پسپۆڕێکی ژینگە: ئاوی بەلووعە زۆر لە ئاوی بتڵەکان خاوێنترە

 

ئەمڕۆ چوارشەممە 14ـی ئابی 2024 د. چیا مەعرووف، پسپۆڕی ژینگە بە رووداوی راگەیاند، پلاستیکی بتڵی ئاوەکان پلەی گەرمیی سەروو 25 پلەی سیلیزییان بەربکەوێت، مادەی شێرپەنجەیی و مەترسیدار دروستدەکەن کە تێکەڵی ئاوەکە دەبن.

 

د. چیا مەعرووف، پسپۆڕی زانست و تەندروستیی ژینگە دەڵێت: ''ئاوی بەلووعە زۆر لە ئاوی بتڵەکان خاوێنترە''، هۆکارەکەشی بۆ ئەوە گەڕاندەوە کە ئاوی بتڵە پلاستیکییەکان زۆر هەستیارە و دەشێت ئەو پلاستیکە بە دەیان مادەی ژەهراوی لە پلەی گەرمیی بەرزدا دەربداتە نێو ئاوەکە کە هۆکاردەبێت بۆ چەندان نەخۆشیی درێژخایێن.

 

ئەو پسپۆڕە پێشنیاز دەکات، کارگەیەکی ریسایکلین بۆ پاشماوە پلاستیکییەکان دابنرێت، هاوکات زەرفی نایلۆنیش بە مەترسیی جیدی دادەنێت، بەتایبەت لەو کاتەی کە سەموون و نانی بە گەرمی تێبکرێت، بۆیە دەڵێت: ''باشترە کە زەرفی کاخەز لەبری نایلۆن بەکاربێت و دەشکرێت کە سەموون و نان ساردبکرێنەوە ئینجا بکرێنە نێو زەرفی نایلۆن''.

 

 

- لە هەولێر رۆژانە زیاتر لە دوو هەزار و 100 تۆن زبڵ و خاشاک کۆدەکرێتەوە کە 27٪ـی پلاستیکە.

- لە سلێمانی رۆژانە زیاتر لە هەزار و 200 تۆن زبڵ و خاشاک کۆدەکرێتەوە کە 16٪ـی پلاستیکە.

-  لە دهۆک رۆژانە زیاتر لە 850 تۆن زبڵ و خاشاک کۆدەکرێتەوە کە 16٪ـی پلاستیکە.

-  لە هەڵەبجە رۆژانە زیاتر لە هەزار تۆن زبڵ و خاشاک کۆدەکرێتەوە کە 14٪ـی پلاستیکە.

-  لە سۆران رۆژانە زیاتر لە 400 تۆن زبڵ و خاشاک کۆدەکرێتەوە کە 32٪ـی پلاستیکە.

-  لە گەرمیان رۆژانە زیاتر لە 450 تۆن زبڵ و خاشاک کۆدەکرێتەوە کە 10٪ـی پلاستیکە.

-  لە راپەڕین رۆژانە زیاتر لە 300 تۆن زبڵ و خاشاک کۆدەکرێتەوە کە 10٪ـی پلاستیکە.