رووداو - تەندروستی
توێژینەوەیەک لە سەنگاپوور ئاشکرای دەکات، ئەوانەی رۆژانە میوە دەخۆن، ئەگەری تووشبوونیان بە خەمۆکی و خەمباری لە تەمەنی بەساڵاچووندا کەمدەبێتەوە.
توێژینەوەکە لە زانکۆی نیشتمانیی سەنگاپوورا کرا و دەرکەوت، ئەوانەی لە نێوەڕاستی تەمەنیاندا رۆژانە قاپێک میوەی هەمەڕەنگ دەخۆن، کەمتر هەست بە خەمۆکی دەکەن لە بەساڵاچووندا، ''هۆکارەکەشی بۆ ئەو مادانەی نێو میوە دەگەڕێتەوە کە خانەکانی مێشک بەهێزدەکەن و دەیانپارێزن لە پووکانەوە''.
زیاتر لە 14 هەزار کەس بەشداری توێژینەوەکە بوون و سەرپەرشتیاری توێژینەوەکە دەڵێت، ئەوانەی دوو ژەم میوەیان خواردووە، 21٪ کەمتر تووشی خەمۆکی بوون بەراورد بەوانەی میوەیان نەخواردووە.
هویکی لی، سەرپەرشتیاری توێژینەوەکە دەشڵێت: میوەکان دەوڵەمەندن بە مادە دژەئۆکسێنەکان و ریشاڵەکان کە خانەکانی جەستە لە پیربوون دەپارێزن و چالاکیی زیاتریش بە خانەکانی مێشکیش دەدەن، هەروەها هەوکردنەکان کەمدەکەنەوە.
هویکی لی ئەوەشی ئاشكراکرد کە سەوزەکان هیچ کاریگەرییان لەسەر خەمۆکی نەبووە.
بەپێی مایۆکلینیک، پاشهاتەکانی خەمۆکی لەسەر مێشک بریتین لە؛
- خەمخواردن و نەبوونی مەزاج
- هەستکردن بە بێ هیوایی
- هەستکردن بە تاوان و ئازاردانی خود
پاشهاتەکانی خەمۆکی لەسەر جەستە؛
- قسەکردن و جووڵەکردن زۆر بە هێواشی بەراورد بە پێشتر
- نەمانی ئارەزووی خواردن
- قەبزی
- تێکچوونی خەو
- نەمانی ئارەزووی سێکسی
پاشهاتەکانی خەمۆکی لەسەر لایەنی کۆمەڵایەتی؛
- کەمیی تێکەڵاویی کۆمەڵایەتی
- پشتگوێخستنی حەز و ئارەزووەکان
- قورسی لە کارکردن و ژیانی رۆژانە
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ