هەڵەیەک روویدا! دووبارە هەوڵبدە
تەندروستی
ئەو ماڵەی لە گووندەکەی گەرمیان سیستمەکەی تێدا تەقییەوە - تانکی سیستمێکی گازی ماڵان. وێنە: رووداو
رووداو - تەندروستی
پسپۆڕێکی سەلامەتیی تەندروستی ئاشکرای دەکات، لاوازیی چاودێریی کۆنتڕۆڵکردنی کوالێتیی مادەکانی سیستمی گازی لە هەرێمی کوردستان هۆکارێکی سەرەکییە بۆ دووبارەبوونەوەی رووداوەکانی تەقینەوەی سیستمەکە.
سەر لە بەیانیی ئەمڕۆ یەکشەممە، لە گوندێکی ناحیەی قۆرەتوو لە گەرمیان، سیستمی گازی ماڵان تەقییەوە و بەهۆیەوە شەش کەس بریندار بوون، یەکێک لە بریندارەکان دوای گەیاندنی بە نەخۆشخانە گیانی لەدەستدا؛ شوان کەمال، پسپۆڕی سەلامەتیی تەندروستی بە رووداوی راگەیاند، بەشێکی زۆری ماڵەکان بەبێ ئاگادارکەرەوە و دانانی هەستەوەر سیستمەکەیان بەستووە.
بە گوتەی شوان کەمال، هۆکارە باوەکانی تەقینی سیستمی گازی ماڵان ئەمانەن؛
- زۆرینەی مادە و کەلوپەلەکان کولێتییان نزمە و بەرگەی بارودۆخی گەرم و سەخت ناگرن، بۆیە زووتر تێکدەچن و گاز دەردەدەن.
- ناشارەزایی و کەمیی لێهاتوویی دانەری سیستمی گازەکە، بەتایبەت ئەگەر بە شێوازێکی تووند و تۆڵ دانەنرێت.
- نەکردنی پشکنینی بەردەوامی سیستمەکە.
- پشتگوێخستنی دانانی ئامێری ئاگادارکەرەوە و هەستیار لەکاتی لێچوونی گاز.
- دەستکاریکردنی سیستمەکە بەبێ شارەزایی.
- نەبوونی کوالێتیی کۆنتڕۆڵ و چاودێری لەسەر ئەو کۆمپانیایانەی سیستمەکە دادەنێن و هاوردەی دەکەن.
شوان کەمال، پسپۆڕی سەلامەتیی تەندروستی پێشنیازدەکات، پێشگیری تەواو لەم خاڵانەی سەرەوە بکرێت و سیستمەکانیش هەمیشە پشکنین بکرێنەوە و چاودێریی زیاتریش بخرێتە سەر کۆمپانیاکانی دانان و دابینکردنی سیستمەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ