هەڵەیەک روویدا! دووبارە هەوڵبدە
رووداو - تەندروستی
پسپۆڕێکی تەندروستیی گشتی رایدەگەیێنێت، قوتابخانەکان شوێنی فێربوونی هەزاران قوتابی و خوێندکارن، بۆ ئەوەی خوێندکاران بخوێنن پێویستە ژینگەیەکی تەندروست دابینبکەین بۆ خوێندکاران و مامۆستایان ئەمەش بە چەند ستانداردێکی زانستی دەبێت.
ئازاد حوسێن، بەکالۆریۆس لە تەندروستیی گشتی بە رووداوی راگەیاند، سەرەکیترین مەرجەکانی هەر قوتابخانەیەک پێویستە سەلامەتیی بینا و خۆراک و خواردنەوەکانی بێت.
ئازاد حوسێن ئەم مەرجە تەندروستی و سەلامەتییانەی خوارەوە باسدەکات؛
1- کوالێتیی بینای قوتابخانە: پێویستە لیژنەی سەلامەتی و ئەندازیاری دڵنیایی بدات لە گونجاویی قوتابخانەکە کە هیچ مەترسییەکی رووخان یان کەوتنی نییە.
2- نەبوونی هۆکاری برینداری و کەوتنی قوتابییان: واتە نابێت هیچ هۆکارێکی مەترسی برینداربوون و کەوتن هەبێت وەک رووکاری تیژ، شووشەی شکاو، قادرمە و پلیکانەی بەرزی بێ پەرژین.
3- دابینکردنی سیستمی هەوای جێگیری سارد و گەرمی بەشێوەیەک خوێندکار و مامۆستا ئاسوودەببن، دووربن لە نەخۆشکەوتن و چاودێریکردنی پلەی گەرمیی ژوور لەلایەن لیژنەی تەندروستیی قوتابخانەوە.
4- سیانەکردنەوەی کەموکوڕییەکان و کارەبایی قوتابخانە تاوەکو هیچ مەترسییەکی کارەبایی بوونی نەبێت.
5- دابینکردنی ئاوی خاوێن بۆ قوتابییان بەشێوەیەک گونجاو بێت لەڕووی تەندروستییەوە: وەکو دانانی بەڕاد و خاوێنکردنەوەی تانکی قوتابخانەکان، چونکە ئاوی ناخاوێن هۆکاری بڵاوبوونەوەی نەخۆشییە گوازراوەکانە.
6- دابینکردنی خۆراکی تەندروست لەنێو فرۆشگەی قوتابخانە: وەکو میوەی فرێش و شەربەتی فرێش و لەفەی هێلکە و ..هتد هەروەها قەدەخەکردنی خۆراکی فاستفوود و خواردنەوە گازییەکان.
7- پاککردنەوەی تەواوی قوتابخانە و باخچەی قوتابخانە تاوەکو قوتابی و مامۆستایان بەدووربن لە پێوەدانی مێروو و حەشەراتی زیانبەخش.
8- دابینکردنی توالێتی خاوێن و زاهی دەستشۆردن بۆ توالێتەکان.
9- پاکژکردنەوەی تەواوی قوتابخانە بە دەرمانی دژەمیکرۆب.
10- دروستکردنی لیژنەی تەندروستی و خاوێنی بەشێوەیەک چاودێریی قوتابخانە، فرۆشگە، خاوێنی قوتابییان و ژینگەی قوتابخانەکە بکات.
11- دانانی بۆکس و هەبوونی جانتا و پێداویستییەکانی فریاگوزاریی سەرەتایی و برینپێچی.
12- کردنەوەی خولی فریاگوزاریی سەرەتایی بۆ سەرجەم مامۆستایان لە پێناو پاراستنی گیانی قوتابییان.
13- پشکنین بۆ کارمەندان، ستافی فرۆشگە و چایخانەی قوتابخانەکان تاوەکو دڵنیاببینەوە کە ئەو کەسانەی خواردن ئامادەدەکەن و پێشکێشی دەکەن کەسانی تەندروستن و دوورن لە نەخۆشیی گوازراوە.
14- دانانی رێنمایی تەندروستی و هۆشیاری لە راڕەوەکان دەربارەی بایەخی دەستشووشتن، خۆپاراستن لە نەخۆشییە گوازراوەکان، مەترسییەکانی جگەرەکێشان، پاراستنی ژینگە و بایەخی پاراستنی ئاو... هتد.
15- دانانی هێماکانی خۆڕزگارکردن و راکردن لەکاتی دروستبوونی مەترسیی ئاگر و زەمین لەرزە و هەڵواسینی هێمای مەترسییەکانی کارەبا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ