تەندروستی
وێنەکە نەخۆشخانەیەکی تایبەت بە کۆرۆنایە لە هەولێر و بۆ روونکردنەوە لەسەر بابەتەکە دانراوە، وێنە: بڵند تاهیر - رووداو
رووداو - هەولێر
بەڕێوەبەری ناوەندی بەرەنگاربوونەوەی کۆرۆنای ورمێ دۆخی مەترسیداری لەو پارێزگایە راگەیاند و دەڵێت؛ سێ شاری پارێزگای ورمێ لە دۆخی "زۆر مەترسیدار" و شارەکانی دیکەش لە دۆخی مەترسیدار و هۆشداریدان.
جەلیل مووسەوی، بەڕێوەبەری ناوەندی بەرەنگاربوونەوەی کۆرۆنای ورمێ رایگەیاند؛ شاری خۆی، ماکۆ و میاندوواو لە پارێزگای ورمێ لە دۆخی "سوور و زۆر مەترسیداردان" و شارەکانی ورمێ، تکاب، چایپارە، شەڵماش، سەردەشت، شووت و نەغەدە لە دۆخی پرتەقاڵی و مەترسیداردان. هەروەها شارەکانی دیکەش لە دۆخی زەرد و هۆشداریدا تۆمارکراون.
جەلیل مووسەوی ئاشکرای کرد کە هەر ئێستا 389 تووشبووی کۆرۆنا لە نەخۆشخانەکانی پارێزگای ورمێ خەوێندراون و لەژێر چاودێریدان، لە 24 کاژێری رابردووشدا 128 تووشبووی نوێی کۆرۆنا تۆمارکراون و شەش کەسیش بەو پەتایە گیانیان لەدەستداوە.
بەگوتەی بەڕێوەبەری ناوەندی بەرەنگاربوونەوەی کۆرۆنای ورمێ، 84.4٪ی دانیشتووانی تەمەن پێنج ساڵ بەرەوژووری پارێزگای ورمێ، قورچکی یەکەم، 75.5٪ قورچکی دووەم و 34.3٪یش قورچکی سێیەمی پێکوتەی کۆرۆنایان وەرگرتووە. دەشڵێت؛ تەنیا 1.2٪ خەڵک قورچکی چوارەمیان وەرگرتووە.
ماوەی زیاتر لە سێ هەفتەیە دۆخی کۆرۆنا لە ئێران و رۆژهەڵاتی کوردستان بەرەو هۆشدار و مەترسیدار هەڵکشاوە و بەرپرسانی وەزارەتی تەندروستی هۆشداریی دەدەنە خەڵک و داوای وەرگرتنی قورچکی سێیەم و چوارەمی پێکوتەی کۆرۆنایان لێدەکەن.
پارێزگای ورمێ لە دۆخە مەترسیدارەکاندا دەستنیشان کراوە و تاوەکو ئێستا حەوت هەزار و 679 کەس لەو پارێزگایە بە کۆرۆنا گیانیان لەدەستداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ