رووداو - تەندروستی
ناوەندی خۆراک و دەرمان لە ئەمریکا FDA رایدەگەیێنێت، تاوەکو کۆتایی مانگی تشرینی یەکەم باشترین کاتی وەرگرتنی ڤاکسینی ئەنفلەوەنزایە.
ناوەندەکە ئاماژە بەوەدەکات، ئەوانەی دەیانەوێت لە وەرزی سەرما و ئەنفلەوەنزادا بەرگریێکی تۆکمەیان هەبێت، پێویستە بە زویی ڤاکسینی ئەنفلەوەنزا وەربگرن.
ناوەندەکە دەریدەخات، ڤایرۆسەکانی ئەنفلەوەنزا بە شێوەیەکی گشتی لە پایز و زستاندا بڵاودەبنەوە، چالاکییەکانیش لە نێوان مانگی کانوونی دووەم و شوبات دەگاتە لوتکە، کوتان لە پایزدا دەتوانێت ئەگەری تووشبوون بە ئەنفلەوەنزا کەمبکاتەوە.
FDA ئاماژەی بەوەشکردووە، ڤاکسینی ئەنفلەوەنزای ساڵانە ئەو سێ جۆرە ئەنفلەوەنزایە دەکاتە ئامانج کە زۆرترین ئەگەری بڵاوبوونەوەیان هەیە و دەبنە هۆی نەخۆشی.
دکتۆر رۆبێرت کالف، بەڕێوەبەری ناوەندی خۆراک و دەرمان لە ئەمریکا دەڵێت، ''ساڵانە خەڵک پێویستیان بە دەرزی ئەنفلەوەنزا هەیە، چونکە ڤایرۆسەکان بە خێرایی خۆیان دەگۆڕن بۆ فۆڕمی نوێ و هەوڵدەدەن خۆیان لە بەرگری پێشوو بپارێزن''.
بەگوێرەی ناوەندی کۆنتڕۆڵ و پێشگیریکردن لە نەخۆشییەکان لە ئەمریکا CDC، لە ساڵی 2023 نزیکەی 50 ملیۆن کەس بەهۆی ئەنفلەوەنزاوە نەخۆشکەوتوون و زیاتر لە 40 هەزار کەس بەهۆی نەخۆشییەکە گیانیانلەدەستداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ