۆرتەکەدا ئاماژە بەوەش کراوە، سێ لەسەر چواری ئەو کەسانەی بەهۆی خواردنەوە کحولییەکانەوە گیان لەدەستدەدەن، پیاون؛ هەروەها 13%ی تەمەنیان لەنێوان 20 تاوەکو 39 ساڵە.

 

هەرچەندە لە راپۆرتەکە ئاماژەی بەوە کردووە، "لەدوای ساڵی 2010وە بەکارهێنانی خواردنەوە کحولییەکان کەمتر بووەتەوە، بەڵام بارگرانیی تەندروستی و کۆمەڵایەتی هێشتا بە بەرزی ماوەتەوە."

 

بەگوێرەی نەتەوە یەکگرتووەکان، لە ساڵی 2019 هەر کەسێکی سەرووی تەمەن 15 ساڵ 5.5 لیتر کحولی خواردووەتەوە، بەڵام لە ساڵی 2010 هەر کەسێک 5.7 لیتر کحولی خواردووەتەوە. زۆرترینی ئەو کەسانەی کە کحول دەخۆنەوە، لە وڵاتانی ئەورووپان. هەر کەسێک ساڵانە لە ئەورووپا 9.2 لیتر کحول دەخواتەوە، لەدوای ئەویش هاووڵاتییانی ویلایەتە یەکگرتووەکانی ئەمریکا دێت و ساڵانە هەر کەسێک 7.5 لیتر کحول دەخواتەوە. کەمترین رێژەی خواردنەوەی کحولیش لەو وڵاتانەیە کە زۆرینە موسڵمانن.