رووداو - تەندروستی
لە نێوەڕاستی ئەم هەفتەیە پارێزگاری هەڵەبجە لە نەخۆشخانەیەکی هەولێر نەشتەرگەریی دڵی بۆ کرا و ئەو پزیشکەی نەشتەرگەرییەکەی کردووە دەڵێت: پێنج خوێنبەریان بۆ چاندووە.
ئەمڕۆ چوارشەممە 17ـی تەممووزی 2024 د. هیوا مستەفا، پسپۆڕی نەشتەرگەرییەکانی دڵ و لوولەکانی خوێن و سەرپەرشتیاری تیمی نەشتەرگەرییەکەی ئازاد تۆفیق، پارێزگاری هەڵەبجە بە رووداوی راگەیاند، نەشتەرگەرییەکە سێ کاژێری خایاند و ئێستا دۆخی تەندروستیی پارێزگاری هەڵەبجە جێگیرە.
د. هیوا مستەفا، پسپۆڕی نەشتەرگەرییەکانی دڵ و لوولەکانی خوێن دەڵێت: پێنج خوێنبەری دڵیان بۆ ئازاد تۆفیق چاندووە، چونکە دووچاری گیرانی خوێنبەرەکانی دڵی بووبوو، هەروەها گوتی، ئازاری لای چەپی سینگی هەبووە و بە قەستەرە دەرکەوت کە خوێنبەرەکانی دڵی گیراون.
ئەو پسپۆڕە ئاشكرای دەکات، ئەو کەسانەی ئەو جۆرە نەشتەرگەرییەیان بۆ دەکرێت پێویستە خۆراکی چەور کەمبکەنەوە و بایەخ بە جووڵە و چالاکیی جەستەیی رۆژانەش بدەن، تەنانەت دووربکەونەوە لە کێشانی جگەرە و نێرگەلە.
لە کۆتایی قسەکانیدا ئاماژەی بەوەکرد، ''ئازاد تۆفیق، پارێزگاری هەڵەبجە دۆخی تەندروستیی جێگیرە و ئێستا دەتوانێت بەپێ بڕوات و جووڵەکانی ئاسایی بوونەتەوە، هاوکات لە چەند رۆژی داهاتووشدا نەخۆشخانە بەجێدەهێڵێت''.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ