رووداو - تەندروستی
پسپۆڕێکی نەشتەرگەرییەکانی ئێسک، شکان و جومگە رایدەگەیێنێت، قەڵەوی هۆکارێکی سەرەکییە بۆ پچڕانی بەستەری ئەژنۆ و هەر کیلۆگرامێکی زیاد، پێنج کیلۆگرام پەستان دەخاتە سەر ئەژنۆکە.
د. هونەر محەممەد، پسپۆڕی نەشتەرگەرییەکانی ئێسک، شکان و جومگە بە رووداوی راگەیاند، لەکاتی بوونی تەقینی کڕکڕاگەی ئەژنۆ پێویستە بە زووترین کات نەشتەرگەری بکرێت و جیاوازە لە پچڕانی بەستەری ئەژنۆ، چونکە کاریگەریی لاوەکیی زیاتری دەبێت.
بەپێی د. هونەر محەممەد، کەمیی ڤیتامین D و مادەی ئاسن هیچ کاریگەرییەکی لەسەر پچڕانی بەستەری ئەژنۆ نییە.
دەقی وەڵامەکانی د. هونەر محەممەد، پسپۆڕی نەشتەرگەرییەکانی ئێسک، شکان و جومگە لەبارەی پچڕانی بەستەری ئەژنۆ؛
رووداو: کێن ئەوانەی مەترسیی پچڕانی بەستەری ئەژنۆیان زۆرە؟
د. هونەر محەممەد: کێشەکە لەو کەسانە بڵاوە کە وەرزشی بەهێزکردنی ماسوولکەکانی دەوروبەری ئەژنۆکان ناکەن و بەبێ خۆگەرمکردنەوە وەرزش دەکەن، یاخود ئەوانەن کە زیاد لە توانایان پەستان دەخەنە سەر خۆیان لەکاتی وەرزش.
رووداو: نیشانەکانی پچڕانی بەستەری ئەژنۆ چین، هەروەها لەگەڵ تەقینی کڕکڕاگە چ جیاوازییەکیان هەیە؟
د. هونەر محەممەد: نیشانەکانی پچڕانی بەستەری ئەژنۆ دەکرێت بە شێوەیەکی گشتی ئەمانە خوارەوە بن؛
- هەستکردن بە کرتەیەکی دەنگبەرز.
- لەماوەی چەند کاژێرێک بە تەواوی ئەژنۆی دەئاوسێت بەهۆی خوێنبەربوون لە بەستەرەکەوە.
- لەدوای زیاتر لە مانگێک ئاوسان و ئازارەکەی نامێنێت، بەڵام جومگەکە بە ناجێگیری دەمێنێتەوە، ئەگەر کەسەکە بگەڕێتەوە نێو یاریگە هەمان حاڵەت دووبارەدەبێتەوە و بەوهۆیەشەوە زەبرەکە دەچێتە سەر کڕکڕاگەی هیلالی.
بەڵام نیشانەکانی تەقینی کڕکڕاگەی ئەژنۆ دەشێت ئەمانە بن؛
- ئازار و کرتەکرت لەکاتی نوشتانەوەی ئەژنۆ.
- درەنگئاوسانی ئەژنۆ، بەجۆرێک لەدوای تەقینی کڕکڕاگەکەوە دەستپێدەکات.
- لەکارکەوتنی جومگە.
رووداو: چارەسەرەکانی پچڕانی بەستەری ئەژنۆ چین؟
د. هونەر محەممەد: بەستەری ئەژنۆ دوای پچڕان بە هیچ شێوەیەک یەکناگرێتەوە، جۆری چارەسەرەکەش دەکەوێت سەر کەسەکە بۆ نموونە، ئەگەر کەسێک وەرزشڤان بێت و خوار 40 ساڵان بێت ئەوا پێویستە نەشتەرگەری بۆ بکرێت، ئەگەریش کەسێک سەروو 50 ساڵان بێت و چالاکیی ئاسایی رۆژانەی هەبێت، ئەوا نەشتەرگەری پێویست نییە، بەمەرجێک کە کڕکڕاگەی هیلالی سەلامەت بێت.
هەروەها لەکاتی بوونی تەقینی کڕکڕاگەی ئەژنۆ پێویستە بە زووترین کات نەشتەرگەری بکرێت و جیاوازە لە پچڕانی بەستەری ئەژنۆ، چونکە کاریگەریی لاوەکیی زیاتری دەبێت.
رووداو: چی بکرێت بۆ پێشگیریکردن لە پچڕانی بەستەری ئەژنۆ؟
د. هونەر محەممەد: نابێت وەرزشی قورس بکرێت کە زیاد لە توانای کەسەکە بێت و پێویستە ماسوولکەکانی دەوروبەری ئەژنۆ بەهێزبکرێن، هەروەها پێویستە لەکاتی نیشانەکانی پچڕانی بەستەرەکە، نەشتەرگەری بکرێت، بۆ ئەوەی زیان بە کڕکڕاگە نەگەیێنێت و نەخۆشییەکە ئاڵۆزتر نەبێت. تەنانەت راکردن بە هێواشی بەستەرەکە بەهێزدەکات و پاڵپشتیدەکات.
رووداو: ئەوانەی نەشتەرگەریی چاکبوونەوەی پچڕانی بەستەری ئەژنۆیان بۆ دەکرێت، دوای نەشتەرگەرییەکە چی بکەن؟
د. هونەر محەممەد: چارەخوازەکە پێویستە چارەسەری سرووشتی بکات کە نزیکەی دوو مانگ دەخایێنێت، تاوەکو تەندروستی و فەرمانی جومگە چارەکراوەکەی ئاسایی ببێتەوە.
رووداو: ئەگەر کەسێک ڤیتامین D و ئاسنی کەم بێت، کاریگەریی دەبێت لەسەر پچڕانی بەستەری ئەژنۆ؟
د. هونەر محەممەد: نەخێر هیچ کاریگەرییەکیان لەسەر کێشەکە نییە.
رووداو: قەڵەوی چ کاریگەرییەکی دەبێت لەسەر پچڕانی بەستەری ئەژنۆ؟
د. هونەر محەممەد: قەڵەوی کێشەیەکی سەرەکی و باوە بۆ ئەژنۆکان، بەجۆرێک هەر کیلۆگرامێکی زیاد لە کێش، لە بەرامبەردا پێنج کیلۆگرام پەستان دەخرێتە سەر ئەژنۆکە، هەربۆیە پچڕانی بەستەری ئەژنۆ لە کەسانی کێشڕێک کەمترە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ