رووداو - تەندروستی
توێژینەوەیەکی زانکۆی بێرمینگهام لە بەریتانیا دەریدەخات، شێرپەنجەی هێلکەدان کە یەکێکە لە مەترسیدارترین شێرپەنجەکان لە خانماندا، دەکرێت بە پێشوەختە پشکنین پێشگیری لێبکرێت و بەزوویی چارەسەربکرێت.
لەم توێژینەوەیەدا هەزار و 790 خانم پشکنینیان بۆ کراوە و دەرکەوتووە، زوودەستنیشانکردنی شێرپەنجەی هێلکەدان چارەسەر ئاساندەکات و درەنگ دەستنیشانکردنی ئەم شێرپەنجەیە شانسی چاکبوونەوە و رزگاربوون لێی بۆ 13٪ دادەبەزێنێت.
دکتۆر سوزا سوندەر، پسپۆڕی نەخۆشییەکانی ئافرەتان و سەرپەرشتیاری توێژینەوەکە دەڵێت، ''خانمان دەبێت ساڵانە پشکنینی پێشوەختە ئەنجامبدەن بەتایبەت کە شێرپەنجەی مەمک و هێلکەدان زۆر باون لە ئێستادا''.
بەگوێرەی کۆمەڵەی شێرپەنجە لە بەریتانیا، شێرپەنجەی هێلکەدان شێرپەنجەیەکی بەربڵاوی نێو خانمانە، ناڕێکی شێوازی ژیان مەترسیی تووشبوون بەم شێرپەنجەیە زیاددەکات و ساڵانە نزیکەی 7 هەزار و 500 خانم لە بەریتانیا تووشی ئەم شێرپەنجەیە دەبن.
بەپێی مایۆکلینیک، رەنگە لە سەرەتادا نیشانەکانی ئەم شێرپەنجەیە دەرنەکەون تاوەکو زیاتر پەرەدەسێنێت و دەگاتە قۆناخەکانی بڵاوبوونەوە بۆ ئەندامەکانی دیکە، دەکرێت تووشبوو هەست بە نیشانەکانی وەکو 'ئاوسانی سک، دەبەزینی لەناکاوی کێش، ماندوویێتی، ئازاری پشت و زۆر میزکردن' بکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ