پسپۆڕێک: بەهۆی کەمجووڵەیی و قەڵەوییەوە شەکرەی جۆری دوو لەنێو منداڵان زیادبووە
رووداو - تەندروستی
بەڕێوەبەری سەنتەری شەکرە لە دهۆک رایدەگەیێنێت، زیادبوونی ژمارەی تووشبووانی شەکرەی جۆری دوو لەنێو منداڵان، بۆ کەمجووڵەیی و قەڵەوی دەگەڕێتەوە.
ئەمڕۆ یەکشەممە 24ـی تشرینی دووەمی 2024 د. وەلید مستەفا، پسپۆڕی نەخۆشییەکانی هەناو و بەڕێوەبەری سەنتەری شەکرە لە دهۆک بە رووداوی راگەیاند، وەکو سەنتەرەکە دەرمانەکانیان کوالێتیی بەرزن و دەکرێت تووشبووان پشتیان پێ ببەستن.
بە گوتەی د. وەلید مستەفا، ئەوانەی دەرمانەکانی شەکرەش بەکاردەهێنن، پێویستە وەرزش بکەن و پارێزی لە خۆراکیش بکەن، بۆ ئەوەی کاریگەریی دەرمانەکە زۆر بێت.
ئەوەش باسدەکات کە دوای تەمەنی 35 ساڵی، پشکنینی پێشوەختەی شەکرە بکرێت، بەتایبەت ئەوانەی لەنێو ماڵباتەکەیان تووشبووی نەخۆشییەکە هەیە.