رووداو - تەندروستی
نوێترین راپۆرتی رێکخراوی تەندروستیی جیهانی و سندووقی نەتەوە یەکگرتووەکان بۆ منداڵان دەریدەخات، رێژەی تووشبوونی منداڵان بە نەخۆشییە دەروونییەکان زیادبووە.
راپۆرتە هاوبەشەکەی WHO و UNICEF ئاشکرای دەکات، لە جیهاندا لە حەوت منداڵ یەکێکیان تووشبووی نەخۆشییەکی دەروونییە، کە زۆرینەیان تەمەنیان لەنێوان 10 تاوەکو 19 ساڵانە.
دیڤۆرا کاستیل، بەرپرسی نەخۆشییە دەروونییەکان لە رێکخراوی تەندروستیی جیهانی دەڵێت: ''دڵەڕاوکێ، خەمۆکی و تێکچوونی رەفتار باوترین کێشە دەروونییەکانی نێو نەوجەوانانن''.
ئەوەش باسدەکات کە وڵاتە کەمداهات و داهاتمامناوەندەکان زۆرترین تووشبووانیان تێدایە.
لەکۆی شەش مانگی ئەمساڵدا لە نەخۆشخانەی دەروونیی هەولێر، حەوت هەزار و 656 کەس لە راوێژکاری گەوران و 996 منداڵیش لە راوێژکاری منداڵان بینراون، بەراورد بە شەش مانگی ساڵی رابردوو پێنج هەزار و 838 کەس لە راوێژکاریی گەوران و هەزار و 495 لە راوێژکاریی منداڵان بینراون.
بەپێی ئەو ئامارانەی دەست تۆڕی میدیایی رووداو کەوتوون، تەنیا لە نەخۆشخانەکە لە نۆ مانگی ئەمساڵدا، رێژەی تووشبووانی خەمۆکی 32٪ لەنێو گەوران و 6٪ لەنێو منداڵان تۆمارکراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ