پسپۆڕێکی نەخۆشییەکانی خوێن: 3٪ بۆ 5٪ـی تاکەکانی کۆمەڵگە هەڵگری تالاسیمیان
رووداو - تەندروستی
پسپۆڕێکی نەخۆشییەکانی خوێن رایدەگەیێنێت، 3٪ بۆ 5٪ـی تاکەکانی کۆمەڵگە هەڵگری تالاسیمیان و ئەو کەسانەش بە تووشبوو هەژمار ناکات.
د. بڕیار سەباح، پسپۆڕی نەخۆشییەکانی خوێن رایگەیاند، هەڵگرانی تالاسیمیا هیچ نیشانەیەکیان وەکو تووشبوو لەسەر دەرناکەوێت و نەخۆشییەکە هیچ مەترسییەکی بۆ ئەوان نییە.
بە گوتەی د، بڕیار سەباح، هەڵگرانی نەخۆشیی تالاسیمیا هیچ نیشانەیەکیان لێدەرناکەوێت، بەڵام پێویستە زیاتر بایەخ بە پشکنینەکانی پێش هاوسەرگیری بکەن.
ئەو پسپۆڕە ئاماژە بەوە دەکات کە ئەگەر هەر تووشبوویەک خوێن وەرنەگرێت و خوێنوەرگرتنی دوابکەوێت، ئەوا گۆڕانکاری لە روخساریار دروستدەبێت و پەستانی زۆر دەکەوێتە سەر دڵ بەمەش ئەگەری تووشبوونیان بە کێشانی دڵ و لوولەکانی خوێن زیاددەبێت، تەنانەت لە منداڵانیش لاوازیی گەشەی لێدەکەوێتەوە.
لە کۆتاییدا د. بڕیار سەباح دەڵێت: چاندنی مۆخ و چارەسەریی جینی بۆ بنبڕکردنی تالاسیمیان کە ئێستا لە شاری سلێمانی چاندنی مۆخ بەردەستە، بەڵام بەهۆی زۆریی نەخۆشەکان نۆرەی وەرگرتنی چارەسەرەکە درێژە.