هەڵەیەک روویدا! دووبارە هەوڵبدە
رووداو - تەندروستی
بەڕێوەبەری گشتیی حەج و عومرەی هەرێمی کوردستان رایدەگەیێنێت، لە ساڵی داهاتووەوە پشکنینی جەستەیی و شیاوی بۆ ئەوانە دەکرێت کە دەیانەوێت فەریزەی حەج بەجێبهێنن، پسپۆڕێکی وەرزشیش چەند رێنوێییەک بۆ بەهێزکردنی توانای جەستە پێشنیازدەکات.
ئەمڕۆ پێنجشەممە 12-12-2024 شێخ نیاز راغب نەقشبەندی، بەڕێوەبەری گشتیی حەج و عومرەی هەرێمی کوردستان بە رووداوی راگەیاند، لە سعودیەوە بڕاردراوە، ئەوانەی بۆ رێوڕەسمی حەج دەچنە وڵاتەکە دەبێت پشکنینی توانای جەستەیی، دەروونی و تەندروستییان بۆ بکرێت، چونکە ساڵانە چەندان حاجی لەکاتی بەجێگەیاندنی فەریزەی حەج گیانلەدەستدەدەن و ژیانیان دەکەوێتە مەترسییەوە.
شێخ نیاز راغب نەقشبەندی گوتی، ئەم بڕیارە لە بەرژەوەندیی تەندروستیی حاجییانە، گوتیشی: ''رێوڕەسمەکانی حەج زۆرن و حاجییان دووچاری قەرەباڵخیی زۆر دەبنەوە، هەروەها لانیکەم 20 رۆژ لە سعودیە دەمێننەوە، هەر بۆیە ئەم پشکنینە عومرەکاران ناگرێتەوە و تەنیا بۆ حاجییانە''.
هەر ئەمڕۆ پێنجشەممە 12-12-2024 د. رێبەند کامەران، پسپۆڕی فیسیۆلۆژی و راهێنەری وەرزشی بە رووداوی راگەیاند، پێویستە پێش 40 بۆ 45 رۆژ لە سەفەرکردن بۆ فەریزەی حەج و عومرە راهێنانەکانی بەهێزکردنی ماسوولکەکان و توانا جەستەییەکان بکرێن.
د. رێبەند کامەران بە سێ شێوە پێشنیازدەکات توانا جەستەییەکان بەهێزبکرێن؛
1- بەپێ رۆیشتن: بەپێی ئاست سەرەتا با بەپێ رۆیشتنی یەک بۆ دوو خولەکی هەبێت و دوای چەند رۆژێک ببێت بە نیو کاژێر تاوەکو دەگاتە رۆژانە 40 خولەک بەبێ وەستان.
2- وەرزشەکانی بەهێزکردنی ماسوولکەکانی پشتی ران و پشت: چونکە لە فریزەکاندا بەپێوە وەستان زۆرە، ئەمە وادەکات کەمتر هێز لەسەر جومگەکان دروستببێت و کەسەک زیاتر خۆی پێڕابگیرێت.
3- وەرزشەکانی بەهێزکردنی ماسوولکەکانی شان و قۆڵ، چونکە ئەو کەسانە کەلوپەلی زۆر لەگەڵ خۆیان هەڵدەگرن، ئەمە وادەکات کۆنتڕۆڵی هاوسەنگیی وەستانیان بکەن.
د. رێبەند کامەران گوتی، ئەو وەرزشانە پێویستیان بە هۆڵی لەشجوانی نییە و دەکرێت لە ماڵەوە بە بەکارهێنانی بتڵی ئاو یاخود دەمبڵ و لاستیک بۆ بەهێزکردنی ماسوولکەکان بکرێن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ