رووداو - تەندروستی
لێکۆڵینەوەیەکی نوێ ئاشکرای دەکات، خۆراکە ئامادەکراوەکان کۆبوونەوەی چەوری لە دەوری رانەکان زیاددەکەن.
لێکۆڵینەوەکە لە زانکۆی کالیفۆرنیا لەسەر 666 کرا و دەرکەوت، 40٪ـی ئەوانەی خۆراکە ئامادەکراوەکانیان خواردووە، چەوریی ماسوولکەی رانیان زیادبووە؛ هەر ئەو کەسانەش زۆرینەیان تووشی هەوکردنی جومگە بوونەتەوە.
د. زەهرا ئەکایا، نووسەری سەرەکیی توێژینەوەکە دەڵێت: خۆراکە ئامادەکراوەکان بەتایبەت پیتزا و بەرگر چەورییە تێرەکان، نیشاستە و شەکری زیادکراویان تێدایە، جگە لەمانەش رەنگ، تام و مادەی پارێزەریشیان تێدەکرێت کە هەموو ئەمانە زیان بە جەستە دەگەیێنن و هاندەرێکی باشن بۆ کۆبوونەوەی چەوری.
ئەو پسپۆڕە زیاتر باسدەکات و دەڵێت، کۆبوونەوەی چەوریی رانەکان هۆکارێکی تووشبوونە بە هەوکردنی جومگەکانی ئەژنۆ.
بە گوێرەی دامەزراوەی دڵ لە بەریتانیا، بەکارهێنانی خۆراکە خێراکان و خۆراکە ئامادەکراوەکان وەکو ئایس کرێم، چیپس، بەرگر، پیتزا، بسکیت و خواردنەوە گازییەکان کە رێژەیەکی بەرزی چەوری تێر و خوێ و شەکریان تێدایە لە سەرانسەری جیهان لە زیادبووندایە و ئەمەش مەترسی تووشبوون بە جەڵتەی مێشک، نەخۆشییەکانی دڵ، شەکرەی جۆری دووەم و شێرپەنجە زیاددەکات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ