وەزارەتی تەندروستی: بەکارهێنانی کیسەی نایلۆن لە نانەواخانە، سەموونخانە و چێشتخانەکان قەدەخەیە
رووداو دیجیتاڵ
وەزارەتی تەندروستیی هەرێمی کوردستان لە نووسراوێکدا کە بۆ بەڕێوەبەرایەتییە گشتییەکانی تەندروستیی لە پارێزگا و ئیدارە سەربەخۆکانی کردووە، داوا دەکات بەکارهێنانی کیسەی نایلۆن لە چێشتخانە، نانەواخانە و سەموونخانەکان قەدەخە بکەن.
سامان بەرزنجی، وەزیری تەندروستیی هەرێمی کوردستان رۆژی 14ـی تەمموزی 2024، نووسراوێکی ئاراستەی بەڕێوەبەرایەتییەکانی گشتی تەندروستی لە پارێزگاکان و ئیدارە سەربەخۆکان و کۆیە کردووە، دەڵێت "جەخت لە دوو نووسراومان لە 29ـی ئاداری 2018 و 25ـی ئەیلوولی 2023 دەکەینەوە سەبارەت بە قەدەخەکردنی کیسەی نایلۆن و، بەکارهێنانی کیسەی کاخەز لە سەمونخانە و چێشتخانەکان بۆ ئەنجامدانی کاری پێویست و بەپەلە بۆ پەیڕەوکردنی و ئاگادارمان بکەنەوە."
د. سەرکار سوورچی، گوتەبێژی وەزارەتی تەندروستیی هەرێمی کوردستان لە لێدوانێکدا رایگەیاند "بەپێی بڕیارێکی وەزارەتی تەندروستیی حکومەتی هەرێمی کوردستان بەکارهێنانی کیسەی نایلۆن لە سەمونخانەکان و نانەواخانەکان و چێشتخانەکان قەدەخەکرا، بڕیارەکە بەو جۆرەیە لەمەودوا لە جیاتی کیسەی نایلۆن دەبێت کیسەی کاغەز بەکاربهێنرێ."
سەبارەت بە هۆکاری بڕیارەکەش گوتەبێژی وەزارەتی تەندروستیی هەرێمی کوردستان دەڵێت "لەڕووی زانستییەوە کیسەی نایلۆن زیانبەخشە بۆ تەندروستیی مرۆڤ و دەکرێت ببێتە هۆی سەرچاوەیەک بۆ تووشبوونی مرۆڤ بە شێرپەنجە."