سەنتەری گورچیلە لە تەلەعفەر دەکرێتەوە

 

 

تەلەعفەر قەزایەکە لە سنووری پارێزگای نەینەوا و ژمارەی دانیشتوانەکەی زیاتر لە 300 هەزار کەسە. شارەکە 70 کیلۆمەتر لە شاری موسڵی ناوەندی پارێزگاکەوە دوورە و بەشێکی سنوورەکەی ناوچە کوردستانی دەرەوەوەی ئیدارەی هەرێمی کوردستانە، لەوانە زوممار.

 

وەعد ئیدریس، بەڕێوەبەری راگەیاندنی نەخۆشخانەی تەلەعفەر، رۆژی شەممە، 24-08-2024، بە تۆڕی میدیایی رووداوی گوت: "سەنتەری شوشتنی گورچیلە لە نەخۆشخانەی گشتیی تەلەعفەر کراوەتەوە". 

 

بەڕێوەبەری راگەیاندنی نەخۆشخانەی تەلەعفەر دەڵێت، "سەنتەرەکە گرنگ و پێویستە، خزمەتگوزاری و ئاسانکاریی زۆرباش پێشکێش بە دانیشتوانی رۆژئاوای نەینەوا دەکات. لە کۆنترۆڵکردنی تەلەعفەرەوە لە دەست چەکدارانی داعش تاوەکو مانگی چواری ئەم ساڵ نەخۆشەکانی سنوورەکە ناچاربوون بچنە نەخۆشخانەکانی هەرێمی کوردستان، موسڵ و بەغدا و پارێزگاکانی باشوور. ئەوەش کات، بارگرانی و تێچووی زۆری دەخستە سەر نەخۆشەکان".

 

سەنتەرەکە 24 کاژێر کراوەیە و نەخۆشی ناوچەکانی کەسکێ تاوەکو قەزای شنگال و بەعاج وەردەگرێ؛ هەر نەخۆشێک هەفتانە 2 بۆ3 جار گورچیلەیان دەشۆرێ، ئەگەر پێویست بکات.

 

بەڕێوەبەری راگەیاندنی نەخۆشخانەی تەلەعفەر دەڵێ، سەنتەرکە 12 ئامێری شووشتنی گورچیلەی هەیە. پێنج قەرەوێڵە بۆ ژنان و پێنج قەروێڵە بۆ پیاوان تەرخان کراوە، ژوورێکی تایبەتی جیاکارەوە هەیە  کە دوو قەرەوێڵەیە بۆ ئەوانەی تووشی هەوکردنی جگەری ڤایرۆسی B و C بوون و گوتیشی: "تەنیا لە مانگی تەممووزدا 400 گورچیلەیان شووشتوە".