وەزارەتی تەندروستیی هەرێمی کوردستان: بە وردی چاودێریی بڵاوبوونەوەی نەخۆشیی ئاوڵەی مەیموون دەکەین

 

وەزارەتی تەندروستی بۆ رێگریکردن لە بڵاوبوونەوەی ئەو نەخۆشییە، ئەمڕۆ کۆبوونەوەیەکی لەگەڵ رێکخراوی تەندروستیی جیهانیی کردووە و دەڵێت، بەیانی رێکارەکانی خۆپارێزی و ئامادەکارییەکان ئاشکرا دەکەن.

 

بەگوێرەی راگەیێندراوێکی وەزارەتی تەندروستیی هەرێمی کوردستان، بڕیاریان داوە لیژنەی باڵای یەک تەندروستی (One Health) کە لیژنەیەکی باڵای هاوبەشە لەنێوان وەزارەتی تەندروستی و وەزارەتی کشتوکاڵ دابنرێت. 

 

بڕیارێکی دیکەی وەزارەتی تەندروستی بریتییە لە: "پەیامەکانی تەندروستی بۆ هاوڵاتییان و گەشتیاران دابنرێت بۆ هۆشیاری تەندروستی و هەڵمەتی راگەیاندن و رۆشنبیری تەندروستی، هەروەها ئامادەکاریی دابینکردنی تێستی پشکنینی تاقیگەیی لەگەڵ رێکخراوی تەندروستیی جیهانی ئەنجام دەدرێت وە لایەنە پەیوەندارەکان لەم رێکارانە ئاگار دەکرێنەوە.

 

لە کۆتایی راگەیێندراوەکەدا، وەزارەتەکە دەڵێت: تائێستا هیچ حاڵەتێکی گومانلێکراو نییە و بە وردی چاودێریی دۆخی ئەم نەخۆشییە دەکەین، تەواوی ئامادەباشی و ئامادەکاری دەکەین".

 

نەخۆشیی ئاوڵەی مەیموون ڤایرۆسییە و لە ئاژەڵەوە بۆ مرۆڤ دەگوازرێتەوە. هۆکارەکانی گواستنەوەی نەخۆشییەکە بریتین لە: 

 

- دەستلێدان 

- ماچکردن

- سێکسکردن

- بەکارهێنانی پەڕۆ، جلوبەرگ و دەرزیی بەکارهاتووی کەسی تووشبوو

 

نیشانەکانی نەخۆشییەکە:

 

- تا

- پەڵەی پێست

- سەرئێشە

- ئازاری ماسوولکەکان

- بێهێزی

- ئاوسانی لیمفەگرێیەکان

 

هاوکات ڤاکسین تاکە رێگەی پێشگیریکردنە لە نەخۆشییە ڤایرۆسییەکە و بە گوتەی بەڕێوەبەری پڕۆگرامی فریاگوزاریی WHO، نیو ملیۆن قورچکی ڤاکسینەکە ئامادەیە و چاوەڕوان دەکرێت تاوەکو کۆتایی ئەم ساڵ ژمارەی ڤاکسینەکان بگەیێندرێتە 2.4 ملیۆن قورچک.