کۆرۆنا تووشبووانی شەکرە و بەرزەپەستانی خوێن زۆرتر بە جەڵتەی مێشك دەکوژێت
رووداو- هەولێر
توێژەرانی زانکۆی پەنسلڤانیا رایدەگەیێنن نەخۆشانی بەرزەپەستانی خوێن و شەکرە کە تووشی کۆرۆنا دەبن، مەترسی جەڵتەی مێشک و تەنانەت مردنیان زیاترە.
بەگوێرەی دوایین توێژینەوەی پزیشكانی زانکۆی پەنسلڤانیا دەرکەوتووە تووشبووانی شەکرە و بەرزەپەستانی خوێن بە گروپی مەترسیدار دادەندرێن ئەگەر تووشی کۆرۆنا ببن، چونکە مەترسی پاشهاتەکانیان بۆ نەخۆشییەکانی مێشك و دەمار زیاترە، هاوکات زۆرتر بە نەخۆشییەکە گیانلەدەستدەدەن.
پزیشكە توێژەرەکان لە ئەمریکاوە دەڵێن هۆکاری پشت مەترسییەکانی جەڵتەی مێشك ئەوەیە کە نەخۆشەکانی کۆرۆنا زۆرتر تووشی گرژبوونی لوولەکانی خوێن دەبنەوە، هاوکات خوێنیان خەستدەبێتەوە و زۆرتر تووشی جەڵتەی مێشك دەبن.
د. کۆلبی فریمان، سەرپەرشتیاری توێژینەوە ئەمریکییەکە لە زانکۆی پەنسلڤانیا دەڵێت مەترسییەکانی کۆرۆنا لە سنگ تێپەڕدەبن و مێشكیش دەگرنەوە، مەترسیی مردنیان بە پاشهاتەکانی وەک جەڵتەی مێشك، جەڵتەی دڵ و سییەکان زیاترە.
فریمان دەشڵێت هەرچەندە پاشهاتەکان دەگمەنن، بەڵام مەترسیی هەوکردنەکانی مێشك و جەڵتەی مێشک لەنێو تووشبووانی بەرزەپەستانی خوێن و شەکرە زیاترە.
لەبارەی هۆکاری پشت مەترسیی تووشبوون بە جەڵتەی مێشك لەنێو تووشبووانی بەرزەپەستانی خوێن و شەکرە بەهۆی کۆرۆنا، پزیشكەکان دەڵێن ئەو نەخۆشانە لوولەخوێنەکانیان لاوازترە و زۆرتر تووشی هەوکردنەکان دەبن، هەروەها بەهۆی جەڵتەی مێشک و خەستبوونەوەی خوێنیان، زۆرتر لە نەخۆشانی ئاسایی دەمرن.