لیژنەی زانستیی نەخۆشخانەی هیوا: دوو دەرمانی گرنگ بۆ تووشبووانی شێرپەنجەی مەمک دەستناکەون

 

ئەمڕۆ شەممە 12-10-2024 د. رەوەز سەڵاح، پسپۆڕی نەخۆشییەکانی شێرپەنجە و سەرۆکی لیژنەی زانستیی نەخۆشخانەی هیوا لە سلێمانی بە رووداوی راگەیاند، تووشبوویەکی زۆر پێویستیان بە دوو دەرمانی کاریگەر هەیە کە ماوەی ژیانی نەخۆشەکە زیاددەکەن و رێژەی شێرپەنجەکەشیان کەمدەکەنەوە.

 

 

- دەرمانی Palbociclib لە شێوەی دەنکۆڵە 'حەب'ـە و زیاتر بەوانە دەدرێت کە لە قۆناخی چواری شێرپەنجەکەن، بۆ یەک مانگ کە 21 دەنکۆڵەی تێدایە 750 دۆلار بۆ 4 هەزار دۆلارە.

 

- دەرمانی Perjeta لە شێوەی دەرزییە و زیاتر بەوانە دەدرێت کە لە قۆناخی دووی شێرپەنجەکەن، بۆ یەک مانگ کە یەک دەرزی بەکاردێت نرخی یەک ملیۆن بۆ پێنج ملیۆن دینارە.

 

تەنانەت ئەوەش باسدەکات کە ئەگەر کەسێک دەرمانی Perjeta لەگەڵ چارەسەری کیمیایی وەربگرێت ئەوا چەند ساڵێک ئەگەری مانەوەی زیاددەکات و کاریگەریی راستەوخۆی لەسەر کوالێتیی ژیانی تووشبووان دەبێت.

 

ئەو پسپۆڕە ئاشکرای دەکات، ئێستا لە نەخۆشخانەی هیوا بە نزیکەیی 60٪ـی تووشبووانی شێرپەنجەی مەمک پێویستیان بە دەنکۆڵەکە هەیە و 45٪ـیشیان پێویستیان بە دەرزییەکە هەیە.

 

لە 16 ساڵی رابردوودا نزیکەی 47 هەزار تووشبووی شێرپەنجە لەنەخۆشخانەی هیوا تۆمارکراون، کە 39٪ـیان لەپارێزگاکانی دیکەن.

 

ساڵ لە دوای ساڵ رێژەی تووشبوون بە شێرپەنجە زیاددەکات، بەجۆرێک لەپارێزگای سلێمانی ساڵی 2023 بەراورد بە ساڵی 2024، رێژەکە 42٪ زیادیکردووە.