رووداو - تەندروستی
یوتیوبەرێکی بەریتانی وەکو ئاڵنگارییەک زیاتر لە 250 هەزار هەنگاوی لە ماوەی هەفتەیەکدا بڕی، بەڵام گۆڕانکارییەک لە جەستەی روویدا و بووە جێی سەرنجی بینەرانی.
جاک ماسی وێڵش، یوتیوبەری بەریتانیی تەمەن 28 ساڵ هەر رۆژێک زیاتر لە 36 هەزار هەنگاو بەپێ دەڕۆیشت و لە ڤیدیۆیەکی یوتیوبیدا دەڵێت: ''209.42 کیلۆمەتر کە دەکاتە 254 هەزار و 126 هەنگاوم بڕیوە بە 35 کاژێر و نیو''.
تەنانەت ئەو ئاماژە بەوەدەکات، پارێزی لە خۆراک نەکردووە، بەڵکو 150 گرام پڕۆتینیشی رۆژانە خواردووە بۆ ئەوەی ماسوولکەکانی بەهێزبن و بەرگەی ئەو پەستانە زۆرەی هەنگاونان بگرن.
جاک دەڵێت: یەکەم و دووەم رۆژ دۆخی باش بووە، بەڵام دواتر هەستی بە سووتانەوە و کزانەوەی قاچەکانی کردووە، لە روونکردنەوەکانیدا گوتی، تاکە بەربەستی بەردەم ئاڵنگارییەکەی، ئازاری جومگەکان و ئاوسانی قاچەکانی بووە.
لە ماوەی هەفتەکە بۆی دەرکەوت، کیلۆیەک لە کێشی کەمکردووە و رانەکانی نیو سانتیمەتر ئەستوور بوون، جگە لەمانەش توێژینەوەیەکی گۆڤاری JAMA دەریدەخات، رۆژانە 10 خولەک بەپێ رۆیشتن دەکرێت ماسوولکەکان بەهێزبکات و چالاکییەکانی دڵ و سییەکانیش باشتربکات، و مەترسیی تووشبوون بە جەڵتەش کەمبکاتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ