چۆن بە تەندروستی دەنگ دەدەیت؟

 

د. دلین حوسێن ئاکرەیی، پسپۆڕی پزیشکیی خێزانی و بەرپرسی راگەیاندنی کۆمەڵەی پسپۆڕانی پزیشکیی خێزانی بە رووداوی راگەیاند، ''پێش چوونە بنکەکانی دەنگدان بایەخ بە خواردنەوەی ئاو و شلەمەنی بدرێت، تاوەکو جەستە لە وشکبوونەوەی بپارێزرێت'' کە ئەمە سوودیشی دەبێت بۆ باشترخوێندنەوەی پەنجەمۆر.

 

رۆژی هەیینی 18-10-2024 دەنگدانی تایبەت بۆ خولی شەشەمی پەرلەمانی کوردستان بەڕێوەچوو و ئەنجامە بەراییەکانیش دەرچوون، بەیانی یەکشەممە 20-10-2024 دەنگدانی گشتی ئەنجامدەدرێت.

 

 

 

د. دلین ئاکرەیی: چەند گرووپێک هەن کە ئەگەری تێکچوونی دۆخی تەندروستییان هەیە وەکو؛

 

- بەساڵاچووان

- تووشبووانی نەخۆشییە درێژخایەنەکانی وەکو 'بەرزەپەستانی خوێن، شەکرە و رەبۆ'

- تووشبووانی نەخۆشیی شێرپەنجە

- ئەوانەی گورچیلەیان بۆ چاندراوە، چونکە بەرگریی جەستەیان لاوازە

- خانمانی دووگیان

- تووشبووانی رۆماتیزم و نەخۆشیی جومگە و بڕبڕەکانی پشت

- ئەوانەی گەشکەیان هەیە

- ئەوانەشی کە ترس 'فۆبیا'ـیان هەیە لە شوێنی قەرەباڵخ

 

 

د. دلین ئاکرەیی: پێویستە هەمیشە بایەخ بە خواردنەوەی ئاو بدەن یاخود شەبەتی سرووشتییان پێبدرێت، هەروەها نابێت راستەوخۆ تیشکی خۆریان بەربکەوێت و خۆیان بپارێزن، ئەوانەشی کە شەکرەیان دادەبەزێت، پێویستە خۆراکێکی شیرین لە گیرفانیان بێت.

 

 

د. دلین ئاکرەیی: دەشێت ئەم رێنوێنییانەی خوارەوە جێبەجێبکرێن؛

 

- خواردنەوەی ئاو و شلەمەنی بۆ رێگری لە وشکبوونەوەی جەستە

- خواردنی میوە

- خواردنی خۆراکە پڕۆتینی و ریشاڵییەکان

 

 

د. دلین ئاکرەیی: پێویستە ئەوانەی پەتای وەرزییان هەیە دەمامک ببەستن، هەروەها ئەوانەشی کە بەرگریی جەستەیان لاوازە یان نەخۆشییە درێژخایەنەکانی کۆئەندامی هەناسەدانیان هەیە پێویستە دەمامک ببەستن.

 

 

د. دلین ئاکرەیی: شۆردنی دەستەکان پێش و پاش پڕۆسەی دەنگدان گرنگە بۆ رێگریکردن لە تووشبوون بە میکرۆبەکان و هەوکردنە تووندەکان، هەروەها پێویستە بێدەنگی لەنێو بنکەکانی دەنگدان بپارێزرێت و هیچ درووشمێک نەگوترێتەوە، ئەمەش بۆ پاراستنی دەروونی دەنگدەران گرنگە.