ناوەندی کلیڤلاند لە ئەمریکا: میوزیک دڵەڕاوکێ و ئازاری تووشبووانی شێرپەنجە کەمدەکاتەوە

 

توێژەرانی توێژینەوەکە زانیارییەکانی ئەو تووشبووانەیان بەکارهێناوە، کە لەماوەی ساڵانی نێوان 2017 بۆ 2020  چارەسەری میوزیکییان بۆدەکرا و دەرکەوت، بەکارهێنەرانی چارەسەری میوزیکی بەروارد بەوانەی چارەسەرەکەیان بۆنەکراوە، شێوازی ژیانیان باشتر و گەشبینتر بوو، تەنانەت ئازاری ماسوولکەکانیشیان کە بەهۆی چارەسەرە کیمیاییەکانی شێرپەنجەوە دووچاریان دەبوو، کەمتربوو. 

 

سام رۆدگێرز، چارەسەرکاری میوزیکی بۆ تووشبووانی شێرپەنجە لە ناوەندی کلیڤلاند و سەرپەرشتیاری توێژینەوەکە دەڵێت: ''میوزیک ئازار و دڵەڕاوکێی تووشبووانی شێرپەنجە بە رێژەیەکی بەرچاو کەمدەکاتەوە، بەجۆرێک لەنێو تووشبووانی شێرپەنجەی خوێنی جۆری SCA، کاریگەریی ئەرێنی زۆرتر و شێوازی ژیانێکی باشتری هەبووە.''

 

سەرپەرشتیاری توێژینەوەکە روونیدەکاتەوە، چارەسەرە میوزیکییەکان بە شێوازی جیاواز بۆ بەشداربووان بەکاردەهاتن کە پێکهاتبوون لە 'نوسینەوەی گۆرانییەکان، دروستکردنی میوزیک، تۆمارکردنی گۆرانی و گوێگرتن لە میوزیکی تێڕوانین'، دەرکەوت چارەسەرەکان 1.48 یەکە ئازار و 2.58 یەکە دڵەڕاوکێ و 0.84 یەکە بێهێزیی ماسوولکەکانی تووشبووانی کەمدەکردنەوە.

 

لەکۆتاییدا دکتۆر سام دەڵێت: چارەسەریی میوزیکی دەتوانێت وەکو چارەسەرێکی تەواوکەر لەگەڵ دەرمانە کیمیاییەکان و چارەسەرە تیشکییەکانی شێرپەنجە لە باشترکردنی شێوازی ژیانی تووشبووان بەکاربێت، هەروەها وەکو ستراتیژیەتێک بۆ کەمکردنەوەی ئەو نیشانانەی کە لەوانەیە لەڕێگەی چارەسەرەکانەوە رووبەڕوویان ببنەوە پشتی پێببەسترێت.

 

ناوەندی دەرمان و خۆراک FDA لە ئەمریکا چارەسەری میوزیکی وەک چارەسەرێکی کاریگەر بۆ کەمکردنەوەی نیشانەکانی تووشبوون بە ئەلزەهایمەر، نەخۆشییەکانی دڵ، ئۆتیزم و گوشاری دەروونی پەسندکردووە.