پسپۆڕێک: ئێستا نەخۆشیی شەکرەی جۆری دوو لەنێو منداڵاندا زیادبووە

 

ئەمڕۆ پێنجشەممە 14-11-2024 د. دیلان رەمزی، پسپۆڕی نەخۆشی و گەشەی منداڵان بە رووداوی راگەیاند، قەڵەوی، بێهێزی و رەشبوونی مل و بنباڵ دەکرێت نیشانەی شەکرە بن لە منداڵاندا.

 

بە گوتەی د. دیلان رەمزی، حەزی منداڵ بۆ شیرینییەکان و خۆراکە خێراکان وادەکات زیاتر قەڵەو ببن، ئەمەش ئەگەری تووشبوونیان بە نەخۆشیی شەکرە زیاددەکات.

 

د. دیلان باسی یەکێک لە کەیسەکانی نۆرینگەکەی دەکات و دەڵێت: ''پێش سێ هەفتە دایکێک منداڵەکەی هێنایە نۆرینگە کە قەڵەو بوو و هاتبوو بۆ کێشەی هەناسەتەنگی، بەڵام ملی رەش بووبووەوە کە ئەمەش نیشانەیەکی شەکرەیە و دوای پشکنین، پشتڕاستبووەوە کە تووشبووە''. 

 

پێشنیازدەکات بۆ دایک و باوکان، میوە و میوەی وشککراو یاخود سەرچاوەی شەکرە سرووشتییەکان لە بری شیرینییەکان بدەن بە منداڵ و بایەخیش بە شێوازی ژیانی تەندروست بە منداڵ بدەن.