رووداو - تەندروستی
لە گەرمیان 100 کارمەندی خۆبەخشی تەندروستی کە لە سەردەمی پەتای کۆرۆنا لە نەخۆشخانەی قەڵا دەوامیان کردووە، ماوەی دوو ساڵە مانیان گرتووە و دەڵێن، هیچیان بۆ نەکراوە.
ئەمڕۆ سێشەممە 10ـی کانوونی یەکەمی 2024 رێبین ئەحمەد، نوێنەرێکی کارمەندە خۆبەخشەکانی سەردەمی کۆرۆنا لە نەخۆشخانەی قەڵا بە رووداوی راگەیاند، دوو ساڵە بایکۆتی کاریان کردووە و داوای دامەزراندن دەکەن، ''چونکە هەر لە سەرەتای پەتای کۆڤید-19ـەوە تاوەکو 2023 لەو نەخۆشخانەیە و بنکەکانی دیکەش بە خۆبەخشی کاریان کردووە''.
رێبین ئەحمەد دەڵێت: ''ژمارەمان 100 کارمەندی تەندروستییە و بەشێکی زۆری خزمەتگوزارییەکانی تەندروستیی گەرمیانمان پێکدەهێنا، لە سەردەمی کۆڤید-19 خزمەتی زۆرمان کرد، بەڵام هیچمان بۆ نەکرا، بۆیە بایکۆتمان کرد''.
هەر ئەمڕۆ دکتۆر حارس محەممەد، بەڕێوەبەری نەخۆشخانەی گشتیی کەلار و نەخۆشخانەی قەڵا بە رووداوی گوت، داوامان لە وەزارەتی تەندروستی کردووە کە 100 کەس بۆ تەندروستیی گەرمیان دابمەزرێنن و خۆبەخشانی سەردەمی کۆرۆنا خاڵبەندییان بۆ هەژماربکرێت.
ئەو گوتیشی، ''ئێستا تەنیا فریاکەوتنەکانی نەخۆشخانەی شەهید هەژار و شەهید شێرەی نەقیب دەوام دەکەن''؛ چونکە لە چوارشەممەی هەفتەی رابردووەوە بەهۆی پێنەدانی مووچەکانیان پزیشک و کارمەندان لە چوار نەخۆشخانە، 76 مەڵبەند و بنکەی تەندروستی لە گەرمیان بایکۆتی کاریان کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ