رووداو - تەندروستی
ولایەتە یەکگرتووەکانی ئەمریکا کار لەسەر خۆپارێزی و رێگریکردن لە نەخۆشییە جیهانییە مەترسیدارەکان دەکات بەوەی کە رێککەوتن لەگەڵ 50 وڵات دەکات بۆ ئەوەی رووبەڕووی پەتای جیهانیی ببنەوە؛ زۆرینەیان وڵاتانی ئاسیا و ئەفریقان.
ئیدارەی بایدن لە راگەیێندراوێکدا ئاشکرای دەکات، ئەمریکا هاوبەشیی لەگەڵ زیاتر لە 50 وڵاتی دیکە دەکات بۆ رێگریکردن لە نەخۆشییە گوازراوەکان وەکو کۆڤید-19 و پەتای داهاتوو کە ناسراوە بە نەخۆشیی X.
جۆ بایدن، سەرۆکی ئەمریکا لە لێدوانێکدا کە لە لایەن کۆشکی سپی بڵاوکراوەتەوە دەڵێت، "ئیدارەکەم ستراتیژیەکی نوێی ئاسایشی تەندروستیی جیهانی داڕشتووە بۆ رێگریکردن، دیاریکردن و دروست مامەڵەکردن لەگەڵ هەر هەڕەشەیەکی بایۆلۆژی".
جۆ بایدن دەشڵێت، ''ئەمە هەنگاوێکی باشدەبێت بۆ پاراستنی تەندروستیی هاووڵاتییان لە ئەمریکا و تەواوی جیهان''.
هەر لەم بارەیەوە کۆشکی سپی رایدەگەیێنێت، هەر یەک لە وەزارەتی دەرەوەی ئەمریکا، ناوەندی کۆنتڕۆڵ و پێشگیرکردن لە نەخۆشییەکان لە ئەمریکا، وەزارەتی تەندروستی و کاروباری مرۆیی و ئاژانسی گەشەسەندنی نێودەوڵەتیی ئەمریکا بەشدارن لەم هەنگاوە، تەنانەت ئەوەش ئاشکرادەکات، زۆرینەی وڵاتانی بەشداربوو بۆ رووبەڕووبوونەوەی پەتای داهاتو وڵاتانی ئەفریقا و ئاسیان.
پسپۆڕان هۆکاری ئەوەش بۆ ئەوە دەگەڕێننەوە کە ئەو وڵاتانە کۆنتڕۆڵکردنی پەتاکانیان قورسە و خزمەتگوزاریی تەندروستی تیایاندا سنووردارە بۆیە جەختی زۆریان لەسەر دابینبکردنی رێکارەکانی خۆپاراستن لە پەتاکان دەکەنەوە.
ناوەندی کۆنتڕۆڵ و پێشگیریکردن لە نەخۆشییەکان CDC لە ئەمریکا پێی وایە، نەخۆشییە گوازراوەکان وەکو کۆڤید-19 تائێستاش مەترسییە لەسەر تەندروستیی جیهانی و ئەم رێکارانەی دەگیرێنە بەر بە پێویست دەزانرێن بۆ رێگریکردن لە هەر نەخۆشییەکی دیکەی گوازراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ