گوتەبێژی تەندروستیی عێراق: بەو پەڕی تواناوە هاوکاری پێشکێشکی ''میوانەکانی لوبنان'' دەکەین

 

ئەمڕۆ یەکشەممە 13-10-2024 دکتۆر سەیف بەدر، گوتەبێژی وەزارەتی تەندروستیی عێراق بە رووداوی راگەیاند، ئەوانەی لە لوبنان و فەلەستینەوە هاتوونەتە عێراق میوانن {ئاوارە نین} و هەر شتێکیان پێویست بێت ئێمە ئامادەین هاوکارییان بکەین.

 

دکتۆر سەیف بەدر دەڵێت: ''بە بڕیاری سەرۆکوەزیرانی عێراق و وەزیری تەندروستیی عێراق، هەموو پێداویستی و کەلوپەلێکی تەندروستی و خزمەتگوزارییان پێشکێشدەکەین و تەنانەت تیمی تەندروستیش رەوانەی لوبنان دەکەین''.

 

لە بەشێکی قسەکانیدا گوتی، ''سوپاس بۆ خودا لە دابینکردنی پێداویستیی پزیشکی بۆیان، تووشی هیچ کێشەیەک نەبووین''.

 

سەیف بەدر ئەوەشی بە پەیامنێری رووداو گوت کە دڵنیایی تەواو دەدەن لە تۆمارنەکردنی تووشبووی ئاوڵەی مەیموون، هاوکات گوتیشی، ''هەموو پێداویستییەکی پشکنین بۆ نەخۆشییەکە ئامادەیە''.