پیسبوونی کەشوهەوای شارێکی ئێران.
رووداو - تەندروستی
چوار رۆژە لە 10 گەورە شاری ئێران و رۆژهەڵاتی کوردستان و چەندین شاری دیکە پیسبوونی هەوا ئاستی مەترسیداری تێپەراندووە. رێکخراوی پاراستنی ژینگەی ئێران رایگەیاندووە، پیسبوونی هەوا لە زۆربەی شارەکان تاوەکو کۆتایی هەفتە بەردەوام دەبێت.
فاتمە مهاجرانی، گوتەبێژی حکومەتی ئێران دەڵێت: "مژاری پیسبوونی هەوا یەکێک لەو بابەتانەیە کە هەندێک رێکاری ماوەکورت هەن بۆ چارەسەرکردنی، لەوانە داخستنی هەندێک شوێن، کەمکردنەوەی هاتووچۆی ئۆتۆمبێلەکان. هەروەها لەکارخستنی ئۆتۆمبێلی کۆن، باشترکردنی کوالێتیی سووتەمەنیی ئۆتۆمبێلەکان، وێستگەکان و کارگەکان و پەنابردن بۆ وزەی پاک، رێکاری ماوەدرێژن."
وەزیری تەندروستیی ئێران دەڵێت، ساڵانە 50 هەزار کەس بەهۆی پیسبوونی هەوا لەو وڵاتە گیانلەدەستدەدەن و لە ساڵێکدا تێکرا تەنیا 15٪ی رۆژەکان هەوای پاک هەیە.
رێکخراوی پاراستنی ژینگەی ئێران دەڵێت، پیسبوونی هەوای شارەکان لەم چەند رۆژەدا بەهۆی قەتیسبوونی هەوایە لە ئاسمانی شارەکان، هەروەها دووکەڵی ئۆتۆمبێل و کارگەکان هۆکاری سەرەکین بۆ پیسبوونی هەوا.
پیسبوونی هەوا بووەتە هۆی ئەوەی قوتابخانەکان لە 16 شاری پارێزگای خوزستان، چوار شاری ورمێ، مهاباد، شنۆ و سایینقەڵا لە پارێزگای ورمێی رۆژهەڵاتی کوردستان، هەروەها لە شارەکانی کەرەج و قەزوین دابخرێن.
وەزارەتی تەندروستیی ئێران دەڵێت، هۆکاری سەرەکیی تووشبوونی منداڵان بە نەخۆشیی رەبۆ و گرفتەکانی کۆئەندامی هەناسە و زیادبوونی ژمارەی تووشبوانی شێرپەنجە بۆ پیسبوونی هەوا دەگەڕێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ